中年要補品 (Power Lab Galaxy Fuse簡短使用報告)

zelo

前排損友B先生上來聽歌，佢帶埋另一朋友A先生上來，我本住任何人都招呼心情，勢估唔到佢哋暗藏暗器，見佢哋鬼鬼鼠鼠拎個小盒出嚟望吓，盒入面放住一支細細哋帶綠色類似藥丸嘅物體，我起初以為係咩保健藥，心諗人到中年係要食啲保健產品，分享吓好正常…依個時候我我依啲虧虧哋嘅中年費佬當然八八卦卦問吓咩來，一問就知出事，原來係Power Lab出嘅 Galaxy Fuse，不過…我當時反應只係‘哦’一句，因為我本身對玩fuse係屬免疫狀態，原因係以前太多慘痛經歴，所以冇再惦依樣小配件好耐。不過人就係咁衰格，睇多兩睇就完全進入‘紅姐模式’，反正來都來啦，點都想要試吓。





不過Fuse得一條，放邊個位好呢，考慮過後決定先選放前級，因為所有器材都會受惠，最易見到効果，正準備換之際⋯⋯咦～點解搵唔到邊個位換fuse，估計有機會係要開機頂先換到，要開機頂咁大動作我又唔想，嗰一刻心諗惦呀，天都幫我可以全身而退。不過位A損友仍然咬住唔放，提議我試吓換CD 機個位，之不過我話部CD機我好少聽，換咗都唔會知道有効果，Yeh~又走甩，點知位A損友認真無孔不入，俾佢掃到部DS Audio Equalizer，仲話依部你肯定成日聽啦，同我講多句都費事，自動波走去裝拆，真係當正自己屋企咁。



換咗fuse之後試聽咗幾首歌，唔…係好似音場濶咗少少，其他冇乜分別咁喎，咁嘅効果我冇可能收貨，不過…任何器材、配件我都會俾多啲時間去試，估計條fuse都一樣要時間run in，所以決定就一路聽一路煲，如是者斷斷續續咁玩咗幾日，前日我攞返自己比較聽得多嘅碟重新聽多次，果然如我所料，條fuse真係需要時間去run in，依家個音場我同我初聽時比較起碼大咗一半，音色方面冇大變化，依樣我反而非常欣賞，因為音色方面我覺得依家已經好啱我口味，我都唔想大改，至於分析力方面，DS Audio Grand Master EX本身已經夠強，依方面我聽唔到有太大改變，反而密度方面就有進步，我重新聽The Stimulators 入面隻 New Years Eve On the Waterfront，中段樂器演奏嗰段真係好立體，現場感比之前更實在。三頻伸延絕對有改善，我個人覺得依條fuse係屬於加強系統功効類型，唔係改變音色向嘅產品，本來我對依條fuse興趣不大，不過見到効果唔錯又開始做吓功課，睇返佢啲資料，材料方面我冇特別意見，反正我識條鐵，我注重成効大於一切，介紹入面有一段我比較在意，佢解釋條fuse嘅設計係中和對聲音有害的EMI/RFI，將干擾減到最低，令聲音背景更加寧靜，密度和分析力大大提高，依個同我套機嘅改變好近似。



因為我本身冇玩開fuse，對市場上其他同類產品冇乜研究，條fuse個價格據我所知係同類型產品中屬偏貴嘅，好老實講，我冇試過我可以話絕對唔會考慮買入，但試過後我又有另一想法，依家個情況尤如換咗一條高班電源線，我要搵條有咁効果嘅電源線分分鐘要付出更多，無錯，電源線會有更好二手價同埋易啲甩手，不過依樣嘢從來唔係我買嘢玩嘅考慮因素，成日諗住啲嘢將來要放走容易，即係玩來玩去都係大路嘢，你唔悶我都悶，不如咩都唔好玩。最後都係嗰句，麻煩各位唔好再帶嘢上我度，紅姐已經俾人拉9咗，唔會再上到我身。

racewong

睇黎你D抗毒能力一般般咋喎.

zelo

racewong 發表於 2025-11-25 12:31
睇黎你D抗毒能力一般般咋喎.

我抗毒能力好强，只係定力唔夠…總之損友要遠離。

racewong

zelo 發表於 2025-11-25 13:03
我抗毒能力好强，只係定力唔夠…總之損友要遠離。

抗毒力=無錢...


所以你既抗毒值係-------零

LadderDAC

好多謝你的欣賞，我們的初心是設計出儘量沒有音色和平衡度好的保險絲，就像Power Lab的電箱和插座一樣。也有朋友忠告我們有點冒險，因為這概念和一般人對發燒保險的追求不同，幸運地Power Lab保險絲推出後反應很好，真的好多謝大家私支持!