香港夜繽紛 - 15 本地薑大戰布歐

zelo

話說今期音技我見到有本地薑做咗封面，見到咁嘅情況當然即刻搵Angus賀吓佢，見到老朋友嘅產品可以上到權威雜誌封面，可以"拋頭露面"真係滿心歡喜，講咗唔夠三句Angus兄已經好熱情咁邀請我再上去佢個workshop聽嘢，仲話set定個靚頭等我，計起上嚟我都有兩年冇上過去，因為Angus師兄成日神龍見首不見尾，搵親我唔係喺機場等上機就飛咗去第二度，完全係一個飛機友，今次舊地重遊，都幾期待。







Angus師兄好有心，我哋約定中午到，佢就一清早開定機等我哋，你話有個咁有心嘅燒友朋友幾"滾動"，今次伙同另一位師兄一齊上去，一如以往，一行入showroom已經被對Vivid Giya G1吸引，呢對喇叭嘅外型到今時今日都仲係咁煞食，同上一次拜訪時一樣，全套機都係用返自家Westminster Labs西裝，不過今次同上次個分別係前級分為兩部單聲道，後級用上兩對bridge埋，功率可以去到400watt 8ohm、800watt 4ohm，真係咩喇叭都餵得飽，所以今次個聽感同之前一次係有分別嘅，另外對上一次我記得對布歐仲好新，加上冇今次咁重裝，（之前係單前級配一對mono），記憶中係比較硬聲及音場較窄，經過兩年嘅洗禮，喇叭已經開哂聲，加上自家產品技術有改進，再加埋Angus 師兄重新執過哂間房，樣樣嘢有改進就係大改進，所以今次真係好好聽，



聽過布歐G1嘅朋友都知道依對喇叭幾悪玩，無論擺位同驅動唔夠功力，分分鐘衰聲到九彩，Angus師兄就玩得非常好，我哋聽過哂各類音樂，真係玩得有板有眼，套amp控制力認真一流，不過我個人最欣賞係佢部phono，因為Lyra Altas唱頭個輸出係好低，個唱放大如果做得唔好，好多時連所有雜訊都放大埋，今次我哋都聽得好大聲，但就聽唔到任何底噪，我覺得個聽感有啲似我套DS Audio，另外依部phono係少數可以對應DS Audio光學唱頭嘅phono amp，真係勁揪。







我哋傾吓講吓好快咁過咗幾個鐘，跟住我又身痕四圍望吓間房，發現原來Angus師兄嘅黑膠藏碟量都幾豐富，尤其交響樂方面，不過我對交響冇大興趣，轉咗視線去睇吓佢啲廣東碟，睇睇吓我發現有啲奇怪，Angus師兄年紀細我一大截，點解啲碟9成係我以上嘅世代，仲要連家燕媽媽嘅碟都有，我自問聽歌都叫雜，估唔到山外有山…臨走之前仲送我一程，整隻王傑（故事的角色）黑膠我哋聽，搞到依家又要去撲去搵返依隻黑膠，再再之後佢仲嚟一個終極大招，播播吓黑膠無啦啦又開套MSB，依吓真係俾佢撻着…所以依啲損友都係唔好行得咁近。

三文魚腩

多謝你地帶來的牛角包。下次再來吹水。多謝你帶碟來。

zelo

三文魚腩 發表於 2024-9-23 10:13
多謝你地帶來的牛角包。下次再來吹水。多謝你帶碟來。

今次太大雨，有幾隻靚碟帶唔到過嚟，下次再去，有位Kondo友又想上你度聽歌，我已經做咗你馬伕～

racewong

三文魚腩 發表於 2024-9-23 10:13
多謝你地帶來的牛角包。下次再來吹水。多謝你帶碟來。

魚腩玩得好靚聲.

Osaka

樓主文筆一流，辭彙生動，好過九成九本地職業寫手！

zelo

Osaka 發表於 2024-9-23 14:01
樓主文筆一流，辭彙生動，好過九成九本地職業寫手！

師兄真係睇得起我，我只係純粹齋噏，依啲費文應該冇乜人會睇

三文魚腩

racewong 發表於 2024-9-23 11:44
魚腩玩得好靚聲.

你無聽過啦，間房d 聲仲有好多問題，仲有排執。

racewong

三文魚腩 發表於 2024-9-24 12:13
你無聽過啦，間房d 聲仲有好多問題，仲有排執。

你既功力唔駛聽啦.

仲記得你啱啱上HIENDY, 喺房仔玩大BW...

三文魚腩

racewong 發表於 2024-9-24 12:39
你既功力唔駛聽啦.

仲記得你啱啱上HIENDY, 喺房仔玩大BW...

那有功力。。。

Osaka

zelo 發表於 2024-9-23 20:33
師兄真係睇得起我，我只係純粹齋噏，依啲費文應該冇乜人會睇

師兄不必謙遜，我同好多網友一樣，有睇曬你寫嘅甘多篇家訪，你每次都有獨特之處，相信多數網友都睇得出你所用嘅心機！
睇左甘多年嘅音響雜誌所謂嘅專業寫手，又或者係依家所謂嘅youtubersssssss，佢地嗰種字窮，同埋無用腦寫野、講野，對所介紹器材嘅認知貧乏，
簡直好似聽緊林憶蓮名曲…''滴汗''

racewong

Osaka 發表於 2024-9-23 14:01
樓主文筆一流，辭彙生動，好過九成九本地職業寫手！

我很贊同