香港夜繽紛 - 20 紅牆學院

zelo

網上好多自稱師傅或者滿口理論嘅所謂專家真係見唔少，我相信大部分根本連部器材真身見都未見過，睇相就可以出到評論，總之就總有一隻喺左近，今次我去家訪依位前輩，佢就真係又有實力又有技術，大家見到幅大紅牆都應該知道係邊位，李sir基本上係逢騷必到，我同佢都見過面好多次，只不過每次完騷都係田雞過河，冇機會交流，直至最近我膽粗粗走去李sir面前直接問可唔可以家訪先有機會去學吓嘢，之後交互電話就等通知。直至上個禮拜李sir突然發個短訊過嚟，‘今個禮拜過嚟聽歌，屋企冇人可以爆機‘。內容簡單直接，完全係卧底feel，真係刺激。



一入大門已經見到一大對Tidal Contriva G2，三件頭Tidal Camira LC解碼連前級，後級用上一對impulse LPX mono，李sir主玩digital source ，佢主要分開兩組，分別係CAS嘅Edicreation Bach music server去Camira LC，同埋SACD、CD做source 嘅 Esoteric K-1 ，未坐定李sir 已經嚟隻絳州大鼓，估唔到Contriva外型斯斯文文，原來好爆得，鼓聲澎湃，速度快之餘亦好有彈跳力，尤其聽牛鬥虎尾段，鼓棍搞聲粒粒清脆，分析力認真夠強。之後又聽隻鬼爪，Accuton鑽石高音係有佢優點，雖然鑽石高音從來唔係我杯茶，但重播弦樂我個人覺得係優勝，今次播小提琴認真一絕，高頻延伸極強，尾音亦不失禮，跟之前播大鼓嘅表現完全唔同，音色斯文細緻，所以我一直認為歐洲喇叭重播古典、樂器係有一手。







講開Tidal喇叭，相信大部分人都覺得佢哋個低頻比較遜色，我聽完隻絳州大鼓後，覺得個低音一啲都唔差，所以我要試盡佢，播返隻Way Down Deep再試真功夫，一開聲個低音已經打心口，一路聽落去，連張梳化都感到震，點解可以有咁靚低音？點解嘅？點解嘅？好犀利呀！



答案好簡單，係部分人對個產品認識唔夠，唔係個牌子唔惦，只可以講係你個人功力唔夠。李sir玩對Contriva玩到極致，低音部份用咗LPX後級個電子分音，高中仍然用喇叭分音，喇叭線亦分開兩組，一組用Schnerzinger REF-3000 負責高中、另一組Schnerzinger REF-2000 負責低音，所以低音單元供應充足，自然力量雄厚，果然Tidal喇叭配返自家amp先係正路玩法。



今次家訪確實獲益良多，李sir教曉好多小知識，例如簡單嘅擺位方法、舒曼波嘅應用、接頭清潔嘅重要性等，有時呢啲細微嘅工作，成効可以等同換機，所以李sir家中幅紅牆對我來講尤如一間學院，獲益良多。

racewong

李SIR屋企係TIDAL既示範房.

jjtiger

Zelo師兄啲文采真係正，圖片就更加冇得頂
你話點可以唔加佢滿分

bigpun1975

文筆生動, 言之有物

Benny213

支持夜繽紛

zelo

墨水用盡啦，寫多兩三篇應該可以收檔～

bigpun1975

zelo 發表於 2024-11-12 20:46
墨水用盡啦，寫多兩三篇應該可以收檔～

怎麼可能