香港夜繽紛 – 35 九叔繽紛夜

zelo

見到依套機係咪已經知道今次家訪係邊位大人物，Simcity師兄屋企我大大話話都去過十次八次，每次去都會有少少驚喜俾到我，尤其係佢對Alexx V，依對係我人生第一次聽嘅Wilson高身喇叭，對Alexx V啓發咗好多人架，因為冇乜邊個（包括我）上去聽完係可以全身而退嘅，燒友啲血痕由山腰帶到落山腳，你都咪話唔驚。



今次再上去聽當然同之前有唔同，因為佢加咗隻Wilson Audio LōKē Subwoofer，Simcity師兄為咗隻subwoofer，專登隻身飛去馬來西亞向幾位燒友偷師，據悉原來佢班馬拉友好早期已經玩subwoofer落套系統上，最重要嘅係嗰班係‘非一般’燒友，所以佢話要飛過去學師，玩音響玩到要出國，佢都算瘋狂。




又簡單講講器材，全套系統基本上都係以CH Precision 1系為主，黑膠系統係Air Force 1配SAT LM-09唱臂加Ortofon Diamond唱頭，喇叭線為Transparent XL，喇叭係Wilson Audio Alexx V，基本上同我對上一次聽冇太大變化，唯一分別就係之前所講嘅subwoofer。





傾咗一輪偈就開歌聽，先聽兩段歌暖場喚返之前記憶，到開始第三首我覺得個聽感原來都變化好大，打個比喻，之前未有subwoofer之前，個畫面係極大，音壓係充斥每個角落，情形就似睇投射，不過畫面比較淡色，定位較飄遠，今次加咗subwoofer之後，我覺得所有嘢係向內集中，音場一樣咁闊，但音色較聚焦，音樂感豐富好多，細節位亦都比之前明顯，情形就似一部8K電視，畫面比投影更色彩斑斕，感觀更刺激，講到音効，最近依次應該係最好。

Simcity師兄一路打碟我就一直坐喺度聽，不過到播聆聽中國-春江花月夜時，我覺得個勁道好似差咗少少，Simcity師兄聽到就話不如將個subwoofer 相位加多一度試試，因為佢自己有時都會因應音樂去調整個相位，調整過後果然有料到，成首歌即刻生猛晒，我哋只係調教相位一度已經咁大差異，所以話subwoofer要玩得好唔係咁易，好多人可能以為加隻subwoofer冇乜難度，我個人就認為非常有學問，玩得到同玩得好係完全兩回事，小啲心機都攪唔掂，當然耳仔仲要夠靈。近排我都聽過唔少慘事，加咗之後仲衰過唔用，Simcity師兄呢度都可以算係參考級別。

總括嚟講，以我聽咁多對Alexx V，Simcity師兄呢對表現絕對名列前茅，需則近排打茅波加多咗隻subwoofer，不過都強烈建議各位約上去Simcity師兄度聽吓，可能真係會有所得著，近排佢成日話冇人約，依家飛雲嚟啦，各位要把握機會！



最後我想講…其實都係大部份人嘅心聲，只係大家勒住勒住不敢言，就係喺Simcity師兄度聽歌係永遠聽唔足整首歌，套機咁好聽，三、四十秒一隻歌其實好唔夠過癮，依家個感覺係好似變咗做九叔咁，同班兄弟玩到興起俾人冚檔，以後仲冇得出嚟玩嗰種感受，你話幾無癮⋯⋯

寫吓寫吓原來已經寫咗三十幾篇，反正都係寫來自high，又冇乜人睇，係時候停一停，今集係夜繽紛系列收官一集，多謝大家，有緣再見！

racewong

點解係收官呢??

我集集追喎.

t1174

Wilson 原廠就是出2.2 的。但問過不同燒友都唔加或唔建議。主要都是話會set 唔掂的（咁我都明自己唔會set 機）。另外當然本地環境中低都唔boom 就當你叻仔。種捉只超低回家不就是找死？

但真想想睇真加了。。尤其是2.2 可以全面幾多。

jjtiger

Zelo師兄，你都要安排時間搞下你個play room，我等緊你呀

racewong

jjtiger 發表於 2025-5-29 10:47
Zelo師兄，你都要安排時間搞下你個play room，我等緊你呀

我地都等緊呀. 好心急呀

zelo

jjtiger 發表於 2025-5-29 10:47
Zelo師兄，你都要安排時間搞下你個play room，我等緊你呀

到時搬機上架搵你幫手。

jjtiger

zelo 發表於 2025-5-29 14:52
到時搬機上架搵你幫手。

Simcity

jjtiger 發表於 2025-6-1 09:40

大師兄，失蹤好耐冇晒你消息啊!

你換咗新喇叭超過一年都未邀請小弟去聽聽😁😁😁😁😁

jjtiger

Simcity 發表於 2025-6-1 11:49
大師兄，失蹤好耐冇晒你消息啊!

你換咗新喇叭超過一年都未邀請小弟去聽聽😁😁😁😁😁 ...

早晨simcity大師兄，我冇失蹤，只係呢排工作同🎾比賽比較忙，遲啲先邀請你老人家到訪