尋找風佬的故事：溫婉細膩 Nagra Compact Phono

kelvinhin

我用 Aurorasound VIDA Prima 唱放已經幾年，配合 Hana ML 唱頭雖然都可以接受，但感覺上仍然未發揮到唱頭嘅潛能，所以就萌生升級唱放嘅念頭。之前我試聽過幾部唱放，但由於都係喺舖頭試，所以都只能大概聽到聲音嘅特性。早前鎗王問我有冇興趣借部 Nagra 嘅唱放返去試吓，我心諗「好貴㗎喎」，佢話依部係入門級款式 Compact Phono，應該會係我接受到嘅價錢範圍，咁有得試就梗係試吓啦。



Compact Phono 唔係 Nagra 嘅第一部入門級唱放，2009 年佢哋已經推出過 BPS，最特別之處係使用 9V 電池供電。Compact Phono 雖然冇咗電池供電，但各項規格，包括訊噪比、分離度都比 BPS 更勝一疇。Nagra 嘅唱放線路從佢哋錄音機嘅咪高峰放大線路中啟發，以佢哋自家繞製嘅 10 dB 升壓牛為中心，透過極短信號路徑去達致極低失真放大。相對於高級型號而言，佢少咗好多設定選項，負載電阻需要透過電阻棒調整，而且只支援 MC 唱頭，但對只有一頭一臂嘅我嚟講影響都唔大。



Compact Phono 跟機火牛使用現成嘅開關式供電器，但依隻唔係普通平價貨，而係工業級高效率、低干擾產品，而且即使 Compact Phono 嘅耗電量只有 0.5W，但隻火牛嘅最高輸出達 60W，目的就係要令佢喺最輕鬆嘅狀態下運行。而且機內亦有高性能穩壓器及濾波器去提供更乾淨嘅電源供應。為咗儘量減少震動影響音質，Compact Phono 使用由實心鋁磚挖空而成嘅厚重機殼，令佢嘅體積即使只有 185 x 166 x 41 mm，但重量達 1.9KG。



從 VIDA Prima 換做 Compact Phono，聽咗唔係好耐已經搵到佢嘅最大優點：令啲音質唔太好嘅黑膠好聽咗好多，例如八十年代華星嘅唱片。當年華星嘅錄音質素有幾「好」，聽過嘅都心知肚明，其問題包括聲音既空洞、又模糊。Compact Phono 令聲音嘅密度明顯高咗好多。減少咗聲音嘅空洞感覺，同時亦令聲音更凝聚，高頻亦細膩得多。而播放近年某啲 mastering 做得唔太理想嘅碟，Compact Phono 亦能從中獲得更多細節及層次感，減少當中嘅吵耳感及壓迫感。

聽錄音及制版精良嘅唱片時，Compact Phono 嘅音色取向亦能增加欣賞音樂嘅樂趣。佢嘅聲底非常平順、飽滿，又帶點暖意，即使佢可以還原到豐富嘅高頻細節及殘響，但佢唔係屬於高清嘅類型，就好似 100W 鎢絲燈泡嘅光線咁，明亮，溫暖，而不刺激。考慮到我依家所用嘅器材及線材都係傾向冇咩音色，Compact Phono 嘅特性起到唔錯嘅互補作用。



Compact Phono 跟機嘅負載電阻只有 100 ohm 一個選項，如果用家需要其他阻值嘅負載，可以向代理查詢，今次代理提供埋其他電阻俾我試吓有咩分別。Hana ML 唱頭建議使用 100 ohm 或以上負載，用 100 ohm 電阻的話，聽咗陣就覺得太暗。換上 180 ohm 電阻後，高頻量感會多啲，但都係有點暗，而 270 ohm 的話，聽落明顯通透返晒，低頻亦實淨得多。所以可以的話，就最好除咗跟據唱頭規格建議嘅負載阻值之外，揀多條高一兩級嘅電阻去試聽邊款嘅效果比較合適。

過往我冇咩機會聽 Nagra 器材，主要都係畀佢嘅精密工業風造型所吸引，尤其係佢部 CDC 係我心中最有型嘅 CD 機之一。而今次聽咗部 Compact Phono 後，終於明白點解咁多人喜歡 Nagra 器材嘅聲音，依種飽滿、平順、細膩嘅聲音，可以令人忍唔住一路聽落去而唔覺疲倦，就係佢嘅最大魅力。

jerrytck

如果換上線性電源，聲音更上一層樓。🐭😮

jerrytck

如果Narga有自家線性電源，一定係用番佢啦。🐭😮

Dynavector

   
恭喜，恭喜，師兄步入“南瓜”世界。

鎗王 用全套“南瓜”，佢冇點你， “南瓜”唔係 HiFi，係用嚟聽音樂，真正聽過世嘅器材。

個“華”ML 頭好抵用，日本 Excel Sound 做唱頭做咗幾十年。

日後有時間，建議換走個DD盤，係二手揾個舊 Rega P3，多數跟支 RB300，動態平行夾 MC 頭最好。聽過就知道點解貴價唱盤大部分都係 belt driven。


https://youtu.be/yRltMVpUiW4

kelvinhin

Dynavector 發表於 2025-12-23 06:47
恭喜，恭喜，師兄步入“南瓜”世界。

鎗王 用全套“南瓜”，佢冇點你， “南瓜”唔係 HiFi，係用嚟聽 ...

未換1200GR 前就係用緊 Rega Planar 3，仲要加埋原裝電子控速，但同 1200GR 比，喺聲音嘅清晰度同穩定性上都係差啲。

Dynavector

kelvinhin 發表於 2025-12-23 11:03
未換1200GR 前就係用緊 Rega Planar 3，仲要加埋原裝電子控速，但同 1200GR 比，喺聲音嘅清晰度同穩定性 ...

  
  
係揾舊嘅 Planer3，冇乜乜電子控速，得粒電容電阻個D。







本地用 Planer3 最長情，用咗幾十年嘅，應該係 飛韻余/余師傅，片中嘅 Planer3 裝支 Magnepan Unitrac tonearm，又係用咗幾十年。


https://youtu.be/vfL9b7yeHhI