家庭mini hifi的小分享

king

是咁的
近日老友結婚＋新居入伙，話晒十多年老友，交情絕對唔似五舊啦
於是決定送部mini hifi做賀禮
以下係搵機過程的分享，希望大家唔好介意係lo end野

唔睇唔知，原來家陣d廠商都少出mini仔啦！mp3真係打沉晒傳統音響

第一個目標係yamaha mcr-755，all in one，有齊藍光，cdp，iphone 輸入，真係周身刀

不過..........冇張利
聲底係高清偏薄果隻，可能呢個係yamaha少味精的特色卦？
bd畫汁麻麻地，反差太大，少左層次感，sony入門五百幾蚊的bdp應該贏到佢
唯一驚喜係，部機播電影又幾爆得下，但播音樂唔得，又要賣成四千幾，性價比唔係咁值
（待續）

king

要影音都惦，睇黎都難
搵純hifi算數

第二個測試目標：
yamaha mcr 550


入面用Burr-Brown 1789 DAC
仲有digital docking優化iphone訊源
呢部高清得黎唔算太薄聲
比755更有音樂味

不過........睇真d，原來佢對喇叭係唔。防。磁。的！！
諗住比你放睡房用

但我個fd用黎擺廳，干擾到電視就唔好

so，放棄

king

YAMAHA放棄了
好多人話denon近期的mini仔惦

於是就試下呢部
denon df109


cd同amp分體設計，cdp有數碼輸出，仲有dab＋，output power又係mini hifi中較強的

睇spec真係好有誠意

不過一開聲，點解成架貨櫃車咁的
拿！雖然試音的地方，唔會set到部機好好，喇叭痴埋一齊，又用香雞線
但聲底都仲可以聽得出
denon比我的印象係
音壓大，太低沉，刻意加大個bass，結果就係得鋪牛力
女聲變老牛聲
音色濁，濛，唔細緻，粗枝大葉！

或者可以搵d線材就一就，再搞搞個擺位，再幾粒釘，應該會有明顯改善
但將部粗聲機較番薄，又何苦呢！加上佢價錢又唔係平

out！！

（待續）

eddie1000

師兄，你講得好有故事性，好想繼續睇落下。

CKKeung

精品文章！
罕有之topic！
讚！

小Ga

mini hifi比較既資料好少有

bcychung

好睇！interesting topic !
請繼續..........

bigpun1975

其實好多人都要揾mini hifi 放office 呀，房呀，呢個topic超讚

居士

好睇，精彩有見地，加分

fong527

king 發表於 2013-1-22 01:42
YAMAHA放棄了
好多人話denon近期的mini仔惦

睇怕都好難揾到部平靚正

c7c

直覺覺得JVC應該幾好喎, 再唔係師兄重手D買Linn, Nakamachi.....

Reference3

king 發表於 2013-1-22 01:34
要影音都惦，睇黎都難
搵純hifi算數

试下YAMAHA MCR-840我都用紧、总体来讲不错、、、、、、、

chuck

細細部的，都有好多選擇，但價錢就未必平。英國貨有naim unitiqute and cyrus 6dac. 奥地利有project-audio，全部都是細細件，喇叭另配。有機會同我地分享下啦。

jovi007

king 發表於 2013-1-22 01:34
要影音都惦，睇黎都難
搵純hifi算數

之前買harbeth 的spk,佢有d model 係冇防磁的
Send 了email 去問harbeth 廠放電视旁有冇影响，佢話冇問题的，因现在的平面電視係無問题的。
防磁係for以前的舊式crt電视的

king

感謝各位的支持

所謂泥水佬造門，過得自己過得人
雖然部機唔係自用，但作為音響發燒友，點都要揀部過到自己的！

denon f109都唔係咁滿意，目標就轉向同場另一部
onkyo cs n755


此子核心為192 kHz/24-Bit Audio DAC (WM8718)
加上安橋自家的VLSC電路同N-OMF振膜低音單元
spec方面份量十足（以mini hifi計）
加上安橋mini仔一向有好評
於是就將手上的2004年香港音響展sacd交比店員
屏息等候cs n755的聲音表現............


............................



.............................




..............................



..............................


