香港夜繽紛 - 8 熱情西班牙

zelo

又到夜繽紛時間兼又嚟發噏風，本來今回係想集多一兩個地方先講，但事出突然，話說我前幾日有事向Thomas師兄請教，關於零震台配LPS同用電池供電嘅問題，傾咗一陣，突然冇啦啦發張相俾我，得張Wadax CD機相但又冇講嘢，完全係想吊我胃口嗰隻，好！見到咁我當然唔客氣直接約上時間聽吓，既然你有部靚機，我都唔客氣帶定幾隻玻璃碟上去聽。





其實未上去之前，我已經知道部機到咗showroom，聽感都大致知道多少，不過部機喺Thomas師兄度試，依家有邊度試聲會好得過佢個架步，心中估計効果應該會更好。
入到基地見過部機真身，部機已經霸咗四季transport 個位，機身真係巨型，秉承Altanis系列色調同設計，金工精細硬淨。



未開始聽之前聽吓Thomas師兄介紹，部機因為仲係prototype，好多功能仲未完善，好似要配外置鐘個功能係未開通的，暫時又未知係咪一定要配返Wadax自家外置鐘，另外部機現只可以接上Tidal , Spotify，之後會唔會對應Roon暫時仲係未知之數。部機輸出電壓有三段可選，分別係+1、+2同+4，出廠設定係+2，我因為聽到有師兄講+4個動態最好，但相對較粗聲，因為今次時間有限，冇得慢慢試，所以我就只用+1同+2，首先我哋用+1聽隻五虎封將，聽到一半…覺得有問題，用到M7啲鼓聲好似有氣無力，成段曲目冇哂氣勢，於是我哋轉返+2再聽，所有嘢正常番，表現有板有眼。之後換過另一張碟玉置浩二(ワインレッドの心） ，今次又係聽咗兩次+1同+2，今次聽慢版歌用+1真係細緻好多，但我個人覺得唔太平衡，都係用返出廠設定嘅+2最理想。

聽咗一陣，又係有人敲門，開門見到另一位靚仔師兄，經Thomas介紹依位師兄別名叫車王，真係夠晒霸氣，不過霸氣都唔及食物香氣，呢位師兄左手一盒燒鵝右手一盒靚叉燒，一入房就立刻set好架步開餐，我都算有食神，次次上親去都有燒味食，食吓傾吓跟住呢位師兄話想聽當舖，咁啱我又有隻玻璃帶咗過嚟，又開始聽歌，今次聽live嘅曲目，我個人覺得如果將個gain 調高到+4，有機會成個畫面會再生動啲，依家+2我覺得効果係可以，但驚喜不大，可能Thomas師兄見我哋反應麻麻，佢即刻出大絕攞套新版one step黑膠出嚟放，去到呢個位，已經冇得再投訴，聽完之後我都俾佢毒到要科水買返呢套碟。

總括來講，我覺得Wadax呢部player同套dCS四季比較各有優勢，四季個分析力、還原度係最好，好準確，相反Wadax 比較暖聲，數碼味冇咁重，當然同四季四件頭比較係唔公平，但如果以四季One單機去比較，無論價格上或音色上，我個人會偏向呢部Wadax，不過依部player我都覺得有啲唔喜歡，我個人喜歡實體按鍵，部機只係得Touch Screen，我個人唔太鍾意，因為手指紋加上反應有少少慢，慢嘅其實唔只係Touch screen 部份，個remote反應都唔係咁理想，不過今次依部機只係樣版機，部份功能仲有待改善，出正式版應該會改善。

racewong

要設計唔係實體制

ieskn96

十分感謝 zelo 師兄詳盡深入的無私分享！謹請留意現已推出的 1-STEP 黑膠唱片 JAZZ AT THE PAWNSHOP (4LP BOX) 行貨是由香港的風行唱片公司代理 -

https://www.facebook.com/swanrec ... fEZALvPkJXoVscQcKJl


19-6-2024【灣仔聲威閣】JAZZ AT THE PAWNSHOP (限量頭版附編號 4LP BOX)

racewong

AI ZELO Patrick Wu

https://youtu.be/

zelo

racewong 發表於 2024-6-26 12:41
AI ZELO Patrick Wu

https://youtu.be/

又玩A.I…

Simcity

Zelo 大哥， 真係勁抽 ！