母親節禮物 (Pioneer X-HM30DAB-K)

pepsiman

有日返到老家食飯，老媽子話睡房部老爺收音機... 魂歸天國，叫我幫佢搵個替身返嚟，但係希望部新機可以睇埋DVD，因為佢班街坊送咗好多粵劇DVD俾佢，想得閒係房爆吓... 咁喎！呢個要求好低啫，好多微型組合都有啦...
五月頭，趁住母親節在即，一於整部微型組合孝順吓佢老人家先...

爬番Hiendy D舊文... ，有部Pioneer X-HM30DAB-K好似幾啱使喎，2K鬆D有交易，而且有齊老媽子o既要求。好！一於入手...

作為Hiendy大內總管理員，雖然呢部機唔會係會員o既興趣之選，但係用嚟送禮或房間自用，都係一個唔錯o既選擇... ，所以寫個簡單報告同大家分享吓。從個紙箱拎出部主機出嚟，發覺比想像中扎實，仲差D跌咗落地添... 。睇睇個背脊，咩o野端子都有齊... ，HDMI、S-Video、RCA Video、色差、同軸一應俱全。不過嚟到呢個高清年代，一個HDMI插已經可以解決晒所有問題，所以有唔少新款藍光機都已經取消咗S-Video端子。過去我都曾經用過幾部微型HIFI，為求減輕成本，大多數只會用彈弓夾去連接喇叭線，不過呢部卻用上喇叭線插座，雖然只係雞o野，但起碼可以滿足到一班貪玩o既用家！

講咗咁耐，都係時候開機聽吓... ，拿拿淋放隻Susan Wong落去聽吓先。如果話部機好音色講你都唔信啦... ，不過高音尚算通透，但中低頻略欠肉地，於是我o係bass度加大3個db，人聲總算厚番多少，音樂感亦有所提升... 。我嘗試當佢兩聲道玩法將對喇叭toe-in再試聽，以細音壓下聽完一首Close to you，以呢個價位嚟講，算係物有所值呢... ！

入呢部機其中一個目的，係播放DVD，而廣告話呢部機可以將一般DVD影片，增線到1080P全高清影像。我嘗試將佢駁去部三菱HC4000度投92”畫面，Oh！No... ！睇慣BD真係接受唔到囉！大特寫還可以，一個遠SHOT即時... 無所遁形，都係攞返入房用部22”電視試把啦！可能係預咗佢無料到，反而係22”電視度睇，合格有餘呢... ！咁爆戲佢又得唔得呢？聲稱有30W x 2輸出，爆起上嚟雖未至於軟手軟腳果隻... ，不過無十仔支援之下，震撼性始終欠奉。最後都係果句啦，微型組合唔好妄想會有家庭影院o既表現，否則；我地套機掉咗佢落鹹水海好過... 。

呢部機另一賣點就係機頂設有iPod機座，而家大多數影音產品都支援iPhone，無計，鬼叫apple咁受歡迎咩。雖然我老媽子未識玩iPhone咁in，但係以後我個女去嫲嫲度食飯時，又可以多一樣娛樂呢！

母親節當日，我將禮物送俾老媽子，之後再將部iPhone插落去機座播放預先準備好o既粵曲俾我老媽子嘆吓，佢好enjoy我錄俾佢o既歌... ，聽吓聽吓老媽子突然間同我講：阿仔，你知下次送咩o野禮物俾阿媽啦？

頂.... 呢次捉蟲添...

MarkMak

送咗你套機俾伯友囉！佢會讚你D粵劇好睇好多，你樓上又會開心好多！double win ！！

edward0914

真係一個孝順仔 ，錫

kelvinchow8

私知送咩比你老媽子 ~~~ 送隻mk250比佢 ! wakaka

felixk

比條Diamond 佢 等佢睇DvD有改善

pepsiman

felixk 發表於 2012-5-20 01:00
比條Diamond 佢 等佢睇DvD有改善

我諗老媽子鐘意Diamond介指多d囉...

samnet1

C-Hing,
一份不錯的 母親節禮物 好介紹

我母親 聽收音機多, 呢個 Tuner  DAB+ / FM 頻道廣播 function OK啊 !!