（小弟）

（店員）


點解.......冇。聲。的？？？

店員望一望個顯示屏，竟然顯示為：track 99！！！

於是再次入碟，經一輪讀碟過程之後

仍然係顯示 track 99！！

係黎部機同隻碟八字唔夾！

唯有叫店員拎店內的onkyo試音碟做demo

播左一段女聲，然後再麻煩店員，同一track響denon f109再播一次

結果再次肯定，denon步大力雄，低音太重，女聲再次變老牛聲，都係接受唔到

安橋方面呢？比denon更有空氣感，女聲好清脆，聲音粒粒清，以同一track來比較，安橋的音色明顯比denon更舒服，更易入耳。同yamaha比較呢？yamaha係高清無味精路線，好比清蒸白菜，食到淡淡的菜香，但又稍嫌唔夠味！onkyo的取向有少少似yamaha，不過碟蒸菜就落左家x牌雞粉調了味，多左點風味，多左點人工修飾。之但係，蒸菜就係蒸菜，總係爭左d火候，直接d講，部onkyo仍然係薄聲，人聲唔夠厚潤，加上一試就遇上讀碟問題，信心亦因此打左折扣

於是再左望右望，居然見到.........(待續）

king

就響失望之際

竟然響陳設架見到部馬蘭士連喇叭！？





雖知我當日係貪方便，冇走上旺角hifi鋪，而係走左入去某大型連鎖電器鋪
貪佢任試唔嬲嘛！（唔比＄都唔嬲果隻）
呢部馬蘭士 m cr503，聽左個大名好耐，好似係10/11左右的產物
以日本機來講，都算係「舊款機」
家陣要搵到都唔易
本來我係想上kef試下佢夾kef c1的
既然比我有緣見到，何不即場一試呢？

一樣係用雞線駁，一樣係一對喇叭放到埋一埋
部機仲要放響貨架的最下層（所以之前走漏眼）
要「痞」響地，對耳先同對喇叭成水平

如此惡劣的環境下...........

部馬蘭士有喜出望外的表現wo！！！！



什麼音場結像唔好講啦，咁的擺法點會有？

就音色而言

呢部馬蘭士集合晒安橋同denon的優點

有力水（60w x 2 ＠ 6ohm）之餘，低音唔會太重太濛
人聲厚道適中，柔潤有味道，冇mini機又薄又「削」的感覺

呢種的聲音表現，同mini hifi係兩個層次（事實上，馬蘭士又冇話過呢部係mini仔）
呢部機可視為一部入門級的hifi all in one機種，只係size上較小而已！

跟機的LS502喇叭，看資料係為入門級馬蘭士擴音機而製，相信係oem產品
以喇叭計，未必係好東西，但聲音取向同spec至少係夾機
在我而言，夾機永遠最重要
喇叭同擴音機唔夾，一定日日「家嘈屋閉」，遲早分手

再好奇叫店員比部機的pat pat我睇，咦？



再睇埋speaker個pat，下？



竟然可以行double bi wire？？？

十年前買第一套兩聲道就玩過single bi wire即！

家陣呢部機仔可以玩埋double bi wire咁過癮？？

今次真係忍唔住，問下個店員哥哥，部機幾好玩wo！幾銀先？

答曰：舊款機，做緊特價，4k有找（講緊找幾條魚果隻）
        係wo！你有冇某超市的會員卡呀？你show張卡出黎，再送一舊水超市禮券wo！！

喂！點算先？擺明挑戰緊我的底線即！！！

買同唔買仲有冇討論的空間先？

就響呢個時候，突然諗起，張會員卡響屋企人樹wo！！

咁啦！江湖規矩，比張卡片比我，有決定再call你，到時同我留貨啦！！

就係咁，一招金蟬脫殼就閃左人（對方果然冇黑面，要比個讚！）

就響回家途中，心入面一直諗

仲有冇比馬蘭士更好的mini仔呢？（男人就是這樣一種生物）

所以，故事仲有下文

敬請留意出人意表大結局

閃先

hang1129

峰迴路轉，高潮迭起，精彩絕倫，無與倫比

eddie1000

究竟師兄會點決定呢?好心急啊....

waterblue

好心急呀.... 快d啦.

pangling

好...急...呀.... 快d啦!