香港夜繽紛 - 23 有今生無來世嘅JBL系統

zelo

喺香港有番咁上下資暦嘅燒友，只要一提起JBL喇叭，基本上都好自然諗起一位重量級前輩，可以玩JBL喇叭玩到有銜頭，相信只有佢一位JB 黎大哥，黎sir套器材同地方我睇相就睇得多，但發夢都估唔到可以親身見識，情況就如我依啲宇宙星麈永遠去入唔到地球個大氣層一樣，今次可以成功約到家訪，真係多得Simcity大師兄安排，佢老人家近排心情靚，叫佢約邊個都有求必應，各位好趁住機會。






一入到大屋行落樓梯已經見到成套機放置喺大廳，對JBL DD67000真係相當巨型，淨係對喇叭已經霸咗三分一位置，後面一對Wilson Audio Thor's Hammer超低音仲勁，足足成個人咁高，淨係睇見依兩對喇叭已經夠晒殺食，中間堆器材當堂變得唔起眼，不過唔好以為唔起眼就冇料到，Kalista Dreamplay System、一台FM 268C前級、一對FM 411 MK III 後級、一台 FM 333分音器、一對Crown 後級，認真唔嘢少。成套系統行三路分音，FM 333將中、高音同低音分成兩路，一路去一台FM 411 MK III後級再分別出俾DD67000嘅中高部份，另一路去第二台FM 411 MK III後級再分去喇叭低音部份，因為DD67000個靈敏度有96dB，所以唔行mono都夠哂力推，第三路就由一對Crown後級再去一對Thor's Hammer超低。















欣賞完器材我當然唔客氣，即刻坐定定喺個皇帝位等聽歌，唔好以為咁大對喇叭坐邊個位都冇所謂，Horn喇叭完全係一個自肥系統，基本上只有皇帝位可以聽得，本來我想一開機就聽隻Guns N' Roses爆一爆，但俾同行大師兄㩒住，佢老人家話要慢慢開始聽吓人聲先，好！我忍…頭幾首慢版嘢我覺得不過不失，不過我個人覺得JBL聽小品人聲唔夠過癮，略嫌口型太大、比較埋身同較多沙石，warm up咗幾首歌卒之可以換碟，Guns N' Roses首"Knockin' On Heaven's Door"我N年前喺日本某音響店聽過，當時又係用JBL播，但到今日我都仲好有印象，因為真係非常好聽，所以今次我係超期待嘅，一開聲…果然…我直頭感動到想喊，超越係正常，但冇想像過可以好咁多，我搵唔到有咩可以挑剔，今次完全可以將我個舊記憶覆蓋。






聽完依首歌基本上我已經好滿足，就同黎sir學嘢，我見兩大對Thor' Hammer超低完全冇相位唔準呢個問題，所以就請教黎sir有乜竅門，咁大對低音喇叭要移位去教相位應該冇乜可能，原來黎sir係用Wilson Controller慢慢調，剩係對啱相位呢個部份佢話已經用上5年時間先調整好，所以話要花幾多心血先可以去到咁極致，依對超低個價值係DD67000幾倍，值唔值得就見仁見智，我就覺得効果對得住價格，因為對低音已經彌補DD67000嘅不足，令到全頻更豐富，依家中低靚到不得了。



傾咗一陣我又開始四圍望，記憶中黎sir係有台Clearaudio Statement鑽油台，原來成個盤隔咗幅牆放咗喺偏廳，依幅牆係黎sir另外搭建，就係為咗音壓唔好影響成個盤，黎sir可能見到我雙眼發光，就主動放膠俾我哋聽，Statement加Goldfinger頭就係堅，雖然Kalista Dreamplay係強，但面對Statement都要跪低，黎sir播咗幾段龬琴同六眼仔Take Five，鋼琴部份我唔熟，不過大師兄就讃不絕口，但Take Five我就超投入，音場、現場感、定位無可挑剔，呢個Take Five係我聽過咁多系統最好聽嘅一次。



黎sir呢套系統絕對係教科書級別，淨係睇個喇叭擺位同超低調教都有排學，都係嗰句，聽好嘢時間特別快過，今次更加唔例外，由於黎sir仲要第朝要早飛，玩到咁夜我都唔好意思，真係非常感激黎sir招呼，期待再有機會跟黎sir學習。

racewong

JB黎真係好勁, 連個朵都叫JB.

即係成世只可以玩JB...

zelo

racewong 發表於 2024-12-5 14:21
JB黎真係好勁, 連個朵都叫JB.

即係成世只可以玩JB...

你都可以叫自己YG 槍或者南瓜槍

racewong

zelo 發表於 2024-12-5 20:48
你都可以叫自己YG 槍或者南瓜槍

依D野真係講唔埋..