薪火相傳系列 - 落毒101

zelo

話說前排我個細侄女話要上我度聽吓歌，教曉咗佢對實體音樂嘅好處同基本嘅音響知識，佢開始對實體音樂有認知，近排仲同班同學仔去買黑膠碟，我諗都係時間俾多少少力推佢一把。



但後生細女要佢做前期投資確實係有啲吃力，我忽然記起我仲有一個舊盤多咗出嚟，係以前用開嗰台Clearaudio Concept MC，另外仲有台Chord Huei phono amp，線材又有多可以送埋俾佢用，一套黑膠系統勉勉強強都可以湊成，所以立即行動落去倉庫摷返個盤出嚟，諗住拆開包裝先試試，晴天霹靂…發現個支臂出現問題，支臂我記得係用磁浮加懸掛固定，依家支臂條wire應該斷咗，所以支臂已經唔郁得，依家都唔知搵度有得整。





正考慮整唔整之際，我又同細侄女傾吓，點知佢話整返好佢都冇位放啦，個盤太大個咁…加上套機對佢依啲新手始終太複雜等等…心諗一層又係喎，需然個盤唔使點set，但左一舊右一舊對新手來講確係麻煩，之不過咁，放毒對我來講只係小菜一碟，我緊有辦法要你入坑，地方唔夠？冇問題，我就搵個又易玩又潮款嘅Sound Burger俾你，仲有埋顏色你揀，即食之餘仲可以接藍芽喇叭。



後生女即係後生女，見到又cute又易用又有design嘅嘢係冇免疫能力嘅，我俾佢選好顏色即刻入咗一部返嚟。



但有佳餚冇美酒點成事，我知佢近排愛上Sabrina Carpenter同Olivia Rodrigo，就入埋俾佢當前菜，主菜係佢想買好耐嗰隻 One Piece Red，依隻碟我仲要喺日拍bid返來，貴到嘔但我都忍痛送埋俾佢，甜品就加隻"事後煙"隻新碟作為最後一道菜，一套過當提前送個生日禮物俾佢，我依個伯父都算唔話得，可以一條龍服務，不過我細佬同弟婦之後應該開始頭痛。

racewong

做得好!
毒得好!

我都想攪番D 優惠, 比更多人接觸黑膠.

你手上有無D 平時唔聽, 可以送比人既黑膠? 我想夾埋幾個網友, 儲一批黑膠, 有新手玩黑膠就可以免費送給他們.

你覺得有無得攪?

zelo

我覺得新手玩黑膠係硬件配置、價錢同地方問題大過軟件，我見好多年青人買碟真係冇手軟，好多新手一出手就入好多碟，反而我覺得代理應係做多啲新手套餐，唔好搞到咁複雜，降低門檻先正路。