長期痛症終治好～

zelo

又嚟發噏風時間，識得我嘅都知我曾係耳筒狂，需然依家已經棄坑，但都仲久唔久開來聽，尤其是夜晚開唔到喇叭聽歌，耳筒有時真係幫到手。Chord Ultima Pre本身個耳機輸出非常之有水準，所以直接插隻耳筒入前級已經可以就咁聽，以前啲耳擴已經可以長眠，當然依個只係解決到動圈耳筒，我部HE1點算？以前一直用住一個方法，就係音源要分開兩頭走，不過接線方面都幾頭痕，所以一直以來，最折衷方法係喺解碼度用哂兩組輸出，一組RCA去前級另一組XLR去耳擴或者HE1，聽喇叭時就唔會開部HE1，相反聽耳筒時就前後級全關，一直咁用以為相安無事，但係其實都有問題，依個方法只可以用喺數碼訊源上，如果我想用耳筒聽黑膠，就要拆線轉位，開頭新屎坑當然係威係勢，但係我意志力薄弱，玩多兩玩已經放棄，所以近排聽耳筒基本上都係聽streaming同CD為主。



疑於近排啲黑膠碟日積月纍，眨眨眼已囤積一大堆碟未開，所以又身痕諗諗有乜辦法可以用耳筒聽黑膠又唔駛另外裝拆線咁煩。忽然我諗起我部Chord Ultima Pre有個AV byass，心諗可唔可以試吓用呢個接口呢，於是開始又四圍問多位師兄意見，只不過答案不一，我又唔太敢去試，駁錯燒邊部機我都唔想，心大心細之下就直接去信問Chord原廠，佢哋回覆我話部前級其實有兩組output叫tape output，說明書講本身係俾用家駁錄音機，跟住再冇任何說明，所以基本上唔會用，Chord工程師建議我可以用依組output，因為訊號係直通，控制音量會變咗由部HE1控制，即係以後用耳筒都要開埋部前級就得。



呢兩日我就按依個方法，再分開兩個音源去試，首先試聽CD同Streaming，即係解碼入前級再轉去部HE1，咦！？個音量要去到12點先出得喎，不過聽咗幾首歌發現點解背景靜咗咁多，又有層次咁多，估計係經過前級嗰組SCHNERZINGER R3接線，訊號已經再優化咗關係，而且經過部前級，個訊號比以前更靜，可以證明部Dave解碼個輸出如果同時插哂兩個輸出係有損耗，而且亦證實部Dave本身個輸出真係認真麻麻，經前級出同直接由Dave出個効果係有好大差異。昨晚就咁好滿足咁聽咗一晚，有咗昨晚收穫，當堂有番信心，要試試主菜用黑膠盤聽，咁耐以來我淨係試過用DSAudio Master 1頭接耳筒聽，印象中効果係好，不過玩過幾次嫌太麻煩，所以之後換咗Master 3都冇再試過，今次換咗大佬Grand Master Extreme真係有啲期待，快快手放好碟落針，果然非同凡響，Grand Master Extreme頭重播喺喇叭出嚟我已經俾100分，今次用耳筒聽都係100分，不過効果完全唔同，分析力強勁，細位更清楚，而且背景超靜，靜到以為聽緊CD，當然音場方面係有局限，依方面耳筒係冇可能好得過喇叭。



果然個訊號經一經部前級每樣都有改善，音色比起直接由部Master 1 Equalizer 接到HE1更細緻，真係感動到喊。今次係一個大收穫，完全解決我一直以來最痛苦嘅問題，音響技術千變萬化，真係好大學問，所以有時候有新諗頭不妨嘗試一下，可能本身套機仲有好多潛能未發掘到出嚟，隨時意外驚喜。

racewong

邊有人咁幸福， 有隻HE1玩

vhs