香港夜繽紛 - 12 等足三年的約會

zelo

今次拜訪依位師兄，申請批文嘅時間可謂有史以來最長，話說認識咗Simcity大師兄後，佢大哥成日發相俾我睇，我最初見到呢位師兄套機已經係三年前，中途我一直拜託大師兄帶埋我上去聽，但條友仔完全借咗聾耳陳隻耳，一直都冇無消息，原本我都冇咗件事，直至上星期，佢又再發相俾我，今次我直頭同佢講，"足足三年啦！四年都嚟緊頭啦！老細！個批文幾時出？"今次我醒，每日三至四次疲勞式轟炸佢，有幾次佢應該嫌煩直情無已看不回，不過努力果然係有回報，終於安排到前晚去家訪。



呢位師兄套機係放喺佢workshop，不過我入到去發覺似係私竇多啲，3000 尺地方套機佔咗三分一位置，剩係睇個空間已經口水直流，呢位師兄又相當有品味，環境相當舒適，入到去人未坐定已經準備定成支山崎18招呼，美酒當前我一定唔客氣。咁嘅環境，聽歌好似已經變成次要，三條友一邊飲一邊吹水，套機就繼續開住當背景音樂，依段時間需然唔係坐正皇帝位，不過音効都非常悅耳，有咁嘅環境、有咁嘅器材、又有咁靚美酒，腦海中又浮現石修哥段對白，你話有錢幾好！



傾吓講吓不知不覺已經兩個鐘，飲飽食醉終於到戲肉，先講講依位師兄成套系統，基本上全套器材都係來自瑞士，CH+ D1.1金版、C1.2、P1、L10、M1.1 mono，喇叭係Stenheim Reference Ultime 2，Air Force One Premier唱盤，接線基本上全用上Odin 2，喇叭線就Transparent Reference G6，淨係睇個陣容已經夠晒霸氣！經過一輪暖場之後我都唔客氣，坐定皇帝位開聲聽，CH+我聽過無數次，所以今次唔係焦點，我反而對Stenheim Reference Ultime 2 喇叭最有興趣，依個品牌喇叭我聽過數次，但都只限於Alumine系列，Reference系列就少之又少，家訪就更加係第一次，今次聽依對Reference Ultime 2 同我之前聽過嘅分別都幾大，無論控制力、速度感都超強，配上全套CH+個音効更加誇張，聲音乾淨到尤如換上"瑞士山區肺"嘅感覺，清爽舒服，尤其聽女聲，好relax全無壓迫感。







我今次帶咗3隻玻璃CD踩場，分別係當舖Jazz at the Pawnshop、鬼瓜Diabolus in Musica同埋玉置浩二-ワインレッドの心，首先聽隻鬼爪，我一直覺得歐洲喇叭播古典係有一手，今次亦如我所料，小提琴聲一出已知道，嗰種飄逸、通透感同琴弦震動，真係歐洲喇叭先做到，正如我用對Accordo聽小提琴一樣，對Alexia係做唔到嗰種味道，跟住聽玉置浩二，慢板人聲都算係強項，人聲絲滑柔順，嘆住杯紅酒聽住首歌簡直係天堂，之後到聽當舖，究竟二連勝之後會唔會再有驚喜？果然世上真係冇絕對勝利，我覺得聽Jazz有啲唔到位，嗰種氛圍感我覺得唔夠味道，尤其鼓聲表現，略嫌收得太快，餘韻不足。





聽多一陣我又發現有另一樣嘢，個音場好似有少少飄移嘅感覺，同大師兄討論一下後，佢老人家又發作，又自告奮勇要幫人調教，每次呢啲時候出現，佢已經麒麟魔上身，兩眼噴火，拉都拉唔住，好彩主場呢位機主師兄夠開明，放膽俾佢任舞。首先佢由對後級入手，試吓將個gain加大，set好後聽返同一隻碟，無錯！咁樣加大個gain聽Jazz係似返啲樣，未至完美但可接受，不過變相聽其他音樂就會粗聲咗。於是又諗計，佢又話反正今日都夠哂人，不如試吓將對喇叭距離拉近半尺，佢建議係好，但我覺得唔可行，一隻成五百幾磅，要移位都有啲難度，萬一砸落嚟死鬼埋仲累人變凶宅，到時真係晚晚有夜半歌聲，所以決定放棄呢個想法，再商量多陣，我哋又決定試吓將Bi wire改返用single wire再接jumper，於是我哋三條友夾手夾腳裝拆，將對後級重新設定過，整好哂之後又係聽返同一碟，咦！所有嘢返晒嚟，之前有少少偏聲嘅問題完滿解決，定位更加準確，音効亦比之前滿意，跟住我哋就按呢個設定繼續聽，就係咁聽到差唔多半夜12:00都唔知，以依家咁嘅聲，要我聽通宵都冇問題。

https://youtu.be/WKPV21umn50

https://youtube.com/shorts/dNE43oqx6e0?feature=share

當晚真係非常盡興，機主招呼周到之餘兼見識廣博，同佢傾偈時都學到好多嘢，唯一可惜係個黑膠盤，因為太耐冇用，要慢慢再微調先可以出到理想效果，只可以再等下一次，不過今次我都醒，先同機主約定，唔係分分鐘又要等多三年。

另外因為太盡興關係，門禁時間已過，所以走之前已經攞定份舊報紙準備瞓街，真係有咁耐快樂就有咁耐折墮⋯⋯

roytam662

呢樹我都上過去, 當年係經大師兄搭路, 呢位師兄放左部m1.1 stereo 比我,
但我印象佢應該係用M1 MONO? 定最後佢升左做1.1, 非常好既地方,
下一步呢位師兄係咪想跟埋你地入wilson 大家庭

zelo

roytam662 發表於 2024-8-8 10:08
呢樹我都上過去, 當年係經大師兄搭路, 呢位師兄放左部m1.1 stereo 比我,
但我印象佢應該係用M1 MONO? 定最 ...

我緊緊好上到尾班車去聽，佢真係考慮緊換對再大啲嘅喇叭，不過聽佢講Wilson唔太合佢風格，應該好大機會換返歐式喇叭。

roytam662

zelo 發表於 2024-8-8 10:17
我緊緊好上到尾班車去聽，佢真係考慮緊換對再大啲嘅喇叭，不過聽佢講Wilson唔太合佢風格，應該好大機會換 ...

wa... kharma , marten , tidal????

racewong

zelo 發表於 2024-8-8 10:17
我緊緊好上到尾班車去聽，佢真係考慮緊換對再大啲嘅喇叭，不過聽佢講Wilson唔太合佢風格，應該好大機會換 ...

MAGICO M7等緊佢

zelo

racewong 發表於 2024-8-8 12:58
MAGICO M7等緊佢

板主冇聽書，人哋都話想要歐系喇叭

Simcity

https://youtube.com/shorts/dNE43oqx6e0?si=Ej7OLSNzc8DlHJn-

呢把女聲真係一絕，純粹用女聲嚟定奪，Magico M7，Wilson Audio XVX，Alexx V 全部要填海.