Audio First Designs Cadentia 3 可能係 2025 年最有驚喜嘅喇叭

kelvinhin

好耐冇試過一對喇叭有一聽完就想大力推坑嘅衝動。依對 Audio First Designs Cadentia 3 嘅設計師 Harry 近年喺「某英國音響研發工程師的碎碎唸」Facebook 專頁分享關於喇叭嘅科學知識而薄有名氣，我亦好欣賞佢對音響嘅態度與熱誠。最近佢嘅喇叭喺香港由方浪音響代理，而今日亦搞咗個發佈會，令我終於有機會聽佢嘅表現。

詳細嘅規格就唔喺度詳述，畢竟佢嘅 FB 專頁都有好多關於依對喇叭嘅技術詳情，直接講聽感。首先佢嘅聽感同佢嘅量測結果一樣，非常爽快、乾淨、平順，但重點係非常飽滿、細膩、開揚，應柔順則柔順，應刺激則刺激，而且就算唔係坐喺皇帝位，音場都係寬闊而高密度，可以感受到依對喇叭離軸測量表現優秀嘅好處。

Cadentia 3 嘅高音同中音單元喺近年多款 Hi-end 級喇叭，例如 Rockport 及 Perlisten 上都有使用，而我覺得依對喇叭嘅聽感同 Rockport 非常相近，同樣地係中性而十分之「放」，可以令人感受到驚人嘅聲音密度及速度，但重點係佢嘅定價不足六萬港元，純粹講聲的話，同佢差唔多水準嘅喇叭基本上都要六位數字，依個價錢，it is a steal。