211 真空管，新舊大比試

ThomasLi@FB

膽機、石機各有長處短處，也各有粉絲。無話邊一樣可以贏哂，要睇整套音響系統的配合和用家的喜好。最近小弟又轉玩膽機，主要是好玩和好聲。玩膽機一定要換膽，不同年代、不同牌子的膽聲音分別十分大。一部膽機一般都最少用上三幾款膽，配搭上千變萬化，要有心有時間慢慢試聽才可以調出合意聲音。

現在用 Kondo Kagura 2i 後級，放大管是用 211。查查資料，211膽上世紀三十年代開始生產，有九十年歷史，同好多真空管一樣，年份越久多數越好聲。這方面，現代科技並沒有優勢。今次比試集齊了五款新舊版 211，希望可以聽聽它們的特性，是否真係新不如舊。

五款 211 是
1) 跟機的 Kondo 211
2) 貴族之聲 Psvane ACME 極致 211
3) 德國 Elrog ER242
4) 舊版 40年代 GE 211
5) 舊版 40年代 RCA 211

Kondo Kagura 2i 是單聲道設計，每邊用兩支 211，一共要四支。現在要找四支靚仔的40年代 211唔容易，GE 211 還勉強找到，RCA 211 真係可遇不可求。如果鍾意玩舊膽，最好快一點入貨，再過幾年應該更難揾。

先由跟機 Kondo 211 聽起，它是用新出產的中國或俄羅斯 211 摩改的 Kondo膽。膽腳是重新焊接過，令接觸更好。Kondo 211 聲音中性，四平八穩，沒有明顯缺點，但也沒有什麼過人之處。如果無聽過其他更好的 211，Kondo 是收貨嘅，但玩膽機的重點就是"玩"，唔想換膽就不如用石機吧。

貴族之聲 Psvane ACME 極致 211，ACME 極致系列是 Psvane 鎮廠之寶，用料和做功都是最高標準，整支膽比舊版 211大一個碼，外形好靚，是現代膽的表表者。聲音也是很現代，走高清明快路線，分析力很高，結像細緻，所有嘢都"立"得實淨，但沒有膽味，是今次五款 211中，聲音最似石機的膽，是好是壞就見人見智了，要睇下用家追求什麼聲音。

德國 Elrog ER242 是同廠 ER211 的進階版，用了稀有金屬"鉬" molybdenum 陽極，令到膽的承載力大增，做價貴了不少，是最貴的現代膽。ER242 聲音和外型相似，是豪邁奔放，動態特別大，低音有力，但不粗糙，依然有適量膽味，聽流行音樂特別過癮。

GE 211 是美國四十年代大量生產的軍用物資，主要是用在無線電對講機的放射管，因為產量多，留存到現在的數量也不少。Kagura 最初是用 GE 211 做跟機膽。近年 GE 211 已脹價不少，始終是用一支少一支。同時因為歷史悠久，不景已儲存八十年，有不少 GE 211 的鎢絲會自己斷裂，我親眼見過四支 GE 211係著機幾分鐘後就燒燬，total lose。論聲音，舊版膽一般比新膽好味，GE 211 是膽味足又不失 HiFi 元素，高低伸展足夠，動態不差，音樂感很強，是可以聽過世的聲音。以價論聲，GE 211 是最好選擇。

RCA 211 和 GE 211 是同期在美國生產，只是不同廠。RCA 是 Radio Corporation of America，GE 是 General Electric。由個廠名都知道 RCA 是做 radio 收音機起家的，對聲音質素應該更執著。RCA 211 產量比 GE 少很多，現存的更少，因為直接比較過兩支 211，個個都會買 RCA，先前講過 GE 211的優點，RCA 211全部都表現更好，又好味又好力，RCA 的力度來得綿綿不絕，不是死實實的，是聽得舒服的力水。RCA 211 的表現明顯比其他膽高幾班。

現在多數我會用 GE 211，耐唔耐又聽下 ER242 和 ACME211，也會有新鮮感，跟機 Kondo 就無用了。RCA 是有朋友來時招呼用，平時唔捨得用。玩膽機就係咁煩了。

zelo

Thomas師兄每次出post我都睇到流晒口水，有機會真想拜訪學習一下。

racewong

zelo 發表於 2022-11-16 13:58
Thomas師兄每次出post我都睇到流晒口水，有機會真想拜訪學習一下。

佢對KONDO真係好毒. 我上次上去只係聽佢用CONSTELLATION 推KAGURA2i, 已經毒死左我.

佢依家換埋部kondo前級, 真係想像唔到可以去到幾靚聲啦

Kam328

我有位朋友都是用 Kondo G-1000i + Kagura 2i 推 Wilson Alexia II.  靚到不能相信! 真係實力與外型兼備, 貴得有道理.

