建國大典 - 7 玄學與科學

zelo

上期講到Team 3班科學L過嚟，用電腦模擬間房做出數據，好多猛人會覺得唔需要，可以靠對耳去聽，喇叭擺位可以移前移後放到啱位置聽就可以，依個方法我唔反對，只係我覺得効率比較低，喇叭要移前移後幾多？左右要留幾多位？靠我一個慢慢磨，玩到2046都未攪得掂。需則玩音響最終都係聽聲收貨，不過玄學歸玄學，唔可以靠信仰好似有病去飲香爐灰加水能醫百病咁，聲學講到尾都係物理學一種，都係有數計，所以都係科學少少，計啱個位放好先再用對耳去聽去微調，可以走少好多冤枉路。定好位置我總共試咗幾個嘗試，傢俬放置、room acoustic物料放置、隔音簾用與唔用等，又搞足兩個禮拜，好彩Team 3個個年輕力壯，我呢啲費佬當然只淨係手指指，坐住睇三隻Pokémon 幫手做嘢。點解唔落手？你有冇見過小智親自落場隻揪？



當擺好喇叭，又嚟坐定定聽吓有冇大問題，發現駐波問題都仲係有，正開始考慮點解決時，Team 3已經漏夜抬咗兩支AVAA C20上去，依支主動式駐波消除器我個人原來唔係太接受，因為支嘢體積大，要放入屋係有難度，依家當然大把位置可以玩，加上建議一買就一對，即係又要駛多舊錢。反正來都來了，又試試個効果，先由放置牆角開始，兩支C20一開，已經解決我60%問題，喇叭後牆位置真係好似開咗空氣清新機咁，乾淨俐落，而且音質亦都唔會話用咗出現不良影響，所以冇辦法，即刻跌錢入兩支返嚟。






至於駐波問題係咪已經解決？依個世界邊有咁易…裝好晒之後再重新量度，發現兩邊放黑膠嘅木架有好嚴重駐波，於是又要洗太平地，將所有黑膠搬走，再抬走兩個大木架，依家將對木架放正套機後牆，然後所有機移前多一尺左右，真係做到骨都散。之後再試聽，音質果然已經有大躍進，基本上唔駛點再搞都可以聽，依家只係聆聽位後面仲有待改善，可以慢慢處理，隨之就可以開始調教音色。



之前諗住新場，打算先用最簡單方法處理，所以房間四邊圍上隔音簾試試個効果，依家反而覺得中高被吸得太多，而令音色欠缺彈跳力，經過一輪調教之後，依家將全部隔音簾束起反而有返活力、精神百倍。之前有啲高手話用咗隔音簾後成個格局似靈堂，我自己需然冇為意，不過我近排我終於發現原來係差少少嘢，就係差張相，之前有提過嘅高手，原來你哋咁有詩意開始想搵地方，唔好浪費機會，啲隔音簾仲未會拆，你哋可以發你張相俾我，我可以免費打印再放正房中間，我好樂意隨時為你打返開啲隔音簾，仲可以潮少少整隻MastaMic首破地獄你嘆吓，唔好理歌詞，認得個名再加個beat夠勁就惦，保證你high到昇天！

toywoof

想請教一下點選擇AVAA C20定係C212？官方只有講一支ANALOG 一支DIGITAL，唔係好明佢地既差別！

我屋企都有駐波問題，但地方淺窄只可以放一支，考慮緊C20 定C212

zelo

toywoof 發表於 2025-8-11 09:38
想請教一下點選擇AVAA C20定係C212？官方只有講一支ANALOG 一支DIGITAL，唔係好明佢地既差別！

我屋企都有 ...

同場C20同C214都有用，性能上我搵唔到有差異，分別只係外型同C214可以用Apps控制volume，我自己買就選擇C214，因為圓柱型易擺位好多。

toywoof

zelo 發表於 2025-8-11 10:09
同場C20同C214都有用，性能上我搵唔到有差異，分別只係外型同C214可以用Apps控制volume，我自己買就選擇C ...

感謝師兄，我都係因為C20應該放唔到，所以都係決定C214。如效能無大分別，咁就放心了