黑膠真是好難玩嗎？

percyleo

黑膠真是好難玩嗎(上)？

剛睇完上星期鎗王開live，今集主題係有關黑膠這令我想起玩黑膠的一些事……在玩黑膠路上總會腦中想到一個問題……黑膠真的好難玩嗎？那就跟大家分享一下我自己嘅經驗！

記得當年我所購買第一個黑膠盤是一個日本品牌嘅入門盤，該唱盤沒有唱臂調教亦已安裝好唱頭係最簡單嘅plug & play 唱盤，但我亦玩得非常開心！其實那時候我聽黑膠並非因為它靚聲而是它嘅價錢比CD平好多又有海報送，而好多時我亦會先買黑膠聽咗好聽後才買CD。至於唱頭唱臂調教我當然唔識啦而且我最初用嘅唱盤都是只須插上電源及駁上訊號線已可出聲，雖然隨後我換咗幾個唱盤但我亦對調教之事一概不曉，最叻也只是換粒唱頭！當然換完調教到落到針出到聲已覺得自己好勁！！亦因如此播出嚟嘅聲點會好吖！我既唔識又唔明硬係張張碟去到內圈嗰首歌成日播到拆聲！而好多時歌曲編排最好聽嘅歌常排在最内圈……激死！！那年頭沒有互聯網，去Hi-Fi 舖請教吓…… 答案不外乎你升級唱頭或者升級唱盤啦！而身邊玩Hi-Fi 嘅朋友全都已轉聽CD，任何有關調教唱盤嘅學問及技術無從得知，總之支唱針落到碟有聲出就此罷了。就是咁我亦開始買CD多過買唱片，聽CD多過聽黑膠！這個時候我真的覺得黑膠好難玩，唱針嗰舊塵又成粒鼻屎咁大！反之聽CD既方便又唔會拆聲炒豆聲！最終個黑膠盤亦因此封塵打入冷宮。！！！待續……

percyleo

黑膠真是好難玩嗎(中~JR Transrotor篇)？

……續上

雖然冇再聽黑膠，但那些年(至少超過15年)我見到封面靚及喜歡嘅歌手我都會買埋張膠作珍藏。直至舊年萌生想聽返黑膠嘅念頭，於是就資料搜集及四圍問吓意見結果我以樣行先買咗一個靚到飛起嘅名盤JR Transrotor ，呢個唱盤靚到好似Daum同Lalique嘅水晶擺設一樣，放喺度成件藝術品咁！

今次為咗更了解玩黑膠盤嘅奧妙及樂趣，我決定自己組裝！於慢工出細貨大前題下我用咗兩日時間組裝，這不但令我更加了解該盤每個細節更好讓日後遇到什麼困難也能解決！當刻心裡還想像日後升級MC頭升壓牛等等……滿腦幻想充滿歡欣畫面！但世事那有這麼順利完美！！令人失意嘅事情只是開始！！！首先安裝唱頭，我嘅經驗只有年青時求其裝上嘅經驗！雖然事前上網做晒調教唱頭功課及準備充足工具調教，但永遠知易行難！而最要命係我調節唱頭時竟然手震加上老花，就算戴上老花鏡手震問題絕對影響我set唱頭個G點(null point)，成件事頓時由充滿憧憬變得意志消沉！

搞下抖下結果用咗唔知幾多個鐘所謂完成！最後再檢查清楚所有線材已安穩駁上，開聲！去到呢度相信大家也會明白亦有經驗清楚那份期盼有多大，心情有多緊張！！…………結果…………我又再次失落…………點解啲聲又薄又冇味道……但其實只是唱頭，唱臂，唱臂線及擴音唱放都是新係要時間run-in，播咗幾日開始有進步但仍跟心中所想仍有距離！咁又上網睇吓問吓……原來要加外置唱頭放大器。輾輾轉轉我最終也揾到合適又滿意嘅唱放！呢一part其實只是用點錢就解決到嘅問題！但用錢解決唔到始終係自身問題~~經驗與技術！

其後我分享過一段梅艷芳"一個字"錄影，有犀利嘅谷友一聽便告之轉速好似快咗，我即時問號！？我用手機apps一check……快咗，於是將個摩打移吓位但數值仍不變。救命！我只想享受吓我嘅珍藏啫！於是又再週圍問診上吓網揾料，原來加個PSU就可控速調速！事情本來又是使點錢可解決……

