香港夜繽紛 - 30 西貢有西毒!!

zelo

前排家訪過Duncan大哥後，成日個心囉囉攣，因為總係覺得上次聽得唔夠盡興，有啲患得患失感覺，下次都唔知幾時有得再去。可能前排做多咗好事，好似多咗讓人坐關愛座、買吓六合彩做善事咁，機緣巧合下又俾我見到Duncan大哥，同佢傾咗兩句後就順便抄埋牌，再順手約多次家訪。原本諗住叫多一兩個朋友一齊去，點知變咗七條友，好彩我面皮成尺厚，問准主人家可唔可以安排到，Duncan大哥都好爽快答應，於是嗰日7條友分幾部車直踩入西貴。




今次家訪原因除咗想再聽得盡興之外，我知道Duncan大哥換咗塊鈦金屬臂板，聽佢講換咗之後成個盤即刻升級，所以我都想知係咪咁犀利，另一樣係Duncan大哥答應我我哋無理要求，開open reel俾我哋聽，所以今次真係超期待。

到埗後我哋已經急不及待殺入音樂室，打頭陣係隻絕版CD頭版蔡琴機遇，單一隻月光小夜曲已經令所有人入晒局，嗰種包圍感唔係講笑，有人聽到有夢見家鄉感覺。聽完一輪CD為前菜暖身之後，就開始上主菜聽黑膠，上一次我已經有提過Duncan大哥點樣將個AS Astellar盤改良，今次估唔到可以再提升，依個盤認真好玩，臂板用上鈦金屬，果然就係不一樣，我覺得最大改善係音色變得厚潤，AS臂特性係較冷聲，但換臂板後，無疑係多番少少色彩，音樂感更強，低音更實淨，確實係有驚喜，所以我都同Duncan大哥講今次套機絕對好聽過上一次，據講遲啲原廠有另一大改，個盤中間嗰層會用新物料俾用家再upgrade，到時應該功能會再進一步提升，斷估Duncan大哥都冇理由唔換，到時又有藉口過嚟嘆。





最後到成晚嘅高潮，就係聽開卷帶！之前喺Angus師兄度聽過開卷帶之後，已經毒死幾件，今次呢套機再聽真係萬分期待，Duncan 大哥部open reel用緊上一代Ballfinger M002P，正好我一直考慮緊要唔要入Ballfinger，今次真係啱啱好可以試埋，我哋首先聽Bill Evan’s Trio: Waltz for Debby，warm up咗五分鐘左右就入狀態，臨場効果認真一流，同黑膠比較，R2R喺密度上絕對優勝，動態亦都較優，依個就係R2R吸引到我嘅効果，不過…我個人略嫌Ballfinger比較冷聲，佢係典型德國聲，高分析、速度快及偏冷，如果可以柔返少少就very good。之後我哋聽多一隻Belafonte at Carnegie Hall，依一隻就真係不得了⋯⋯我本身好少聽呢隻碟，今次用R2R重播可以令我迷上，重播時我成個人係入哂個畫面，嗰種震撼到今日都仲記憶猶新，成個人完全係坐喺觀眾席中欣賞Belafonte演出，現場歡呼聲、和音、樂團係好清晰聽到所有定位，我哋原本只係打算聽兩首歌，但好自然咁一餅帶聽哂，因為實在太好聽。



今日再聽R2R，個人覺得音効上真係R2R優勝，需然黑膠同為analog，但佢同黑膠唔同，變數少好多之餘，有幾方面比黑膠優勝，好似背景寧靜度，破音炒豆聲基本上係零，加上基本上已經係毋盤，所以係毫無保留咁重播出嚟，花費可以好小就做到有板有眼音効，操作亦簡單直接好多。缺點係卡帶保養及軟件選擇太少，加上播帶比較麻煩，要選歌亦有少少難度，總之各有輸有贏，可以玩晒就最好。





當晚就係咁聽到半夜先走，臨走時Duncan大哥滿面笑容，因為佢已經成功毒死晒我哋全部人，西貢山區回音大，去到山腳仲聽到佢把笑聲，依啲毒窟都係少去為妙。

jjtiger

好欣賞，可惜毒我唔到
因為荷包肝硬化
淨係個音響房都已經⋯⋯⋯

vhs