香港夜繽紛 - 25 再度重遇你

zelo

對上一次上Thomas大哥度應該個幾月前，因為佢大哥搬完冇耐，我估計大哥應該需要多少少時間做調整，諗住過埋個聖誕先再約佢，點知早兩晚Simcity大師兄突然打俾我，佢同我講當日原本上Thomas 大哥度只係想傾吓偈，點知俾佢發現Thomas大哥套機突然極之好聲，佢話個TDC-01 Dia 唱頭應該開咗聲，叫我第二日再上去聽吓，仲講話佢都想即刻買返個，基于大師兄好少會咁踴躍，所以點都要攝時間出嚟，當晚就同Thomas大哥約好，到前晚我就單拖先上去，每次上去我都會帶定酒水，今次都唔例外，點知一入去Thomas大哥就話要開支Sparking Wine，真係一嘢俾佢大走，我話三條友點飲成支…佢已經費事睬我，擺好酒杯開埋酒。



今次再到新地點感覺好唔同，有部份器材位置移過位，四邊牆亦都加咗吸音板，已經解決搬入初期嘅回音問題，之前又加埋世紀電箱，電方面亦都好穩定，所以今次入到去，感覺係比之前完善。



觀察完又坐定定嘆住酒聽歌，今日主打係TDC-01 Dia唱頭，所以隻改良版Grand Master EX唱頭返咗嚟都要讓一讓路。隻TDC-01 Dia唱頭我聽過數次，不過印象唔係太深刻，對我來講只係一隻好普通質素唱頭，冇乜特別個性，今次連大師兄都勁讃係有少少期待，



Thomas大哥一嚟就整首”關淑怡-心急”俾我聽，咦！？好有音樂感，每粒音都好有彈跳力，全頻好平均又冇偏聲，我覺得個聲底依家有少少似DS Audio，不過厚聲少少，分析力都唔弱，究竟Thomas大哥落咗咩魔法，今次所有嘢都比之前提升好多，當我正在考量之際，有人又搞門，原來Simcity大師兄同佢位千金到訪。



難得有小朋友想聽歌，Thomas大哥都唔知幾happy ，更難得係小朋友要聽廣東歌，開正Thomas大哥嗰瓣，如是者又陳慧嫻、張國榮、林子祥
等等，最後連帝女花都聽埋，我見Thomas大哥係咁搵碟，我都忍唔住幫幫手，好在以前喺K場做過吓打碟，叫做幫得吓手。





正當大家一路聽我就一路細睇套機，我發現對M7喇叭下面有舊銀色物體，走埋去睇睇原來加咗Stillpoint ultra 5墊，Thomas 師兄解釋M Pod令到結像比較鬆散，前面部份加咗Stillpoint ultra 5有助音色變得較為實淨，唔怪之得今次個聲有唔同，其實計計數，除咗個唱頭、唱臂好聲咗，今次有好多因素令成套系統優化，好似個世紀電箱、所有新舖電線、空間處理等，每樣好少少已經係大進步，



我其實都唔太清楚邊個位拉高成套機，個唱頭係堅嘅，相信run in咗一排點都會有進步。反正而家就係最好聲，之前上過去嘅，都應該抹走所有舊記憶，再上Thomas大哥度聽多次。

racewong

咁你鐘意DS 或是TECHDAS先?

zelo

racewong 發表於 2024-12-16 11:12
咁你鐘意DS 或是TECHDAS先?

空軍我只愛零號同一號

racewong

zelo 發表於 2024-12-16 11:16
空軍我只愛零號同一號

空軍我只愛一號...