一天我發現唱頭盒有兩個膠圈，一問之下原來我裝唱頭時裝漏！再問之下，有說有影響有說冇影響！咁點呀！！！？？？裝定唔裝返呀？好不容易才set好唱頭咋！我腦中開始兩把聲：裝，不裝……就咁鬥爭咗幾日，一於裝！咁咪出事囉……無論點努力都好似越搞越衰聲………………救命，黑膠真是好難玩！以我嘅幼兒班嘅功力係完全搞唔掂！！！

……待續…………

percyleo

黑膠真的好難玩嗎？(下~SME Model 6篇)

……續中

在多番努力下，總算set返好個唱頭！頓時覺得自己升咗level ！咁下一步就是為個唱盤加個變速牛去微調轉速讓速度更精確，因原摩打係沒得調速只能在pulley 轉換皮帶位置切換轉速，但轉速係冇法微調因此就算有出入也沒辨法改變，而品牌係有變速牛作option 去upgrade此功能。於是乎當然上網左睇右睇揾資料，玩Hi-Fi左睇右睇就真是最易出事最易移情别戀。

睇吓睇吓又去咗what Hi-Fi ，以前喺英國玩Hi-Fi 我必參考what hifi天書每期出刊必捧場，咁又入去search 吓！睇吓睇吓就睇到SME MODEL 6呢個盤，佢第一下吸引我係佢支tonearm 個anti-skating 秤砣，第二係佢嘅精準嘅轉速調教。雖然佢外表並不吸引我，但該兩點已不自覺地留在腦海。咁我之後仍繼續参考JR嘅upgrade options ，直至有日見鎗王出post介紹此盤我又再次留意她，並直接搜尋有關該盤的reviews。及後得知Hiendy 舉行分享會我好想報名但理智控制住自己， 我始終個JR盤買咗冇耐唔好諗啦！事情本來已告一段落，但過咗幾天FB出咗分享會條片，雖然內容同我睇世界各地嘅reviews 大致相同但真人演說比文字更具吸引性！那後我開始覺得佢平凡嘅外表更具吸引！可以這麼說，JR 就像Bentley 開蓬配上Mansory body kits 那種高貴兼帶有霸氣嘅外表，而SME 就像Dodge SRT Demon全車啞黑碳纖車身及軚軨；再tinted黑所有玻璃，嗰種神秘而隱藏嘅魔力確實慢慢地侵蝕我嘅靈魂 。隨後見 Hiendy forum 有end-user 出post玩此盤，那我請求師兄影多幾張沙龍供參考，那刻真的動情！ 加上當時更見其他group也有用家用此盤。那種心癢感覺很難制止，考慮及參考reviews不停不停重覆掙扎！最終喺鎗王推波助瀾及一個極誘惑嘅offer下我就決定升級！

喺我之前睇嘅咁多reviews中，此盤有一大賣點而且很重要(對我來說)就是廠方出廠時已裝好唱臂於盤上，用家只須放置好唱盤裝上皮帶，轉盤及唱頭並調教唱重及唱臂水平就大功告成。有咗之前JR嘅組裝經驗，我直頭覺得自己好似專家般半小時左右已完成裝妥！那種成功感係難以形容……我也刻不容緩即刻播碟，一開聲那種音樂感完全將我全身包圍我當刻係極感動！黑膠嘅魅力今日終於喺自己家中親耳感受，而且每張每張碟都能完全毫無瑕疵地演譯出嚟！SME嘅工程師確實為用家解決設定調教上一大難題及煩惱！

我最怕係調教唱頭但由於佢唱殼安裝唱頭係固定螺絲位係冇得微調，安裝唱頭後只須用跟機嘅alignment protractor (只是張咭紙，第一眼真是o咀真是簡單到咁) 對好位置已完成設定！廠方就是想用家覺得簡單到咁，播乜碟都冇須擔心調教上失誤導致失真，乜碟都能完美演繹！呢吓真心正，亦因如此冇咗安裝微調唱頭上煩惱，我亦放膽喺隨後日子為她增添升壓牛及升級唱頭令她更錦上添花！而跟機嘅唱片鎮配合塊碟片喺可以有效對付魷魚碟，它能將魷魚碟壓得平坦一點不致唱頭好似揸快艇咁！ 不經不覺個盤已運行咗差不多一年而佢於轉速上嘅精準絲毫沒有改變！而另一好玩之處係佢個power control unit 對不同嘅電源線相當敏感，不同線材不同表現！有趣！！

