好多料爆！

pepsiman

百事佬手記(3)

百事佬披上戰衣，飈著戰羊，穿州過省，走遍大街小巷，四出偵查，
索盡最新行程，為大家報導市場上嘅最新消息。

~ 安橋新場 ~

承HIENDY嘅福氣，百事佬好榮幸收到安橋公司嘅邀請，喺上星期五(11/11)參加佢地位於星光行嘅全新視聽室開幕禮，
同場有唔少影音雜誌同埋網站嘅朋友，當然要趁住呢個機會認識多啲業界人士啦！

視聽室面積大約有24平方米，最多可以容納20人。而據安橋市場經理黃小姐所講，呢個耗資40幾萬打造嘅視聽室，
係特別聘請到具備豐富聲學工程經驗嘅四維音樂工程設計公司處理。安橋為咗令我哋一眾傳媒可以更了解房間設計，
專程請到四維公司嘅市場專員ANGEL小姐親身講解，不過她來自上海，”煲冬瓜，聽不懂”，
唯有專心影多幾張ANGEL嘅靚樣啦！不過單從房間內嘅設計，見到有唔少厚身嘅隔音綿，亦有擴散板同吸音板，
原理係乜恕我唔識解釋，但係實地試聽一段美國隊長，果然有料到，最特別視聽室嘅投影幕係用咗透聲幕料，
但又唔用佢嘅透聲功能喎。嘩！唔係咁嘥料嘛！原來幕後面係加裝咗吸音綿，係用嚟控制房間嘅不良音染。

安橋市場經理黃小姐為大家講解視聽室內之器材

四維音樂工程設計公司市場專員ANGEL

工程案例

視聽室座位擺放陳設

我作為HIENDY嘅索料人，梗係唔會錯過呢個機會啦！係時候同大家報報料：

1.        呢段料可能會令大家失望，點解？因為呢間視聽室係唔對外開放嘅！但係黃小姐承諾大家，未來會同各個合作伙伴以及媒體舉辦影音活動俾大家感受一下呢間視聽室嘅威力，希望HIENDY可以成為第一個幸運兒啦！
2.        呢個真係好消息，安橋計劃舉辦不定期嘅〈Onkyo影音工作坊〉，希望透過呢個活動，俾安橋用家對產品有更透徹嘅了解。
3.        安橋喺今年初已經開設咗”Onkyo HK” Facebook，俾更多安橋粉絲可以有個地方聚腳吹水。
4.        安橋維修中心已經由葵涌搬到星光行，並且提供一星期七天全天候嘅維修服務，安橋用家真係幸福。Oh No！講錯嘢添！
5.        最後；梗係把握機會問吓靚女ANGEL有無辦法解救一下我哋呢班經常俾街坊投票嘅苦民呢！佢嘅答案係………無問題，我地有一隊專業團隊，一定幫到你。（頂！有無啲平啲嘅方法架？）有，可以喺天花板加裝吸音綿同埋擴散板，不過效果未必顯著！（死未！）

天花

牆身

安裝簡易

其他器材

有靚女就梗係要影番張合照啦！

~ 水漲價高 ~

水漲船高就係不變嘅定律，但估唔到水漲係會連價都高埋。
泰國水災除咗影響咗當地國民之外，亦都影響埋香港，而我亦不幸成為受害者之一。
繼今年三月日本大地震引發海嘯之後，泰國亦因為一場大雨令致全國大水災，不少國民因此而痛失家園，甚至奪去生命。
泰國雖然唔係咩嘢科技強國，但係有唔少嘅外資公司，為咗減輕成本同埋一啲商業技術問題，
而將部份生產線移師到泰國，所以今次水災影響力都唔少。
今次水災，好多電子零件廠都首當其衝，直接影響裝組成品，當中涉及影音同埋攝影器材。
最近小弟嘅數碼相機因為一個意外而不幸與世長辭，於是諗住喺外拍活動之前，
透過好友介紹攞個靚價入個靚貨嚟彌補我心靈嘅空虛，點知收到呢個惡耗，登時晴天霹靂，
估唔到買樓買股就要睇時機啫，原來買相機都要講時辰嘅。奉勸咁多位讀者，想入到心愛禮物過聖誕的話，
就要趁手喇！有錢無貨真係會嬲到爆呢！

