香港夜繽紛 - 24 加洲有對雙子塔

zelo

前日大師安排到Ba爺家訪，有咁嘅機會我當然唔執輸，請半日假被扣人工都要報名，約好上水站等，唔知係咪我服式太融入，出站我發覺成個水貨佬咁，已經有幾位過來打眼色，正當心亂之際，人叢中見到一位身形比較熟悉嘅人向我招手，原來大師已經喺度等緊，佢同我講定啲嚟，因為Ba爺好有心，專門開車到車站接我哋，話口未完，有位風度翩翩嘅型仔開住部車嚟接我哋。





到埗後一入屋已經被嚇窒，對Kharma大啞呤極之吸睛，依對咁大型喇叭喺showroom、音展就見得多，但家訪見到真身就真係第一次，對喇叭真係好巨型，成對雙子塔入屋咁，不過Ba爺個廳夠哂大，樓頂又夠高，所以完全冇唔協調感覺。器材方面，今次主要以CD機為主，一台Goldmund Eidos Reference、旁邊仲有另一組Kalista Dreamplay system，兩套音色唔同取向嘅音源，Ba爺可以左右逢源，你話有錢幾幸福。旁邊仲有一座Clearaudio Statement鑽油台，不過仲係荒廢中，需然齊件但仲未安裝好，據悉應該要到明年清明後先有得聽，大家想快啲有得聽可以一齊嗌Ba 爺加油！前後級用上音樂大師，後級型號係1841，據悉呢對後級極之大食，Ba爺已經處理緊換新MCB再獨立電供俾呢對怪獸。







睇完器材當然坐定定聽歌，剛開始先用Goldmund Eidos播首Classic大棚嘢，Goldmund Eidos分析力確係強勁，大啞呤亦都表現突出，大型喇叭就係大型喇叭，成個歌廳個場面表現哂出嚟，臨場感一流，第一首歌已經聽到我目定口呆，不過聽完呢一首歌之後，我哋建議不如用Kalista Dreamplay再播多次，再播發現個効果完全唔同，成個場面係縮咗少少，但聲音就自然流𣈱好多，相較Goldmund係比較硬橋硬馬，衝擊力比較強，我個人較喜歡Kalista Dreamplay個表現，需然場面係縮咗少少，但聲音比較有韻味同更加幼細，之後大家都同意一直用住Kalista Dreamplay去聽。

Kharma喇叭我只鍾情Exquisite 系列，不過極其量我只係聽過Classique，正式聽Grand級別嘅今次係第一次，呢對喇叭認真唔講得笑，當日播乜都好聽，爆得就唔使講，弱音細位全部都交足功課，尤其播炎黃第一鼓時，真係震到骨都散，另外個鑽石高音極之煞食，真係仙音處處，加埋個外型同造工到今日仲係非常高貴，對喇叭打得兼睇得，簡直無敵。



值得一提係套1841後級，可以將咁大對喇叭搞到貼貼服服，控制力相當唔錯，我嘗試摸吓部機，溫度又唔太高，依對後級好有効率。





另外有樣嘢不得不配服Ba爺，佢全套機係冇用到任何輔件，個廳樓底咁高，天花板都冇加任何調音工具，全個廳只係前後加上吸音板，成個廳居然係冇任何回音同太明顯駐波，Ba爺調音確有一手。另外我有理由相信佢家中隻愛犬Mocha有好顯著嘅吸音効果，坐低聽歌時佢係會陪住你左右，毛茸茸又夠大隻，點都幫到手，不過當日佢太迷戀大師，估計係佢當日服飾同狗狗太相似加上佢午餐食過蔥油豬排飯關係，隻狗對眼望住佢係有兩個心心嘅。
我就已經mark定位等Ba爺set好個黑膠盤，下次再同Ba爺學嘢。