或許此盤對advanced 用家可能少咗樂趣，但在我嘅程度而言絕對係福音！簡單地改變吓唱重，防滑數值已大大滿足！就算手揗脚震也輕易裝上唱頭不用花上腦力；視力；定力去搞個null points。我現在只是須要坐定定同我七隻🐩🐩老婆欣賞自己多年珍藏，閒時兩公婆睇碟買碟洗碟！玩黑膠其實都唔係咁難啫！

……多謝收看

banjo

支持精彩文章. 有時間玩黑膠, 的確係一種樂趣, 起碼出嚟嘅聲音, 係值得放咁多心機落去.

frankyching

我覺得玩黑膠最難嘅係搵碟。

percyleo

banjo 發表於 2024-12-28 09:37
支持精彩文章. 有時間玩黑膠, 的確係一種樂趣, 起碼出嚟嘅聲音, 係值得放咁多心機落去. ...

最正嘅時刻係剛砌好成個盤嗰一刻，心情嘅興奮又期待！

percyleo

frankyching 發表於 2024-12-28 09:59
我覺得玩黑膠最難嘅係搵碟。

揾唔到舊版有時復刻也冇所謂只要別AB比較🤣🤣🤣

frankyching

percyleo 發表於 2024-12-28 10:44
揾唔到舊版有時復刻也冇所謂只要別AB比較🤣🤣🤣

唔好AB比較，你呢個諗法的確係少好多煩惱。

percyleo

frankyching 發表於 2024-12-28 10:48
唔好AB比較，你呢個諗法的確係少好多煩惱。

我試過，新版即永久打入冷宮或裱起佢做裝飾但儲碟另計。

frankyching

percyleo 發表於 2024-12-28 11:06
我試過，新版即永久打入冷宮或裱起佢做裝飾但儲碟另計。

其實買個盤好易，但我一直都冇做，就係覺得搵好嘅碟好難，唔係就咁搵隻黑膠咁簡單。玩黑膠為咩？就係想有舊嘅味道同模擬味，唔想有數碼同現代科技嘅味，所以玩黑膠我覺得都係難。

racewong

frankyching 發表於 2024-12-28 09:59
我覺得玩黑膠最難嘅係搵碟。

最開心係搵碟啦

racewong

frankyching 發表於 2024-12-28 11:27
其實買個盤好易，但我一直都冇做，就係覺得搵好嘅碟好難，唔係就咁搵隻黑膠咁簡單。玩黑膠為咩？就係想有 ...

唔係呀, 依家少左大陸炒家, 黑膠唔係太貴. 值得玩呀

frankyching

racewong 發表於 2024-12-28 11:27
最開心係搵碟啦

唉也，我就啱啱調返轉。

racewong

frankyching 發表於 2024-12-28 11:29
唉也，我就啱啱調返轉。

在香港搵黑膠唔好玩.

最好玩係和朋友一齊去日本尋寶. 真係好開心呀

frankyching

racewong 發表於 2024-12-28 11:30
在香港搵黑膠唔好玩.

最好玩係和朋友一齊去日本尋寶. 真係好開心呀

可以咁做就緊係好啦。

racewong

frankyching 發表於 2024-12-28 11:37
可以咁做就緊係好啦。

同老婆去日本, 都可以請假兩天, 去SHOPPING...好爽.

percyleo

racewong 發表於 2024-12-28 11:27
最開心係搵碟啦

最開心係買碟，洗碟！跟著好多時冇時間聽就忘記咗

percyleo

frankyching 發表於 2024-12-28 11:27
其實買個盤好易，但我一直都冇做，就係覺得搵好嘅碟好難，唔係就咁搵隻黑膠咁簡單。玩黑膠為咩？就係想有 ...

其實舊碟花些時間上網定揾到

percyleo

frankyching 發表於 2024-12-28 11:27
其實買個盤好易，但我一直都冇做，就係覺得搵好嘅碟好難，唔係就咁搵隻黑膠咁簡單。玩黑膠為咩？就係想有 ...

當你買咗個盤啲碟自自然然就會出現

percyleo

racewong 發表於 2024-12-28 12:39
同老婆去日本, 都可以請假兩天, 去SHOPPING...好爽.

我同老婆喺香港買碟也好開心