好耐好耐無寫SOULUTION了, 對上一篇已經係5系啱啱出既時侯. 當時借左套520及501 MONO返屋企試推我對MAGNEPAN 3.7.
MAGNEPAN好難推?! 係....勁難推. 尤其係要推得出有氣勢, 三頻平衡的要求. 更難. 可幸的是, MAGNEPAN只需要大電流的後級, 就可以出到八成水準, 所以我先搵對BRYSTON MONO推. 一直我自己知道我只能發揮佢既七成威力. 咩呀?! 又八成又七成?! 煎牛排咩? 我講得清楚D係我對BRYSTON MONO只係二佬7bsstc, 如果對比BRYSTON MONO 28B SST2來說,
點解我會知?! 咪就係因為我做左餅主後, 試後級試左太多部, 知道要推到對3.7可以出到100%水準, 水力, 幼單與動態, 缺一不可.
諗番當時SOULUTION 520/501這組合, 心諗這對細細部既501後級, 未必夠力推得郁我這對屏風. 當然, 大家睇過我既報告都知道結果係令我大跌眼鏡. 自始, 我對SOULUTION的推力有著極大信心.
上年AV SHOW, 我第一次見到這細細部咁精緻既SOULUTION 330合併機. 心裡想著, 這部330有否可能令我再次跌眼鏡呢?! 一等就半年時間, 收到東哥電話, 話部330已到港, 並在輝煌開緊聲, 等煲多幾日就會送到我家測試. 講真, 我的心情有D緊張, 因為這330的價位太過吸引, 加上我自己勁愛這品牌的簽名式取向. 所以喺等緊部330果幾日, 我已諗定點去測試這部期待已久的合併機王.
先分享開箱當日既相片先.
第一次開SOULUTION箱, 發覺SOULUTION都係使用雙紙盒包裝, 仲貼心到有個手抽比你抽部機出黎.
外觀就一向SOULUTION的簡約面板, 要留意既地方係如果要轉INPUT, 只需要按兩下大圓鈕就可以轉INPUT.
機後有兩組RCA 及兩組XLR輸入, 另外, 我見到有一組XLR輸出, 唔知有咩用呢? 我一陣再講依個XLR OUTPUT.
大家見到佢既機背, 中間有兩個插咭位, 即係話依部330係有兩張咭可以比你OPTIONAL後加. 一張係DAC咭, 另一張係PHONO咭.
不過今次我這部330咩咭都無, 所以無得試佢既DAC或PHONO的表現如何.
有過501 MONO的經驗, 我知道這330的推力對於SPENDOR D7應可爆到七彩, 問題在於330又可否推動我對MAGNEPAN 3.7呢?
為左這問題, 我決定測試這部330的第一對喇叭就使用3.7.
訊源當然都係使用CD8+MSB ANALOG DAC,
另外就係NOTTINGHAM ANNA LOG + AS ARCHON唱頭.
至於部330, 我就放左喺我放前級既位置, 咁我對10尺喇叭線先可以夠長.
初試合併機, 當然我會用部CD8+MSB去測試, 一開始聽左幾首人聲, 第一感覺都係SOULUTION 招牌音色, 背境黑, 線條SHARP, 夠幼細. 但當我聽到MUSICA NUDA, 唔知點解部330好似推唔出個低音. 之後試左幾隻古典, 點解D力好似唔到唔到咁呢?! 最終試左一日, 聽清楚估計係部330真係唔係太夠力推對3.7, 所以就換對SPENDOR D7聽下.
講起SOULUTION 配搭D7, 一開聲比我既聽感, 同我原先的ARC+BRYSTON各走極端.
這SOULUTION夾D7實在幼細得多. SOULUTION的中性加上SPENDOR D7的中頻魅力, 立即打高兩班. 無論係試古典/JAZZ/人聲都能夠發揮對D7的極限.
