香港夜繽紛 - 27 毒自去升級

zelo

最理想嘅拜年活動係乜，緊係有嘢聽有嘢玩先過癮，年前Kin師兄已經約定一班老友初四上佢度，所以嗰日我都唔客氣一早去踩場，咁緊張上去做乜？今次係出師有名，我係要去學嘢，Kin師兄對REW軟件非常熟練，我呢啲不學無術嘅二打六當然要拜師學藝，另外一樣就係Kin師兄套機由半年前開始已經大換血，升級速度拍得住Solo Leveling個主角成振宇，因為Kin師兄已經換走太多嘢，所以今次已經可以當係新機咁聽。





一入到屋見到基本器材仲係一樣，不過擺位完全唔同哂，公整好多，對Wilson Alexia亦都重新擺過位，大件器材冇變但配件就添置多咗好多，逐件玩都有排玩。





第一件吸引我嘅係啲喇叭腳墊，Kin師兄出哂名係腳控，佢依套Obit80A腳墊係廠特別為佢而設計，對Wilson Alexia加咗佢真係完全唔同哂，上次聽嗰套係prototype，今次呢套係正式版，Obit 80A嘅優點係將Alexia中高既表現加強，而且線條更幼細，成對喇叭表現如虎添翼，連Benny師兄依啲Body控都講一入屋就俾呢套腳吸引住就知幾正，唯一問題只係我冇錢買～





另一件吸引我嘅係佢個新電處-Audience ar12，依個過十皮嘅電處都唔使點講，識貨就識，對比起上一次聽，用咗依個電處無論喺動態上同背景寧靜度都有大改善，聽Kin師兄講返，最大改善係嗰啲微動態，好多細節位出返哂，個電處真係非常吸引，對我來講又係‘得個望’品牌，不過正還正，除咗價錢貴外，我個人覺得個電湧保護掣放喺前面有啲唔太好，唔覺意一下手殘真係GG。




再另一件亦比較冷門嘅係佢部新switch，係英國品牌Tempus 兩件頭用自家製hybrid電 ，據Kin師兄講依部機來頭唔少，佢話暫時除咗ansuz 大佬二佬switch， 唔覺得同級有對手，又係精品一件。





睇完嘢又到聽歌時間，坐定聽第一首歌，咦…點解啲聲薄咗咁多？分析力係好強，但完全冇音樂感，死氣沈沈咁…正想開口問之際，Kin師兄已經知道咩事，原來之前一晚有另一耳機燒友拜訪過，佢要啲聲係高分析到連山頂有人咳啲聲都要聽到，所以個DSP係特別調整過，佢之後將佢調整返就正常番哂，又俾我見識到用DSP做調聲嘅玩法，（理論上即係玩EQ，不過依家用電腦就精準同方便好多），至於具體點調我就略過，因為寫多三段都寫唔完。





今次家訪真係學到好多嘢，再次多謝Kin師兄悉心教導，套機同上次比較，無論動態上同結像都進步唔少，對比起之前衝擊力真係太強，今次好明顯平衡好多，另外Kin師兄最大動作係成個聆聽位置搞好Room Acoustic，好似AGS、Gik、Acoustic Revive等等依類房間處理嘅產品已經放好正確位置，務求令每段諧震及駐波減到最低，正如開始時有講，佢對REW呢套軟件已經用到滾瓜瀾熟，基本上每添置一件產品，佢都會再用支咪逐個位置同每段聲頻做測量，認真程度我真係自愧不如，依家成套機已經非常毒，之後仲會有埋Taiko Olympus Server到位，真係冇法想像。

racewong

件AUDIENCE好毒...

Simcity

再次恭喜晒 Kin 師兄 👍👍👍

KinLeung@FB

racewong 發表於 2025-2-12 14:21
件AUDIENCE好毒...

應該係香港第一部audience ar12-T4 配 最新 frontrow reverse PC

racewong

KinLeung@FB 發表於 2025-2-12 23:28
應該係香港第一部audience ar12-T4 配 最新 frontrow reverse PC

我都唔知你係Audience硬粉