香港夜繽紛 - 22 勇闖三娘教子陣

zelo

前幾日半夜又收到Simcity大師兄電話，話第二日晚約咗Kah師兄上佢個新竇聽歌，依啲機會我當然黐得就黐，個新場話說都約咗好耐，只係Kah師兄一直唔滿意個音効，要調好先俾我哋上去，真係非常認真同專業，卒之當晚一行人冒住大雨摸黑上去。

一入門口已經見到成棚機放正中間，對Gobel Epoque Aeon Reference個外型認真夠猛，一入門已成全場焦點，喇叭中間就放置一套Eisteddfod 旗艦No.40 前級、No.1841 後級同CD機。除咗呢套主機，showroom兩邊都各有一套小型系統，一邊係Eisteddfod No.331合拼加EMT 928 II 轉盤推Magico Mini II。另一邊係Eisteddfod No.341前級加 No. 840 MKII後級推Goldmund Tethys，完全係"三娘教子"格局。



個人來講，我對Magico Mini II套系統有較大興趣，話晒呢對喇叭係Magico開山鼻祖，難得呢對仲保養得非常好，呢對喇叭曾經係我第一對想買嘅喇叭，只係當時已經買唔到，所以今次見到真身真係興奮到震。我第一時間要Kah師兄開呢套機俾我哋聽。一開聲果然係有料到，Mini II話就話書架喇叭，但表現尤如座地喇叭，聲音好離箱亦好平𧗾，呢對喇叭確實好聲，另外估唔到一部合併機可以推得惦呢對喇叭，Eisteddfod No.331合拼依部合併機認真有實力，呢對喇叭出名難搞兼被好多人批評低頻唔夠，但今次聽完全冇問題，加上Kah師兄摸清對喇叭點擺位，低頻都好充足。成套機配埋SRA架，加埋個背景真係襯絕，依套小型系統我個人就覺得正到爆。



之後我哋又聽吓後面套Goldmund，好老實，因為之前嗰套機實在太好，我對依套反而興趣大減，音色亦唔太吸引，另一最大原因係套機仲未正正式式set好，只好之後有機會再試多次。



最後我哋聽套正室大機，對上一次我係喺Kah師兄聽Gobel呢對喇叭，當時印象好深刻，因為咁大對喇叭放屋企真係好震撼，但Kah師兄又馴服得佮佮惦，所以我都好期待今次放大場個効果係點，坐定定聽咗幾首唔同類型嘅歌，我個感覺係成套機出啲聲好乾淨，Eisteddford套機同Gobel好夾，屬精準、速度快、音色偏向鑑聽類型，咁大對喇叭都完全可以駕馭到，控制力認真超凡，以當日表現計，係完全可以收貨，不過我個人覺得對喇叭喺Kah師兄屋企嗰時好聽啲，例如音像同低頻控制，但依個可以理解，個場啱啱先開始攪，相信之後會再調教得更好。



嗰晚卒之玩到半夜先走，可能嗰晚Kah師兄見到我哋唔太滿足，我哋走咗之後嗰晚佢即刻搞套Goldmund，仲要深夜點半鐘發短訊通知我…過多日又再深夜成點鐘發個短訊，話套大機已經重新擺過位，佢大哥真係夠哂passion，你話點到你唔服。遲啲佢會set返好個空軍一號黑膠盤同成套CAS系統，我都好期待，因為Kah師兄玩依兩樣嘢都好耍家，等佢set好一定會再上去聽多次。



我本人就非常欣賞Kah師兄，尤其佢嗰種死不認輸嘅性格，好似啲人見佢屋企放咁大對喇叭，未聽過淨係睇相就話佢玩唔惦，但事實上佢搞得掂之餘仲要好好聲，今次個地方俾人話佢用假天花唔惦，佢一樣靠心思、靠嘗試去做好，記得下次去唔好只係睇機，睇吓佢啲擺位、房間處理啲細位，你就知佢落咗幾多心機。

最後我想講半夜1:00我已經同周公個女打緊牌，點解你哋位位都好似唔駛瞓咁，個個都咁夜先嚟搵人…

racewong

KAHW師兄SET機係有一手.

zelo

racewong 發表於 2024-11-21 14:21
KAHW師兄SET機係有一手.

終於有人回

Kah師兄擺位功力好深厚，值得跟佢學習。

Benny213

佢玩 CAS 仲利害

zelo

Benny213 發表於 2024-11-21 20:04
佢玩 CAS 仲利害

遲啲佢搞好會再去夜闖。我都幾期待。

racewong

zelo 發表於 2024-11-21 20:16
遲啲佢搞好會再去夜闖。我都幾期待。

我都未有時間上去聽野

Simcity

兩種玩法，兩種味道，趣味十足，好嘢！

racewong

Simcity 發表於 2024-11-24 06:22
兩種玩法，兩種味道，趣味十足，好嘢！

  我果時去KAHW師兄屋企, 佢仲係用緊GOLDMUND喇叭...

Simcity

又是另一個傳奇故事！

racewong

Simcity 發表於 2024-11-24 13:26
又是另一個傳奇故事啦！

你鐘意邊對?

Simcity

兩對都鍾意

tst123

我都去聽左音樂大師旗艦的一套，聲音比之前的前後級較幼細