建國大典 - 5 鞭鞭有力

zelo

上期講到器材入屋，位置基本上已經定好，唯獨傢俬要七月頭先到，既然開咗波，就已經冇得停，因為分分鐘都計緊錢，所以我就開始做器材微調同set返好個黑膠唱盤，再跟住開始放置我啲Stillpoints 板、AGS 木架，調咗兩日，個盤基本上可以開聲聽，滿心歡喜以為點都好過屋企聽，點知一落針，又係爆到九彩，高中雖然好平均，但某段低真係太震撼，勁到大門鐵閘都震埋⋯⋯所以又要諗辦法處理，先用最簡單方法，我再喺間房左右牆加隔音簾，皇帝位前嘅天花反射點加返4塊Stillpoints cloud，再將四塊Stillpoints aperture放機後兩角，然後將對喇叭角度調教，攪咗一輪，効果係有明顯改善，但問題仲未可以完全解決，我自己就唔過關，所以停咗一兩日冇去再搞，靜靜哋思考一下，決定由最基本處理，先由器材嗰邊著手。



第一件事要處理，就係直接email去Arya Audio lab，重新問清楚對AirBlade嘅正確玩法，之前一直盲人摸象咁去試，真係完全靠對耳去玩，以前屋企冇地方，所以只能妥協一直放喇叭頂，其實唔係咁適合，因為Alexia個頂係向下斜，加上位置對唔正高音單元位置，依家睇返係好有問題，最後廠家非常好，真係成篇論文咁回覆返，我就按廠家建議逐點更正，我專登訂咗幾款腳架去做試驗，最後揀咗一款可以貼正喇叭旁，可以教正返個高音單元位置，之後再將相位同音量重新調教，依家成個結像同音場已經比之前更好。



第二件事我一直覺得對喇叭腳用轆好有問題，之前屋企聽我係有落釘腳，用咗之後成個線條係非常實淨，依家我覺得音色鬆散之餘低頻亦都比較肥，所以位置定好後我決定落釘腳，不過Wilson 套Acoustic Diode 係好，但係個釘墊我個人覺得幾雞吓，之前冇地方冇辦法，依家重新整冇理由唔攪，所以我專登搵咗8隻Wellfloat Delta墊招呼佢，玩吓効果又如何。





一條友做咁多嘢真係腰酸背痛⋯⋯反正都係痛就一次過做埋第三部，我將所有機嘅接線重新配搭，詳細唔寫咁多，總之試到嘔血。到正式試聽，CD嗰邊已經冇問題，收貨之餘仲應該見得吓人，不過黑膠嗰邊就麻煩少少⋯⋯依家直頭好似食咗萬年海狗鞭咁，勁到無論！見到咁我唯有妥協，依家要將個DS Audio Equalizer 個output轉去第三格，至於個30Hz同50Hz cutoff ，我就仲試緊邊個啱用，只好之後慢慢聽真啲先決定。長路漫漫~~~依家已經被玩到半條人命，所以咁多位大佬，暫時唔好問我幾時搞惦住。

racewong

大哥你仲有心有力. 真係勁.

jjtiger

Zelo 大哥唔好比佢停，加油呀