香港夜繽紛 - 14 樂在九龍灣

zelo

前排分別有兩位實力雄厚嘅朋友不約而同搵我，問我可唔可以約埋一齊上九龍灣聲望showroom聽歌，其實自從個showroom裝修好之後我都冇上過去，加上之前影音展佢哋間房逼到爆，搵位攝都入唔到去，所以我都好有興趣想去聽聽，兩位師兄各有想試，一位就想試Kondo G-700i加300B，另一位就想試 Kondo線，我就淨係想聽Zellaton Reference Ultra喇叭，啱啱好各有所需。昨日幾條友浩浩蕩蕩殺去九龍灣，Dolby大哥非常專業，一早set定架步兼攞埋櫈等我哋，showroom裝修過後果然零舍不同，間房比之前四正好多，我覺得個比例仲好過之前舊中環嗰度。



今次我哋主題基本上係全Kondo，由唱頭、接線、phono、前後級、喇叭線，全部都係Kondo，未開聲已經知道毒到嘔電，首先我哋聽Eva Cassidy 隻 Acoustic，Kondo就係唔一樣，聽女聲係一絕，歌聲好絲滑，好有層次，尤其配上300B後級，聽女聲果然係絕配。之後我哋轉聽吓啲大棚嘢，依個轉變出事了，300B個輸出唔夠，表現乏力，加上對Zellaton 喇叭都幾大食，所以出來効果好似隔住幅牆播歌咁，所以世界上真係冇完美，每款器材各有自家優勢，300B都係播小品女聲更為優秀。





去到呢個地步，冇理由就咁算，我哋又要求Dolby大哥幫手轉amp，對喇叭真正實力都未試清，點可以就咁收貨，於是又夾手夾腳將到喇叭線接去部YS後級，坐定定又再開聲聽，果然Zellaton對喇叭仲有有把貨，音場開揚，我之前都有試過對Plural，印象中係比較薄聲加上高音有少少”飆”，但依對Ultra個完成度非常高，三頻平均，貫徹歐洲喇叭特色，好幼細而且聲音好離箱，我估我之後有機會，我會自肥咁再約聽多次。



如是者聽吓傾吓，我同大師兄Simcity又走去研究Acoustical System Asteller唱盤，因為之前聽過兩次，（詳細可以睇返我個舊post https://www.hiendy.com/hififorum ... read&tid=147592 )

所以今次冇話特別想再試，不過望望吓我哋發現支臂原來係新款Axiom Titan，嘩～～呢個不得了，原來好物沈歸底，我哋開始目光轉移到呢個位，第一件事想知緊係個價錢，Dolby 大哥要我哋估，首先我哋由30萬開始，每次叫價加10萬，現貨氣氛已經好似去到蘇富比拍賣場咁，一直嗌價，最後去到80萬成交，跟住全場靜哂，因為個個聽到個價都O哂嘴，不過咁，買唔起都可以聽吓啩，我哋一幫人又開始起哄要轉聽呢個盤，一直吶喊叫住轉、轉、轉。




可能氣氛太激烈，連老板Edward都走出嚟大廳睇吓咩事，大老板Edward非常好人，今次親自打碟，之後仲有傾有講，仲同我哋講件件貨都可以傾，聽到呢句，即刻見到嗰兩度師兄兩眼發光，真係聽到都開心。









冇比較冇傷害從來都係黃金定律，Asteller配返自家支Axiom Titan臂加Palladian 頭果然係不一樣，我覺得呢個配搭個音効不下於Air Force Zero，Asteller盤同支Titan臂極之安定，背景靜到不得了，重播Johanna Martzy 隻100周年紀念版黑膠時，小提琴聲活潑生動，按弘、拉弓等等演奏技巧如在現場觀賞，真係聽到流晒口水，之前我都有提過，‘如果’有地方可以換盤，呢個盤會係我首選，我覺得同價應該搵唔到對手。同場估計位位都中哂毒，就睇吓幾時出手，就係咁，又過咗另一個繽紛日。

bigpun1975

Edward 緊係好人啦, 仲事事親力親為, 以為你會試埋樽蝦膏添

zelo

bigpun1975 發表於 2024-8-30 14:23
Edward 緊係好人啦, 仲事事親力親為, 以為你會試埋樽蝦膏添

蝦膏聽過好多次啦，基本上樣樣都已經試過哂，我只係上去搞事。

racewong

zelo 發表於 2024-8-30 16:29
蝦膏聽過好多次啦，基本上樣樣都已經試過哂，我只係上去搞事。

我想試條對Kondo 新RCA

alanlovedog

呢個新 Showroom 好好聲, Edward 又好人, 上星期都去聽過

racewong

alanlovedog 發表於 2024-9-3 07:14
呢個新 Showroom 好好聲, Edward 又好人, 上星期都去聽過

你都上左去聽啦？0