源頭減費 - PowerLab 世紀電箱簡單報告

zelo

由搬入新地方開始，工廈嘅電處理係第一難題，之不過搬去新地方係屬試驗性質，諗住玩唔惦就收工或者另覓地方，所以開始時冇諗過要大裝，依家玩咗差唔多一年，覺得所有嘢都開始穩定，就更加冇考慮重新大搞，直到某一個星期日晚，估計係禮拜日附近啲寫字樓冇開、隔離三個工地又冇人開工、本身座工廈又靜過鬼，因為我係從未試過星期日晚返去聽歌，當晚成套機表現同平常好唔同，所有嘢都有提升，係意料不到咁大分別，就算之後幾日我再去聽都聽唔返當晚嘅音色，所以好自然估到答案就係市電嘅影響。







要搞電當然先睇吓啲超級燒友用住乜先，我見Thomas 大哥同Benny大大都係用緊Power Lab世紀電箱，照跟應該都冇鑊氣，於是搵Andrew上來幫我睇睇，我個情況有少少唔同，因為我本身牆線、牆插都係新裝用住Audience，要全部換走係好浪費同太花錢，所以我打算只換個電箱，另外加多兩組冷凍灰武士加power of the ring插座，睇好位就殺價兼擇日開工。







等咗三個星期終於開工，Andrew同維師傅晨早開工，効率非常高，半日都唔使就搞惦，據講個電箱入面啲模組都需要大約200個鐘run in，但我都冇理，當晚開機試咗一陣，返到去第一個改動將對後級電源線由Isotek Titan拆走再直接插入個新插座，因為我想對後級唔再經任何電處直接從新插座攞電，而其他器材先不變都係經返電處出，慢慢試清楚先再作決定。



初次開機後個聽感係背景已經比之前靜，我一直以為之前已經處理得唔錯，原來個分別都唔少，另一樣改善係成套機比之前更有力量，依個應該係後級直接由插座攞電關係，其實更早前我都試過後級直接由牆插攞電，不過効果唔係咁理想同埋底噪都頗嚴重，所以一直都係插返落部Isotek Titan度。



當晚求其聽幾首歌就走人，為咗再試清楚，都係等個電箱穩定啲先再開機，經過幾日run in，我挑個下午時段再試聽，果然有驚喜，我發現成套系統生猛晒，最明顯係聽啲大動態音樂，爆發力強而且控制力亦有所提升，之前下午時段聽歌仲久不久出現些微底噪，尤其聽CD就覺得有啲毛噪感，依家基本上係冇任何底噪，寧靜度確實比之前改善好多，所有嘢變得好清晰，乾淨嘅電原來可以咁大改善。依家套機絕對可超越當晚聽感，



好多人問用咁多錢去整個電箱值唔值得，我會咁樣分析，成套機嘅電都係要經過依個源頭位，係可以影響成套機嘅，冇後顧之憂就之後真係點玩都得，個得著肯定好過換一條同等價位電源線，加上依個電箱就算之後要搬都可以成組拆走再用，以器材計我覺得係值得投資。至於缺點，我個人覺得個電箱size偏大，一般家庭要預留足夠空間先可以安裝到，需然個電箱好靚仔，但真係唔係咁易入到屋，如果可以縮多1/3 size相信會容易入屋好多，另外個電箱係有聲出，因為佢久不久會放走啲電，個relay掣係會發出嘚嘚聲，聽緊歌嗰時係唔會察覺，但平時係會聽到聲，依樣要注意一下。

jerrytck

恭喜師兄！個獨立電箱好大個，堅正！🐭😯👍🏻