頂級夢幻墊材：Stillpoints Ultra 7 V2

zelo

前排一直研究緊各牌子嘅釘腳，換腳依個想法其實早喺搬入新地方時已考慮，奈何當時實在太惡搞，俾套機玩到得返半條人命而擱置咗，之後就咁玩咗差唔多一年，見到所有嘢開始穩定，就重啓呢個計劃。

有想法即係套機有問題，本身對Alexia V係用緊原裝訂腳Acoustic Diode，套釘其實係靚，只係塊墊真係眼寃，輕飄飄兼冇質感，真係唔落好過落。加上之前因為想控制好個低頻，所以我全部換晒Wellfloat Delta，Wellfloat Delta効果係唔錯，加咗之後音色變得輕快同更有音樂感。普遍來講係聽得好舒服，不過聽大棚嘢時，就有少少腳軟嘅感覺，線條唔夠實淨，而且結像亦都比較模糊，所以最後都係決定換走所有釘腳。睇完一大輪，我首選都係Stillpoints Ultra 7 V2。

有晒目標緊係沖上去搵德哥傾吓計順便傾下價錢，德哥好識做生意，一直播住靚歌又逐件產品慢慢介紹，好service到我都唔記得幾時科咗水，淨係記得佢送我出門口嗰時話貨到會通知…其實U7V2我真係連實物都冇見過，咁貴訂返嚟係有少少冒險，只不過我一直有用Stillpoints啲嘢，對品牌都有啲信心，斷估唔會‘奶嘢’啩。



上個禮拜收到貨，開箱拎上手，果然又大件又斤両十足，底部有條六角螺絲可以調整鬆緊，中間夾住陶瓷珠同數個technology pockets，有別於其他型號，U7唔需要另外加裝 Ultra Base，底部接觸面都頗大，裝上後喇叭後都好穩陣。





裝上後試聽咗一陣，音効已經大不同，所有嘢已經冇之前咁散渙，即時反應係全頻線條收得好實淨，成套機精神晒，依樣已解決我多個月被困擾嘅問題，聽人聲口型更聚焦，立體感比之前更強烈，低頻亦都收得好，亦都較之前豐富，只不過高音略嫌有少少刺耳，因為換腳都要時間沉澱，我決定俾幾日的時間適應，之後再慢慢聽。



安定咗幾日再開機聽，進步果然唔少，首先係音場的改善，無論深度與寬度，定位更加精準，結像比之前實在，如果以畫面形容，可以話由平面轉成更強的 3D 結像。低頻方面，之前係比較鬆散，依家處修正得非常好，低頻變得更有彈性，而且層次分明。之前高音有少少颷同刺耳嘅情況都消失咗，回復返未換腳前般絲滑。



總括來講，U7 V2依款腳確實係有料到，不過買之前我都糾結咗好耐，一來價錢真係貴，二來依件產品喺網上嘅資料真係少之又少，不過Stillpoints依個牌子嘅產品我比較熟悉，始終有啲信心，致於值唔值得就好個人，對我來講都算值得，因為可以將對喇叭潛力谷到盡，個改善程度我係完全收貨，佢個價值等同換對新喇叭，依家對喇叭玩多幾年都仲可以，Ultra 7 V2依款墊材，對我來講絕對係夢幻級。

MetalNuts

Stillpoints 钉垫对低频好有帮助，实净唔鬆散。我都用紧Ultra 5 俾对喇叭，Ultra 6 俾 Dac. 好嘢唔使多讲，试过就知。