葡萄老祖去漫遊 3 - 葡萄加果醋

zelo

近排我估香港大部份燒友都集中出現中環，情況仲熱鬧過行年宵，日日一大班麻甩佬湧住入去，有如當年4樓有4仔咁排隊上好景商場一樣墟冚，只係差咗門口阿叔嗰段機械式Slogan，日日咁多人上去朝拜，入到大廈lobby我估計保安哥哥都應該知道大家上邊層。大家近日急住拜訪個原因應該只得一個，就係為咗對Magico M9，對M9出現已經夠癲，點知一個回馬槍，再整多對Kharma Enigma Veyron 2D，情形就好似啱啱掃完碟出門口，門口個單眼佬細細聲講過兩日有‘步兵’碟到貨一樣，需然我無耐前已經上過去嘆過葡萄，但見到咁情況，就算‘嗱’穿腸胃都要再上去。





先講講對M9，依對喇叭其實喺同一條街另一燒友個單位服務多年，不過我一直冇機會上去欣賞，先唔好講用家，就算各大音展都好難有機會放出嚟，所以可以見M9真身機會真係好微，加上依對仲要係001、002編號，真係幾忙都要上去打個指模。M9真身相當巨型，重量亦都十足，一隻成千磅，就算落轆都要多人先推得郁，M9需然巨型，但Thomas大哥間房夠闊，喇叭中間放兩對Kondo Kagura同部電子分音，望上去好工整又冇乜違和感。






Thomas大哥相當勁揪，M9進駐兩日已經將對巨物放上零震台，因為確實好多嘢未set好，我都只係粗略聽咗幾首歌，以當日聽感，M9需則同為M系列，但可以話係Magico另一血統，學Thomas大哥話齋，M7、M6係大家族嘅大少奶、二少奶，同為M系血統，音色取向大致相同，M9就係老爺最愛嘅妾侍，待遇當然唔一樣，所有Magico嘅精髓集中一身。當大家以為M9咁大對喇叭進駐500尺空間會唔會過大兼太過霸道？實際聽感又唔係喎，音色細緻之餘仲好有層次，至於M7同M9最大分別，我個人覺得M7係比M9較HiFi向，M7衝擊力較強，拳拳到肉，有如去餐廳食飯，所有餸拎晒上枱叫你起筷，總之兩個鐘收枱，好食但要你快快脆脆食完，M9就如去高級餐廳fine dining，慢條斯理咁開支靚酒嘆完先上另一個course，總之俾你慢慢㗳真每道菜式味道咁。另外M9嗰種包圍感係非筆墨可以形容，始終對喇叭大咁多，依點贏M7係無可厚非，中高表現我覺得唔係差太遠，M7一啲都唔會輸蝕，至於低頻方面表現，M9嘅表現係沉浸式而且範圍廣闊，低頻量完全填充成間房每個角落，全身係可以感受到嗰種震撼力，M9低音單元同箱身都比較大，低頻好過M7都好正常。







依對M9應該係我成世人聽過印像最深刻嘅一對喇叭，當然要玩M9係要付出相當‘代價’，基本上如同加多套系統，絕對唔係一般燒友嘅玩意，今次有幸近距離欣賞，真心感謝Thomas大哥無私分享，咁貴嘅器材真係括到條幼紋都賠唔起。

當我仲回味緊M9嘅威力，兩日唔夠對M9已經移去隔離房嘆冷氣，一對Kharma Enigma Veyron 2D突然進駐，仲要已經上埋零震台，Thomas大哥真係神人，嘆完‘妾侍’再嚟多件荷蘭少女，見到咁當然我又要衝上去聽吓，Veyron 2D造工方面係無可挑剔，從來我都認為Kharma都係最靚嘅喇叭，任何一個位置望上去都係一件藝術品，喇叭需然高身，但冇乜壓迫感，瘦身設計更顯得貴氣十足。



不過話說前頭，我個人唔係咁喜歡鑽石高音，原因係我冇一次聽得舒服，鑽石高音需則高音亮明，但每次聽都覺得高音太過銳利，當然有機會係配搭問題或者高音單元未煲好關係，不過我個人真係唔太喜歡。今次聽依個配搭我係純屬好奇，究竟以Thomas大哥依個高配版系統可以將對喇叭玩成點？



Kharma Enigma Veyron 2D同M9 一樣都係用兩對Kondo Kagura去推，因為冇兩對Odin gold喇叭線，所以係一對Odin Gold接mid/high、一對Live cable Ultimate接low ，依個配搭之前喺M9都用過，需然唔同牌子喇叭線，但配搭唔算太差，各有有互相保短。先來一隻近日大熱嘅Decca復刻春之祭，歐洲喇叭播古典係有一手，果然冇令人失望，場面澎湃，音場廣闊，至於我最在意嘅鑽石高音，又冇過分銳利嘅感覺，反而係剛剛好，高音飄逸，非常順耳，果然配搭真係十分影響，之後聽人聲播隻陳潔麗，依個真係不得了，把人聲甜到毛管戙，有肉地兼結像清晰，喜歡聽人聲嘅基本上一定中招，Thomas 大哥點解會突然投向荷蘭少女懷抱唔係無原因。



至於同M7同場比較，兩對喇叭各有所長，我覺得Veyron 2D低頻表現不及M7，例如聽鼓聲、jazz或者比較強勁嘅rock / pop，Veyron 2D比較快收快放，感覺勁度唔夠，有啲歌係會聽得冇咁過癮。M7同Veyron 2D各有各優勢，一位高貴淑女，人靚聲甜。一位年輕貌美，熱情澎湃。我都唔知點揀，反正對我嚟講都只係葡萄加果醋同葡萄加檸檬嘅分別，都係酸到胃穿窿。以Thomas大哥能力，計我話最好可以享齊人之福。