香港夜繽紛 - 31 你Dan咗未？

zelo

上個禮拜開始回暖，有兩位團友覺得係時候嚟個新境像，問我肥Dan正唔正，通常燒友去到問好唔好依句說話，即係有8、9成想換機，去到呢個位，我緊係儘能力幫忙送佢哋一程，所以我即刻call Lobo哥約上showroom試機，Lobo哥果然夠專業，為咗我哋班人，成套機由朝開始熱身，所以我哋上到去已經係最佳狀態。

部Momentum C2加對M400 MXV再接住剛到showroom 嘅Magico S5喇叭，簡直係完美組合，部Momentum C2先唔好講聲，淨係外型已經非常煞食，前面個綠色燈錶面簡直令人睇到着晒迷，下面個電子錶面同佢做個反差，完全係時尚與古典混合體，一啲違和感都冇，金工亦都係一絕，機身紮實及絲滑拋光，果然外殼係自己廠造番質量有一定保證，唯一可惜係見唔到傳說中嘅靚仔remote。對M400 MXV亦都一樣，唔好睇佢機身細細，造工亦絕不馬虎，淨係睇個外型已經值回票價。至於對Magico S5，依個唔駛講都知係一件精品。



欣賞完一輪就入正題坐定定咁聽歌，首先我哋由CD開始聽，部CD機唔算頂流，但估唔到音効幾好，不過真係冇乜驚喜，可能Lobo哥見我哋冇乜反應，都估到我哋唔係咁收貨，佢即刻開黑膠俾我哋聽，佢一開波就用Transrotor Metropolis FMD頂班黑膠盤播，無錯真係好聽，不過同行班朋友仔覺得佢打茅波，用個頂級音源基本上已經贏8成，點試真套amp（所以你話啲有錢人幾L難服侍），Lobo哥都好快手，即刻轉用三佬Tourbillon FMD黑膠盤，(其實依個盤都唔小嘢…)，之後播咗好多唔同類型曲目，我個人最深刻應該係隻鬼太鼓座，Momentum C2控制力認真一流，分析力強之余亦不失幼細，高低起伏位如騰雲流水，非常順暢。



至於對M400 MXV更加冇嘢講，對Magico S5都屬大食怪獸，嗰日我哋一共有7個人喺間房，音量只係開到11點左右（即機上顯示43左右），已經夠晒音量，表現好淡定，機身亦只係微熱，即係仲有大把貨可交，估唔到對後級機身細細，原來力大無窮。



總括來講，呢部Momentum C2屬上上之作，我覺得佢個CP好高，以佢身價跟同級產品比較，我諗唔到有邊個牌子可以贏佢，當日我哋試機嘅接線全屬中價貨，換返啲靚線効果應會更好，加上對S5喇叭只係開箱兩日，但表現一啲都唔失禮，所以試完機之後個富貴團友已經拉Lobo哥埋一邊細細聲傾價錢。

我對上一次去聽肥Dan應該仲係HD版本，嗰時我聽完係完全無懸念，因為我覺得HD比較粗聲、欠缺幼細，今次部Momentum C2真係令我改觀，當日試完機落樓，我有一剎那衝動想全面轉會，好彩當日天氣夠涼，一陣冷風吹一吹，再望下個荷包，即刻冷靜番，只好呃自己：我時運高，乜都睇唔到！

ieskn96

相當感謝 zelo 師兄的連續兩篇精彩文章！

P.S. https://www.youtube.com/watch?v=YFXCkphbJ_8
28-3-2025【音響技術】Dan D'Agostino 旗艦 Relentless 的精華版: Momentum C2 前級