建國大典 - 4 搬竇先嚟落雨⋯⋯

zelo

間房裝修大致上可以，又到戲肉，我點樣運成套器材入場？之前有師兄介紹過搬運器材師傅，不過佢哋只係專門搬喇叭，其他嘢冇清楚表達會唔會做，所以有諗過螞蟻搬家咁自己一件件運走，淨係對喇叭先叫搵專業人士去搬，但睇吓我件件器材都過20Kg，搬完應該到我被搬走，諗諗吓突然想起上一次搬屋間搬屋公司，當然時我啲器材都係佢哋好妥當咁攪埋，於是約佢哋上屋企打個價，再殺吓價就定好日子搬。等搬走前嗰幾日其實心理壓力好大，因為啱啱撞正打風，嗰朝早仲要落好大雨，個心情完全融入廣告入面條靚仔咁‘唔通連個天都唔鐘意我’，好彩搬運師傅嗰日好早搵我，趁冇落雨即刻上我度開工，師傅嚟到好快手，基本上係每件器材個別包好再入箱，咁多嘢可以一個鐘頭唔使就全屋清零，非常專業。











全程連包連送三個鐘搞惦，到咗仲幫手開埋箱放上架，認真唔話得，本來當日打算任務完成，第二日先諗點擺位，點知當日已經有幾件厚多士帶晒架生過嚟，有班後生幫手搬，我呢啲老餅緊係坐埋一邊嘆茶手指指，佢哋幫我將間房平均分三個距離，度好中心點再移正所有器材。因為第一次擺位，喇叭先放近側牆，將Alexia V上面兩個單元角度重新調整，先來一個大toe對正皇帝位，因為未正式定好位置，幾塊Stillpoints 板先分別每邊後牆角各放一塊，之後兩邊側牆第一反射點各放一塊，因為所有傢俬未到，所以暫時就咁定，先開咗聲試試先。







因為太倉猝，CD 又未聽得，黑膠盤連支臂都未搞，只好用我套超雞low end cas聽，其實結果係點唔駛講都估計到，空間大咗音場同結像一定好過以前，之不過…所有電線電箱全部都係新嘅、套後級又係新嘅、音源又未搞惦，同你講話好好聽你都唔會信，不過漫漫長路，大把時間執。以當時環境睇，器材方面嘅配搭我完全唔擔心，反而個空間處理真係要落多啲功夫，間房話就話加晒隔聲簾，只係好過無，其作用好有限，加上所有傢俬未到，間房其實好空洞，播歌時殘響都幾大，都係嗰句，齊晒所有嘢先慢慢解決…

remychiu

先恭喜zelo師兄，請問可否放個搬運公司聯絡電話備用?

racewong

remychiu 發表於 2025-6-24 12:39
zelo師兄，請問可否放個搬運公司電話備用?

係喎, 依家搬音響既運輸越來越少了.

zelo

其實佢哋唔係主要做HiFi搬運，你上網搵Santa Fe依間公司，講你想搬乜同有乜要求，會有專人去你度做評估，之後再有專人聯絡你，出報價同定時間，最後乜都唔使做，全部自動波。

remychiu

zelo 發表於 2025-6-24 13:47
其實佢哋唔係主要做HiFi搬運，你上網搵Santa Fe依間公司，講你想搬乜同有乜要求，會有專人去你度做評估，之 ...

Thank You Zelo 師兄!!

jjtiger

Zelo師兄下一步好大機會要換喇叭🤭

zelo

jjtiger 發表於 2025-6-25 10:33
Zelo師兄下一步好大機會要換喇叭🤭

下一步可能講緊未來幾年之後～依隻Alexia V真係有排玩，我覺得佢喺依間房已經夠用有突。最重要係我無錢～～～～～

ieskn96

早晨 zelo 師兄！請問可否告知在租約期內，您是否需要為本身的音響設備購買保險？若是的話，請問是投保哪一間的保險公司的保單計劃？謝謝！

P.S. https://personal.santaferelo.com/zh-hans/
感謝 zelo 師兄分享上列的 Santa Fe 搬屋公司資訊！