百事佬手記(4)
百事佬披上戰衣，飈著戰羊，穿州過省，
走遍大街小巷，四出偵查，
索盡最新行程，為大家報導市場上嘅最新消息。
如果你問我，HIENDY現時最熱炒嘅影音產品係乜？
我一定會答你係BDP，先有OPPO95，接住係P記55，依家又輪到劍橋751。
但至於市場上最炙手可熱呢，就一定係3D投影機嘞！
只要你隨便打開香港三本主打影音器材嘅雜誌，不難見到近期絕大部份嘅試影會，都走唔甩投影機。
老實講；由第一部單槍投影機發展依家，不論對比度、光亮度、以及解像度，都進步咗唔少。
回想起當年睇嘅SHARP XV－Z201單眼仔投影機，行480P播蜘蛛俠DVD，諗起都有啲想嘔呢。
之前都同大家介紹過OCTOMA HD83，亦喺Y記試影會中俾大家欣賞過SONY 30ES嘅威力，
不過要講到真正嘅高解像，就必定係JVC DLA-X90R 3D DILA投影機呢 ！
上星期睇AV雙周第173期嘅時候，俾我發現咗佢地喺上星期六舉辦DLA-X90R試影會，
我即時fing個輪俾主編Desmond，希望留個靚位先睹為快為HIENDY會員報導一下，點知佢回覆話：
「百事佬，真係幫你唔到喎，不如直接去登記報名啦！」
仲以為自己好有face添！好彩，又抽中咗我喎，真係托HIENDY嘅福氣呢。
去到中環嘅“image n sound limited”時已經差唔多開場。
嘩！有無搞錯呀！人頭湧湧座無虛席嘅？仲見到幾個熟口熟面嘅網友添！
活動開始時，AV雙周司儀Desmond先講述一段開場白，之後JVC市務經理Heron介紹主角嘅全新4K技術，
播放Super HiVi BD俾大家比較一下開啟e-shift技術前後嘅分別，
仲叫參加者行到幕前近距離感受一4K嘅表現，可惜我嚟得遲要企到最後排，否則一定出去感受下。
不過呢兩位參加者不約而同地話，開咗之後字體嘅鋸齒少好多（應該唔會係造馬掛！）。
Heron解釋因為e-shift技術能夠將現時1920 x 1080 影像，增線至3840 x 2160（4K），
所以邊位會比一般高清投影機細緻．雖然我無得褻玩，但淨係遠觀都可以感受到佢嘅威力，
尤其播放一段女model著住白衫穿梭係黑白背景，不禁嘆咗一聲：
真有料嚟
原來對比度有成12萬：1，唔怪得知黑得咁黑，白得咁白啦！（好似好廢話咁添！）
玩完試機碟，正正式式開始試影會嘞，打頭炮嘅係變型金剛3機械八爪魚拆樓一段。
Desmond叫我地留意大廈玻璃嘅通透度，以及八爪魚鬚轉動時嘅流暢度，果然如Heron所講，
已經完全超越電影院嘅質素。
AV雙周司儀Desmond
JVC市務經理Heron介紹主角
睇咗三兩段2D片之後，係時間輪到3D上演嘞！第一段播放嘅竟然係Toy story3嘅片頭Trailer，
唔通Desmond都睇過我地HIENDY ｘ YAMAHA試影會POST偷師？
相比起當日嘅Sony 30ES，又真係另一個層次喎！
希望有機會睇埋佢部大佬100ES，相信又係另一個境界。
除咗Toy story3之外，試影會大部份時間都係播放一啲偏暗嘅片段，如愛麗詩夢遊仙境、TRON...等等，
全部都以黑位主打，可想而知JVC對呢部旗艦有幾大信心呢！
節目完咗梗係把握機會同HIENDY會員謀取福利啦！
即時捉住JVC負責人傾談有關合辦試影活動，佢地回覆係：有研究之至，有研究之至。
既然嚟到“image n sound limited”，當然順道訪問一下場地話事人同埋了解下試影會嘅背後器材啦！
話事人周先生先帶領我參觀舖內三個不同房間處理嘅地方，包括影音室、音響室、同埋器材室。
影音室由於已經有七隻喇叭再加上兩隻十仔，所以會較著重吸音方面，
令同一音頻唔會重疊產生煩擾嘅噪音。至於音響室，充分利用擴散板，經過計算分佈到牆身及天花，
聽起音樂時更有肉地，更能感動聽者，最後到器材室，乜都無做過，啲聲聽起嚟好死好難聽呢！
現場器材及陳設
透聲幕後面嘅喇叭分佈
選用本網大熱嘅劍橋751BDP
兩隻超薄超低音設於座位枱下，真真正正的隱形
| 
IP卡
狗仔卡
發表於 2011-12-5 12:24:04
提升卡
置頂卡
沉默卡
喧囂卡
變色卡
顯身卡
發表於 2011-12-5 23:14:36
我剛剛俾左錢