香港夜繽紛 - 17 75萬級別後級嘅誘惑

zelo

前晚参加咗俱樂部個Audio Reserarch 330M試聽會，同朋友食過快飯就‘貢’上去10樓，一如既往坐滿多位師兄，打過招呼後，我都唔執輸快快手覇返個靚位坐低。入到去見到部ARC REF10前級喺架頂，旁邊就有部Antipodes Oladra Streamer，對主角ARC330M就放喺架下層，睇個格局都知道全晚播串流，需則唔係我杯茶，不過呢個配搭又幾新鮮，又聽吓咩料先，未開始前已經播住隻X Japan暖場，細細聲播住又幾好聽喎。



坐定定聽吓歌順便再睇清楚個格局，發現原來有Edison部新Fiber Box III用住，我又係未聽過，計吓計吓今晚有幾樣新嘢可以試，認真化算。到正式開始槍王播咗幾段歌，有人聲、有古典，我個人覺得播人聲比較到肉，音質上較豐滿同襟聽啲，播Heart Break首曲目時我就覺得好似冇咁放，感覺上成個畫面縮咗一個碼，略嫌尾音收得太快，唔夠過癮。部ARC330M需屬膽機，但聽個表現一啲都唔似，以當晚個聽感，速度快、力量夠，比較直白但收得亦快，當晚成套機如果只係聽rock/pop就交足功課，爆到七彩都冇問題，夠哂過癮。







到中段槍王兄又玩吓AB，首先佢試吓甩咗部Fiber Box III，我起初以為分別唔會太大，但結果係甩咗之後完全唔聽得，無論背景同分析力都差到一個點，部Fiber Box III係有料到，Edison師兄功力深厚，果然係香港HiFi界之光，但倒轉諗，唔用Fiber Box II點可以差成咁⋯⋯部Oladra價值成20個，個定價極之進取，如果係咁嘅表現都幾大件事，不過CAS就係咁，一環扣一環，中間有少少嘢都好影響成個系統，以部機個表現，學安大厨咁講，"我會保留"。



另一個AB測試係將ARC Ref 10前級個零震台熄咗做比較，結果當然係一面倒，部零震台一熄已經音色變暗，用咗真係返唔到轉頭，聽多一陣，有大半個party移師入房聽對Magico A5，我就趁有機會同其他谷友吹吓水兼交流吓，通常依啲聚會，一聽完就田雞過河，好少會有機會同其他師兄傾吓偈，今次就認真唔錯，多咗依啲時間。

總括來講，套Audio Research係堅嘅，不過……套後級個定價真係非一般人可以承擔，叫價要75萬，連埋前級定價百萬，真係嚇死寶寶，不過如果你對品牌好有愛，以套機表現，又無理由唔去馬。以表現計我個人覺得部前級REF 10非常好，夾160M後級都夠玩。不過我個人就pass啦，依個價我會有其他選擇，結論係當晚我覺得部Fiber Box III為主要功臣，極之搶鏡，成功由茄喱啡登上主角之位。

Simcity

Zelo 大師兄，簡直係鬼才，冇人能及🙏🙏🙏

hksarac

>>>部Oladra價值成20個
現時的音響器材是分你身家

zelo

hksarac 發表於 2024-10-28 07:56
>>>部Oladra價值成20個
現時的音響器材是分你身家

賣埋血都唔夠錢買

bigpun1975

上次音展响板間房夾Discovery 已經不得了

zelo

Simcity 發表於 2024-10-27 17:59
Zelo 大師兄，簡直係鬼才，冇人能及🙏🙏🙏

大師兄講笑咩～我啲費文唔入流架，有鬼人睇

ieskn96

zelo 發表於 2024-10-31 17:15
大師兄講笑咩～我啲費文唔入流架，有鬼人睇

zelo 師兄『萬萬不可』自謙！閣下的文章「妙筆生花，雅俗共賞」，能夠時常引用周星馳的「經典電影金句」已經可見一斑，實在好睇過頗多音響雜誌的專業寫手！您的精彩文章形容貼切、深入到題、分析精闢、引人入勝，除咗一樣係屬於『例外』……