無玩hifi都成大半年, 而家襯屋企未有細路, 所以決定再玩多鑊. 係呢段時間不斷上網吸毒, 去人地屋企家訪. 去hifi鋪運吉, 收集左唔同資料. 不過當中最值得分享係佢地既心底話. 唔知有幾多心底話係大家有共鳴或者強烈不同意呢?
1. 我對於微調出黎既聲音改變反應唔大. 即係你將個喇叭toe-in 18度定23度, 放唔同釘腳, 由1K線換條2k落去. 有時真係好心理作用, 同d老經驗既hifi sales傾, 坦白講真係唔大. 有好多特點野都係部機你比左幾錢就係個d野. 喇叭擺位, 每間屋企只有一個完美位置先會覺得大分別, 其餘除非你亂擺喇叭..如果唔係分別只係極微妙. 有好多說話都係用黎安撫一d比左錢但係得唔到佢要既聲既人.
2. 買線的經驗, 而家既我, 只會買兩種線, 一係1-2K個d. 但求好過跟機線, 個頭無咁多干擾, 一係就超貴2-3萬, 唔好係中間浮沉. 同d玩線老手傾都係, 中間個d線, 比得高中你,個低又唔見左. 比到個低你, 高音又唔通透, 一係1-2K 用個靚d既IEC頭, 其實已經好過跟機線好多. 一係就係知名牌子既旗艦線. 個d一定會比你多姿多彩既味道, 知名牌子能夠生存咁耐, 絕對有價值, 需知道線唔同機..線可以離譜到1K既料賣5萬. 所以亂買新牌子線有時會矇騙左自己. 亦會損失慘重.
3. 買機每個人都有唔同意見. 我自己都承認有一段時間唔係聽hifi,係聽人講, 人講個隻好聲就去買. 到而家發現最靚聲其實係sales把口. 例如有人同你講.我可以一半價錢, 靚聲過你屋企一倍. 但係當你話其實唔係覺得太好聲, 佢只會答你, 你都唔識聽野. 呢類人真係多不勝數, 其實無識唔識聽野既人..只有鐘唔鐘意聽野既人. 或者有d人聽成個鐘沉悶既交響樂, 我會頂唔順, 但係佢聽完後可以分享你聽呢隊交響樂好在邊度, 聽呢首曲既心情. 呢d就真係一個對音樂好有興趣既人喇.
4. 買機方面, 如果能力許可就去旗艦, 無得痕, 不過無論邊隻牌子既旗艦, 都唔岩玩放出去都會蝕得幾利害, 要有呢個決心就上旗艦喇. 如果要係中級機落腳, 就盡量搵有二手價既機, 有心理準備唔玩放出去當租機. 而且最好係大牌子, 因為有好多牌子都係吹出黎. 佢真正能耐係值幾多無人知. 到吹完唔興個陣你想放都幾難.
5. 到你買左機後, 發覺錢比左但係亦有好多地方唔滿意, 就會有人同你講煲好後兩個世界, 間房做好d room acoustic, 擺好喇叭先喇. 其實呢d step係需要, 但係唔會改變到一d基本底子. 其實想容易聽到好聲, 首先要調節下自己個心態. 玩hifi除左自己既財力同技術, 最重要係自己要有耐性同熱誠. 同埋去到最後要話比自己聽, 玩hifi係想聽音樂唔係聽器材.
6. 香港做一個hifi發燒友好折墮, 件件野都已經唔平, 經營呢行既人亦唔會個個都好友善, 搞到好似我求佢買件hifi野比我咁. 有時睇岩想買又話無貨, 等廠得閒先整. 隨時有貨都比大陸先. 一係就中伏, 買左後發覺唔岩二手放出去流晒血都無人接, d品牌下下出新model都加個double. 又或者要識好多好多人先會羅到價錢岩既貨. 想搵隻好聽d既碟, 都比人抄到飛天.
以上呢d說話係我從不同前輩, 業界人士. 發燒友中悟到出黎. 至在講心底話, 無影射邊個. 可能今次經過咁多野後玩返hifi..特別多感觸. |
IP卡
狗仔卡
發表於 2011-9-14 17:22:08
提升卡
置頂卡
沉默卡
喧囂卡
變色卡
顯身卡
發表於 2011-9-14 17:39:14
