丹麥三角型盒裝曲奇 Gyphron Ethos CD Player

zelo

套Chord Blu 2+DAVE都用咗好多年，一直想轉吓口味，奈何荷包唔爭氣，屋企又冇位所以就不了了之，直至近排有新攪作，屋企套機將要分家，所以要搵多個音源做後備。近排見多位師兄執平貨，我就多口搭單問有冇CD機，估唔到又真係返到靚價，最正係部機膠紙都未撇，所以都冇再多考慮就即入。
依部三角嘜外型同設計真係靚到無話可說，先唔論聲，外型已經殺低大部份CD機。佢同部Chord Blu2一樣係top loading，但部Ethos就講究好多，由開蓋、放碟到放碟鎮，個個位都做得好細緻，充滿儀式感。





旗艦即係旗艦，落碟個位做得好細緻，盤邊有藍色LED光滲出，配上金色碟鎮，盡顯高貴及科幻感，淨係呢個畫面都夠我睇好耐。







三角形機身夠哂時尚感，放喺屋企完全可以融入家中，可以話唔打得都睇得，控制面板係用touch screen按掣，反應相當快，致於個remote就相當正，係全金屬夠哂厚淨。





部機個spec其實唔算特別靚仔，佢個升頻亦都只能去到PCM 384kHz，對比起Blu2+DAVE可以去到PCM 768kHz差一級，不過數據始終係數據，靚唔靚聲先係皇道，所以先唔好計較個數字住，出唔出到靚聲先最重要。

部機有10種filter可選擇，PCM方面有7種、DSD方面有3種，可以按口味去調節，所以都幾好玩，我個人覺得用PCM 去到3段聽CD比較啱口味，
其實簡單啲講filter數字越細，音色越柔，數字愈大就收得越快，分析力亦都係按數字加大，不過真係要睇播乜嘢歌，我試過有啲歌要夠爆嘅，就要調到5、6先啱feel，致於用DSD播放，我覺得聽普通CD用返PCM會較好，播放DSD file先會選用佢，兩者其實聽感唔差太遠。



部機有USB同S/PDIF輸入，可單獨作為獨立解碼用，玩串流完全冇問題，所以我用Innuos Pulsar 直接用USB輸出駁入Ethos，可以直接認到兼播放到。



講到聽感，Ethos俾我感覺係較有感情同埋肉地，比較耐聽，會聽得好舒服，尤其人聲表現比起以前更有感情、更有色彩，依方面Ethos係較優，無錯套Blu2+DAVE喺分析分方面會較優勝，速度感亦都較好，但用喺套大機上有時會聽得好攰，反而用落套headphone就非常好，所以各有輸贏，結論係我會將套Chord‘分家’留守屋企照顧我部HE-1，部Ethos會伴我套大機出去闖。

racewong

CHORD有無報夢?

zelo

racewong 發表於 2025-3-23 15:59
CHORD有無報夢?

有呀，仲祝福埋我

racewong

zelo 發表於 2025-3-23 17:05
有呀，仲祝福埋我

你會唔會換會玩貴豐呀?