葡萄老祖去漫遊 2 - 中環葡萄園

zelo

每次出中環，個胃零舍痛，尤其行過昭隆街買隻熱狗食，味道都特別酸，皆因依條街有個超大型葡萄園，行開依頭好自然會諗起T大，所以久唔久都會約上佢個葡萄園吸收吓啲養份。



對上一次上T大度應該係啱啱放對M7上零震台，嗰次因為位置未放好，所以効果我覺得比再之前差咗啲，我印象中對M7最高峰時就係未放零震台之前，真係聽到唔捨得走，因為已經過咗一段時間，今次再上去聽又有另一番體會。



入到去見個格局有好多變動，對喇叭移後咗差唔多兩尺兼放闊咗，零震台全部已配上專用LPS，後級取電直接插牆蘇，成個格局望上去好似大咗一個碼咁。今次個聽感同之前好唔同，我覺得依家個聲比之前更開揚，更有活生感，冇比較都唔知之前用住PS Audio power plant嘅聲咁壓縮，三頻依家更加平均，尤其個低頻今次真係非常靚，估唔到可以再創另一高峰。






另外有兩套新玩具加持（其實都用咗一排），真係不得不提，一套係Schnerzinger Reflector，依套6件頭小天線，依套嘢之前已經講過多次，今次唔再講啦，另一件係Ikeda 冴鉑唱頭，依個唱頭限量30隻，係Ikeda 40周年紀念版兼不惜工本之作，我係極之推崇，一體式鑽石針桿，出來音色細緻度可媲美DS Audio GMEX，但又不失MC頭帶出嘅甜甜韻味，我第一次聽已經立刻愛上，奈何我個唱盤只能裝一條臂，加上冇銀用，所以只能酸住聽，不過我秉承印度街頭食物精神，有好嘢自己可以唔買，但一定要介紹叫朋友買，當然依位朋友當日聽完已經即刻喺日本刮埋最後一隻。





一路聽住已經酸到盲公都開眼，再睇睇吓間房，點解有另一對Kondo Gakura多咗出嚟？點解有啲線攤放咗喺地下？即係將有大搞作啦，大家好快會知，心水清嘅朋友都應該一早知，總之依個葡萄園短期內我會再去。

adyc

Upgrade to M9? Need 4 mono power amps?

racewong

adyc 發表於 2026-1-30 11:23
Upgrade to M9? Need 4 mono power amps?

下星期等佢自己講...哈哈