香港夜繽紛 - 33 鴨脷洲的聖光

zelo

前幾日班損友搵我，通知我有局問我join唔join，神神秘秘咁又唔話去邊，淨係問我想唔想食魚蛋粉，我當然唔問咁多，反正有嘢玩我一定奉陪，後來我先知道入鴨脷洲，入到呢個位我當然知去邊，就係好出名嘅神曲工作室，御品另外兩個showroom我去過幾次，但係神曲工作室就真係冇機會去過，班損友果然夠面子，我又可以好似條鮣魚咁黐住班大鯊魚入去。



入到去工廈單位入面，我覺得完全入咗另一個維度咁，同室外反差非常大，神曲工作室果然係頂級展示廳，個showroom設計好有品味，一入門口見到對Gobel大神曲已經夠壓場，Gobel 中神曲 Divin Noblesse、小神曲 Divin Marquis、Epoque Aeon我都有幸聽過，亦都見識到相當有實力，大神曲 Divin Majestic實物就真係第一次見，淨係見到外型已經夠哂震撼，搞到我即係變咗隻小學雞咁，又叫又嗌又影相扮成龍，認真失禮…欣賞完對喇叭後，另一件珍品吸引我嘅就大名鼎鼎嘅Dalby Akasu Elemento黑膠唱盤，百聞不如一見，唱盤手工精細，金工完全冇瑕疵，唱盤上再放上自家Akasu 唱片壓，更添貴氣，前級當然用番Robert Koda K-15 EX，質量夠晒保証，加上最新推出嘅Fukami唱放，不過吸引到我嘅，係放地上兩部擬似小型電腦嘅後級，個名可能比較陌生，品牌叫Stellavox，後級型號我唔太記起，不過外型同對大喇叭比起，個反差真係相當大，所以我都好懷疑咁細部機點可以驅動到咁大對喇叭…對後級屬AB class，機身細細但出力就有450w，據悉套後級的有好多獨門技術，內部型計係冇任何接線位，全機係機械式裝嵌而成，非常耍家。












模擬系統大致上係咁，至於數碼系統方面，個音源係來自德國嘅Synastic Audio嘅SACD機，經Pink faun Ultra 2.16 streamer配上近排超火嘅Jundo Stream LAN cable，因為其他配件就太多，加上當日主聽黑膠，CAS套系統都係留返大家去拜訪時再慢慢研究啦。





成套系統係為大型交響做設定，所以當日我哋都係主聽大棚嘢為主，聽完Chris大哥一輪講解，就霸定個靚位等聽歌，正所謂行家一出手，便知有沒有，一開始已經令我立即入局，大神曲認真超班，成個系統營造嗰種現場感可以用震撼嚟形容，需則對喇叭咁大型，但表現絕對唔係粗枝大葉，音色好幼細，分析力強到不得了，非常有層次感，個感覺尤如坐正歌劇院前排，最深刻印象係重播國王與我某一段時，嗰種真實感令人錯覺尤伯連納重現舞台上，真係聽到好感動，成套系統當然Robert Koda前級功不可沒，不過最令我哋意外係對後級，正如我之前所講，對後級機身細細，絕對會懐疑佢夠唔夠力推咁大對喇叭？但聽過之後我哋嘅疑團一掃而空，對後級表現一啲都唔失禮，從容不迫咁將對大神曲呢對巨獸順服得聽聽話話。







除咗大型交響，中途我哋都有聽jazz，音源就會轉用放旁邊嘅Thales Reference唱盤，依個唱盤唔好睇佢細細部，來頭一啲都唔嘢少，機身設計好有特色，有個mechanical centrifugal governor嚟穩定轉速，不過我覺得都係用番主系統播交響優勝好多，始終成個系統都係以交響為主，播其他類型嘅歌個音効係有少少不似預期。當我哋聽得如痴如醉之際，原來已經玩咗幾個鐘，Chris大哥真係唔話得，一直冇停咁播碟俾我哋，成套系統咁完美，中段已經被毒死兼且已經來回地獄又折返多次，所以到尾聲，Chris播隻全套系統表現最殺食嘅馬勒 2 Resurrection 俾我哋聽，令我哋可以籍聖光重生，依段樂章亦都係全晚最高潮，而且唔係任何機都可以播放到，你要重播到整個樂團重現眼前，要聽到樂手金屬樂器嘅質感，人聲嘅清晰度，整段樂章嘅分離度、音場同定位，套機唔夠班只會出到雜亂無章嘅噪音，作為超級發燒友嘅Chris，睇得出佢喺依套機花咗好多時間同心血，依段樂章重播佢係揚名海外播得最好嘅，我聽完之後都成個人呆咗，確實係震撼人心，非常感動，充分用盡全套系統嘅優點，我極度相信喺依度聽過後應該冇人敢認第一。

racewong

喺hiendy睇始終好睇d, 起碼相片啱位.