~ 邊爐之旅 ~

傳說中HIENDY有一個超級迷你影院，我一直只能夠從會員回覆之中得知呢間超級迷你影院有幾咁堅、有幾咁勁！
不過上個星期日嘅下午，突然收到一隻犀牛嘅來電，話現正身處喺超級迷你影院試緊機。有無搞錯呀！
咁遲先至叫我，係唔係想做精子會員呀！我拿拿淋騎隻戰羊，膝頭哥掂地擘住入彎不足十分鐘直達呢間影院。
從大門望入去好鬼亂，仲以為搵錯地方。當院長ANDY開門嘅一刻，原來房內係別有洞天，因為大廳仲未有時間裝修，
所以一片零亂。行到呢個超級迷你影院門口，我吞咗一啖口水先至夠膽除鞋行入去，邊有可能咁正呀！
淨係齋睇都已經接受唔到囉！裡面伸手不見五指（好彩Q姐唔在場，否則真係唔敢想像... ）
前面三隻巨無霸保齡球王，非常靚仔，特別係隻中置，十足十三一萬能俠其中一隻，勁！
再周圍打量一下，後面四隻"蛇冷"都一樣咁Q大隻，使唔使呀！
再睇番前面左右兩邊，SM大家就聽得多，MSM大家又聽過未？
兩隻MK MX-250負責入你中路，隻郵筒就梗係入你下路啦！
好彩我呢個久經轟炸嘅失聰男，一早已經對超低頻視作無物，否則食多幾粒脷底丸都救唔番。
前前後後試咗三幾隻BD，包括亡命刺客、老變3、死硬4…..等等。第一次聽到槍聲係咁清脆，人聲係咁真實，
同埋忍者跳落車頂係咁有質感，真係唔想再睇落去，根本唔可以同家庭影院比，”愈聽愈傷心，明明無餘地再過問……”
呢晚係天龍旗艦嘅最後一晚，下次佢再重踏呢個場嘅時候，已經係再生俠，因為佢已經閉關修練3D神功，
睇嚟再重返時效果不敢想像，都係要諗過先至好去！

係人都知呢個院長最鍾意打邊爐啦！所以呢晚亦都唔例外，都係打邊爐，仲要打到成點幾鐘先至散水，好很攰呢！

~ AQ 假 HDMI 疑雲！ ~

早前收到幾位網友嘅PM，都係查詢有關AQ HDMI線嘅問題。包裝盒、High Speed、又Standard Speed究竟點分？
用喺3D投影機又應該入邊條？有位網友化名阿明，買咗條10米從未見街嘅AQ朱古力HDMI線，懷疑自己買咗假線添！
既然大家有咁大嘅疑慮，好…..我百事超人，除咗為護世界和平………..唔得之外，當然會為會員盡力解答疑難啦。
今日我就聯同行動版主豬賓，殺落去德發名線屋希望查明屬實，如果唔講就打到佢講為止，哼...
一去到，我哋兩個立即表明身份同來意，本以為佢會阿之阿咗，點知佢聽到我哋係Hiendy嘅人馬立即乖乖就範，
仲攞啲線出嚟俾我哋任影唔嬲添，哈哈哈！驚牙呢！比啲相大家睇下先……

上面果條係8米朱古力，下面果條係新版10米，線身轉為深色

10米係"High Speed"，而12米係"Standard"

新版連個插頭都變埋朱古力色

睇完啲相，我諗大家都只係了解一二，不如就等我再解釋一下啦！根據名線屋嘅職員所講，依家AQ HDMI無論任何型號，
總之係10米以下，都可以行到High Speed，而其他盒上標明Standard Speed嘅AQ HDMI都一樣支援3D嘅。
最後我又問佢AQ一向都冇出過10米嘅HDMI線，點解有呢啲貨流出市面呢？而線身同插頭又唔同晒，莫非係流嘢！
職員就話喇，無錯！AQ一向都無出10米嘅 HDMI，之不過香港嘅商户見AQ 10米嘅HDMI有需求，
所以就向美國方面訂咗小量番嚟賣，而線身同插頭都同8米同12米有些少分別，網友阿明買到假貨只係一場誤會啫，
只要大家去番AQ特約經銷商購買，同埋認明盒背面有威達行貨嘅貼紙，咁就萬無一失啦！

SmallEar

thx for sharing

iwantbd

hififever

thks for sharing, very detailed report !

ericlio

末用過安記，有機會要試試。


- 發送自我的 iPhone 大板凳應用

ikkjr

Thanks. 果然好多料

qq1122yq

乜解究“好彩Q姐唔在場，否則真係唔敢想像...”

KingAlien

多謝師兄對 AQ HDMI ge 調查報告，我可以放心買條 12 m 俾投影出 3D 喇
(註：我唔係阿明)

大玩偶

放錯區啦 !!   

家庭影音 !!

間房仲大過我屋企 !!

Hintel

qq1122yq 發表於 2011-11-18 10:11
乜解究“好彩Q姐唔在場，否則真係唔敢想像...”

最少有1Q

bigpun1975

KingAlien 發表於 2011-11-18 10:35
多謝師兄對 AQ HDMI ge 調查報告，我可以放心買條 12 m 俾投影出 3D 喇
(註：我唔係阿明) ...

請不要對號入座

nwwedmond

好細心的一篇報告，唔加你分都對唔住自己．

benson26

香港人真係好

qq1122yq

benson26 發表於 2011-11-18 14:41
香港人真係好

你夠好啦，黎梗又派7K！

benson26

qq1122yq 發表於 2011-11-18 14:48
你夠好啦，黎梗又派7K！

你都有6000啦。

買咩都要去香港買。澳門買咩都貴，派10000都唔夠啦！

randyma

Good detail report. Thank.

metropolis

好x 精彩!

pam_jack

百事有冇收埋 Angel d 料先…

VW.R36

繼續努力.唔好比佢停!  

ilccmcf

pam_jack 發表於 2011-11-18 17:07
百事有冇收埋 Angel d 料先…