香港夜繽紛 - 16 約戰陷阱大師

zelo

大家見到呢對Focal Utopia EVO會即時諗起乜，女谷友？紅酒定貓？







如果咁諗應該好失望，因為今次家訪嘅係一位英偉嘅消防員，係一位真漢子，依位師兄話哂同我都算半個同行，所以特別投契。Joe師兄同我認識多年，佢都來過我度好多次，但去佢屋企我就第一次，事關佢真係好鬼難約，不過得知Joe師兄半年前換咗Focal呢對新喇叭，計吓計吓依家約佢應該啱哂時候，所以前排又嚟追魂Call，終於又俾我約到。CH我都聽過N次，但用成套CH推Focal我真係未聽過，加上自骨灰級代理信X冇做之後我都冇再聽過Focal喇叭，所以今次算係白紙一張，係有少少期待。

一入屋已經見到對Utopia EVO大大對放正廳中間，離牆位置十足，夠哂位俾對喇叭呼吸，套機可以有咁大空間放置真係睇見都流口水。另外我覺得Joe師兄應該係有集郵嗜好，初初識佢嗰時佢仲有用緊其他牌子器材，我見佢近年來套機啲CH係一部一部換入，好似集郵咁集到依家成套西裝，依家睇見成套CH一字排開真係非常醒神。



有嘢聽我緊係即刻覇個皇帝位坐，聽咗一陣，我發覺啲聲好似有啲壓縮，高音有啲緊，因為我對Focal喇叭唔太熟悉，心諗莫非係呢對喇叭特性？按捺不住之下問吓Joe師兄，原來佢近期試緊將喇叭個高音Jumper set高一段，即係加咗1dB，Joe師兄果然有備而戰，倒返轉考我，好彩我都識啲嘢冇俾佢拋窒，轉返default 後高中即刻正常番，咁依個setting係咪多舊魚？又唔係喎，我試過聽另一隻Jake Shimabukuro - Live in Japan 嘅ukulele演奏碟，set高一段音色係清脆好多，我覺得好聽過default setting，所以係可以按你聽嘅音樂種類去迎合口味，真係玩味十足。跟住又聽多陣，發現個低頻收得有啲快，於是又問吓Joe師兄部後級damping 有冇調過，果然Joe師兄又出個難題俾我，佢又講近排又係試緊加大咗個damping嚟玩，我又被考完第二道試題，之後又調返去default 聽多陣，換咗另一隻The Stimulators unplugged去聽，今次又聽到個音場同定位好似有啲窄，Joe師兄聽到我咁講又嘴角上揚，原來平時如果屋企冇人佢聽歌係會將對喇叭左右移多兩吋左右，佢老大哥即席表演大力騷，消防員果然力量澎湃，話咁快就移好位，我呢啲老人家真係冇地自容，



一如所料，音場即刻濶咗成個碼，定位亦精準好多，Joe師兄真係佈滿陷阱，差少少功力都俾佢考起，如是者又聽多幾首歌，我都係覺得尾音收得太快，Joe師兄聽到又嚟料，佢快手將原本駁phono amp對Valhalla 2接線換上，結果緊係正到無倫，我一直都覺得歐洲喇叭重播樂器係有一手，今次仲要配埋成套CH，配搭需然比較少見，但就好夾機，成套機好平衡，聲音自然兼有速度感，收貨有餘。



過哂咁多關，終於可以有安樂茶飯食，同Joe師兄傾吓講吓，原來佢仲有好多大計，我都好認同佢所講嘅大計，因為依家套機應該未餵得飽對喇叭，我個人覺得仲可以推高啲，以Joe師兄實力，應該好快實現到，下次再嚟應該會係另一番景象。

racewong

我會諗起女谷友

zelo

racewong 發表於 2024-10-13 19:17
我會諗起女谷友

racewong

zelo 發表於 2024-10-13 19:36

還有黑絲與小猫

bigpun1975

佢識聽識搞真係好野喎

Simcity

正喎

racewong

Simcity 發表於 2024-11-17 13:51
正喎

大師兄快D燒番音響啦.