MatthewC

其實211呢種發射管本身係設計俾發射站用，亦即係以前電台放送電波用，所以壽命過萬小時。而且燈絲咁大組長期存放會下墮而短烙。所以千萬唔好收埋唔用！

chu922

這是我夢想的組合, 要儲好多年錢先買得起{:5_103:}

racewong

chu922 發表於 2022-11-16 16:04
這是我夢想的組合, 要儲好多年錢先買得起

mee too

澳門客

玩古董大胆要先學會（老煉）開胆，否則很易玩完燒胆，快則即時內部跳火，慢就命不長久。（老煉）開胆方法，就是先淨點灯絲至少十五分鐘至半小時，當然有條件點幾小時更好。

ThomasLi@FB

澳門客 發表於 2022-11-16 17:59
玩古董大胆要先學會（老煉）開胆，否則很易玩完燒胆，快則即時內部跳火，慢就命不長久。（老煉）開胆方法， ...

古董膽要垂直放，打橫放會令燈絲不平均受力，容易斷。

最好放防潮箱，香港太潮濕會令底座生鏽。

耐不耐要播放一吓，長時間不著，內部零件壓力會積聚，定時開著會釋放壓力。

古董膽要小心保養。

七仔

又好味又好力，力度來得綿綿不絕，不是死實實的，是聽得舒服的力水。

師兄有無玩埋整流膽? 賣膽機者會標榜放大管，整流膽不被注意。整流膽的作用好大，起碼佔四成，而且又沒有放大管這樣被炒上天，值得玩。

ThomasLi@FB

七仔 發表於 2022-11-21 18:02
又好味又好力，力度來得綿綿不絕，不是死實實的，是聽得舒服的力水。

師兄有無玩埋整流膽? 賣膽機者會標榜 ...

我咁難玩又點會唔換整流膽呢？

一部 Kagura 2i 用四種膽：

211 x2, 6SN7 x2, 12AU7 x1, GZ34 x4

兩部就乘二。所有膽我都換過最少兩套，非常好玩，6SN7和 12AU7的選擇十分多，要全部寫報告就太花心機了。

跟機整流膽用八支俄羅斯 Generalex GZ34，是不過不失，換了舊版 Mullard GZ34 是更有活生感。不同年代 Mullard也試過，分別是有但不大。八支舊版 Mullard現在都唔平。

七仔

好壯觀 {:5_167:}

GEC / Osram / Genalex 舊裝現在還可以買到嗎? 三個牌子同一條生產線賣不同市場，相信老兄都好清楚，這是極品。我用 6CA4，一插這整流膽，即生氣勃勃細節豐富，無可取替。還好 6CA4 比較少機用，炒極有限。

dekiller

這家的211真係唔講得笑。世上冇幾多廠能攪得掂高壓管。

{:7_885:}

cip007

用了 Kondo Ongaku 多年, 聲音都一直不變, 真實耐聽.  Kondo 的工藝值得讚賞, 10多年機仍然靜如深海.  亦是玩膽恩物.  

kevin2007

仲有United Electronics 211, WE 211-D, Telefunken RS-237 有機會都一定要試試

ThomasLi@FB

kevin2007 發表於 2022-11-26 09:27
仲有United Electronics 211, WE 211-D, Telefunken RS-237 有機會都一定要試試

這些膽已是神級，要搵四支企理的十分困難。

不過我會留意，如果有幸遇到一定會試吓。

謝謝你的提醒。

Sohappy

Hi, Thomas 果4支Sylvania 鐵座6SN7 效果如何？

ThomasLi@FB

Sohappy 發表於 2022-12-1 08:54
Hi, Thomas 果4支Sylvania 鐵座6SN7 效果如何？

四支喜萬年長樽鐵座水銀頂 6SN7 表現非常好，我相信只有 GEC B65 可以超越它少少，四支 B65 太難找了，也太貴，喜萬年長樽鐵座水銀頂 6SN7 是唔錯嘅選擇。

Sohappy

ThomasLi@FB 發表於 2022-12-1 09:07
四支喜萬年長樽鐵座水銀頂 6SN7 表現非常好，我相信只有 GEC B65 可以超越它少少，四支 B65 太難找了，也 ...

宜家用緊兩支德仔, 試吓找對喜萬年AB先 Thanks{:7_890:}

ThomasLi@FB

Sohappy 發表於 2022-12-1 13:42
宜家用緊兩支德仔, 試吓找對喜萬年AB先 Thanks

喜萬年贏德仔，德仔最好都是 CCa，ECC802s 等，細花生膽。

現在用緊兩支德仔 ECC802s 非常好聲。