這可能係因為我原本的BRYSTON實在太過力量型, 喺音場大細深闊, 低頻的下潛力等等, ARC+BRYSTON這前後級組合依家佔著優勢, 但一說到通透, 幼細, 線條等等....就不級SOULUTION 330了.
就這SOULUTION 330 + D7這組合, 我一聽就聽左一星期, 直至前幾日, 聽隻古典時, 發覺部330在音場闊度與全頻的控制力都提升左喎, 所以咪諗住喺還部SOULUTION 330前比多次機會佢.
二話不說拎番對屏風出黎, 使用330推. 希望經過一星期既煲練, 部330會有所改善啦. 不過講真, 期望真係唔大, 因為以我的經驗, 未煲透的器材最多都係硬聲, 但對於力水方面, 煲唔煲透都係咁上下.
當我駁番晒D線材開聲後, 發覺本來無咩低音的330, 經過一星期煲練後, 低音的抽擊力與下潛力都提升左好多. 真係好鬼奇怪, 唔好話你地睇我依個報告, 這連我的試機經驗裡, 從未發生過.
有咩可能越煲越好力丫?!
等我試多隻大爆棚, 睇下部330喺對屏風勁CHUR的情況下, 會唔會著PROTECT熄機先. 哈哈. (題外話, 其實之前有D合併機都拎過黎我屋企試推屏風, 最終比對屏風CHUR到著晒PROTECT, 哈哈, 所以你地唔會見到依類REPORT, 因為我真係寫唔出).
反觀這部330, 喺勁大音壓與勁多樂器的情況下, 我其實係望實部330, 會否自動著PROTECT熄機呢. 結果當然係無啦. 其音場的穩定度與密度質感依然高班, 沒有半分腳軟感覺. 超勁! 不過勁還勁, 部330比對屏風扯到勁熱. 這証明依部330真係越址越有.
唔理啦, 見玩得性起, 就試埋在前文我有講過既XLR OUTPUT, 睇下佢係咪可以當前級咁用先.
我使用一對CARDAS CLEAR XLR由330的OUTPUT接駁到我部BRYSTON MONO. 一開聲比佢嚇親, 頂, 好大聲呀, 原來這OUTPUT係TAPE OUT. 無音量調較. 所以大家唔好亂插依個OUTPUT XLR呀.
後記,
文章標題係話部330擁有無窮推力, 咁與我使用的BRYSTON MONO, 邊部強D呢? 答案當然係BRYSTON MONO好力好多啦. 話晒都係以力量見稱既BRYSTON MONO BLOCK後級喎, 如果我依篇報告話部330仲好力過BRYSTON MONO BLOCK. 你地都唔會信啦.
其實咁既比較亦絕不公平, 用一部SOULUTION入門合併機, 去同對BRYSTON MONO鬥力水. 簡直係兩碼子的事.
SOULUTION 330擁有SOULUTION簽名式音色, 以十萬元級別的合併機來說, 佢既力量與控制力亦都係我試咁多部合併機最好最勁既一部. 以佢既力水, 我估計足夠推動市面上大部份既中型座地喇叭.
加上這部330可以加PHONO咭與DAC咭. 用家真係可以一部機攪掂晒. 試D有機會我試下叫東哥入埋兩張CARD後, 喺HIENDY攪番場SOULUTION 330試聽會吧.
以十萬頭的價錢, 就買到SOULUTION, 加多兩萬幾就有埋SOULUTION的PHONO或DAC. 今次SOULUTION好明顯係賣大包. 合併機皇這稱號, SOULUTION 330一定會係其中之一. 如果要數到合併機既控制力, 我諗330認左第二, 都無咩品牌可以認第一.
最後, 講埋SOULUTION 3系的PHONO CARD賣價$25800. 玩黑膠的老友, 係咪流緊口水呢?! 哈哈.
代理: 駿韻音響
SOULUTION 330 : $118,000
PHONO CARD : $25800
http://www.hiendy.com/hififorum/ ... read&tid=108990
|