香港夜繽紛 -3 ‘大氣層’級別系統

zelo

昨日又同大師兄Simcity出去夜繽紛，今次約咗一位高人，佢套機嘅相同短片我就睇得多，但係就一直未有機會去親身體驗，直至舊年影音展認識到屋主，就開始約時間家訪，約好咗噙日，坐車入到屯門再轉車，老實講去到咁遠家訪都係第一次，個心情完全係小學雞去旅行咁。
我哋兩個人都老實不客氣，一去到已經坐定定聽歌，套系統果然厲害，聽大棚嘢係一般喇叭俾唔到，場面浩大，基本上係一個樂團喺你前面，horn嘅音色真係好特別，以為聽人聲會有大啲距離感，但實際係人聲好前，屋主播咗兩段人聲（Law記同另一段係小朋友清唱…唔記得個名了），聽到有少少毛管戙，合埋眼聽以為佢哋企喺你面前，我講笑同屋主講夜晚我真係唔夠膽聽佢播小朋友嗰段歌，個立體感真係好強。據悉呢套機全世界只有三套，喺香港可以親身見識到真係幸福，証明香港發燒友真係世界級。



聽完歌Simcity師兄建議返中環食飯，唔駛講又係飛車時間，半個鐘都唔駛已經由屯門飛返到中環，跟住兩條友嘆返個羊腩煲，食緊嘢之際，我話呢個時段來到中環，冇理由唔上去Thomas 大哥度，於是大師兄又打電話確認有冇位同攞permit 上去，我哋果然好運，咁夜Thomas大哥仲喺度，於是快快趣趣食完嘢就直踩上去。







入去時已經見到Thomas大哥準備好出哂名嘅腰果同紅酒，真係要多謝佢一直無賞咁招呼咁多人。呢個私竇我來過多次，可以講次次都有啲唔同，除咗前一排瑞士機大戰，原本套機都已經同我第一次上去聽嗰次唔同哂，我覺得今次真係真係好聽，最大可能係時段問題，到夜晚成層樓估計冇其他人用電，噙晚聽真係好靜同好滑順，今次由頭到尾全Kondo加光悅頭，先唔好理有冇味精，好聽已經惦。我哋傾吓聽吓好快咁又兩個鐘，Thomas 大哥係咁應我哋要求忙於換碟，真係有求必應，我話想聽周潤發，佢都可以變得出兩張出嚟…另外今晚我又學到嘢，Thomas大哥同我哋介紹邊種舊黑膠值得攞返出嚟聽，邊個監製功力深厚等知識，又上一課。
總括來講，噙日真係夠晒樂繽紛，一日可以聽哂兩套‘大氣層’級別嘅系統，正到咁，仲有咩好講。。

supercow

真係太幸福了...不約而同兩位機主都係用KONDO....

zelo

supercow 發表於 2024-1-18 10:37
真係太幸福了...不約而同兩位機主都係用KONDO....

第一站套後級我起初都以為係Kondo，實情係成套Cessaro系統，包括前級後級一套的。

Simcity

多謝Zelo大師兄分享，你寫文章真係百看不厭，如實報道兼有娛樂性，多謝晒！

兩位大師喺本地音響界靈魂人物,  SimCity 恆常拜訪同取經，想音響玩得好，一定要跟呢兩位大師多多學習！

好多師兄以為家訪一次就足夠， SimCity 可以斬釘截鐵講, 一次家訪係聽得好少好少, 同一個set up聽無數次才能捉摸當中奧妙之處!

supercow

zelo 發表於 2024-1-18 10:45
第一站套後級我起初都以為係Kondo，實情係成套Cessaro系統，包括前級後級一套的。 ...

實在太似樣啦......

eds60

supercow 發表於 2024-1-18 10:56
實在太似樣啦......

近鏡

racewong

你鐘意HORN 或是
M6?

racewong

Simcity 發表於 2024-1-18 10:53
多謝Zelo大師兄嘅分享，你寫文章真係百看不厭，如實報道兼有娛樂性，多謝晒！

兩位大師喺本地音響界靈魂人 ...

果然係大師兄.

zelo

racewong 發表於 2024-1-18 13:49
你鐘意HORN 或是
M6?

聽感完全唔一樣，我個人習慣性聽開音箱喇叭，Horn喇叭我咁耐以來只係聽過兩次，今次先係真正認真坐低聽，所以一定有偏頗，現階段我都會投M6。

racewong

zelo 發表於 2024-1-18 13:56
聽感完全唔一樣，我個人習慣性聽開音箱喇叭，Horn喇叭我咁耐以來只係聽過兩次，今次先係真正認真坐低聽， ...

咁都好正路...

jjtiger

Zelo師兄直頭可以做雜誌主筆

Simcity

supercow 發表於 2024-1-18 10:56
實在太似樣啦......

Supercow 師兄，之前同 SimCity 分享想購置一對新喇叭，唔知諗成點呢？

Magico 已經加咗價， Wilson Audio 嚟緊2月1號會再加價 😁😁😁

zelo

jjtiger 發表於 2024-1-18 14:35
Zelo 直頭可以做雜誌主筆

講笑咩，我啲文筆差到咁，睇完唔刮凳已經阿彌陀佛。

zelo

Simcity 發表於 2024-1-18 15:05
Supercow 師兄，之前同 SimCity 分享想購置一對新喇叭，唔知諗成點呢？

Magico 已經加咗價， Wilson Aud ...

真係～要買真係要快手，加咗價之後點減都減唔到個加幅。依家隻隻牌子接住加，一個唔覺意就超出好多預算。

racewong

Simcity 發表於 2024-1-18 15:05
Supercow 師兄，之前同 SimCity 分享想購置一對新喇叭，唔知諗成點呢？

Magico 已經加咗價， Wilson Aud ...

我見唔少燒友, 喺考慮的期間, 心儀產品加晒價. 最終都係要買.

jjtiger

其實都唔係考慮嘅因素，主要係儲緊錢，點知都未儲夠佢就加咗價
儲錢嘅步伐追唔上

supercow

Simcity 發表於 2024-1-18 15:05
Supercow 師兄，之前同 SimCity 分享想購置一對新喇叭，唔知諗成點呢？

Magico 已經加咗價， Wilson Aud ...

上次家訪完Zelo兄之後一真忙到依家, 根本無間....連Zelo家訪感受都未寫.....我會盡快

supercow

zelo 發表於 2024-1-18 15:15
真係～要買真係要快手，加咗價之後點減都減唔到個加幅。依家隻隻牌子接住加，一個唔覺意就超出好多預算。 ...

全球HIFI只會繼續加加加......尤其係美國野....

Simcity

supercow 發表於 2024-1-18 17:51
全球HIFI只會繼續加加加......尤其係美國野....

師兄，係2月1 號

Simcity

Zelo 大哥， 真係勁抽 ！