感同身受 !!!!!!!

chanleechan

感同身受 !!!!!!! 係香港玩呢種玩意真係 ............... (無言)

Link --------> http://hk.lifestyle.yahoo.com/%E ... 5734594.html?cmp=vm

初中AV: 劏房音響
Men – 2013年12月13日星期五下午2:57
分享齊鼓掌！
請向所有喺香港玩影音既環境鬥士鼓掌！

喺香港，好多影音玩家似乎都比人用呢句話串過。
「哈，你買埋買埋啲 Amp 呀，喇叭呀，電線呀，都無位擺架啦。不如賣哂佢黎做首期，買層樓炒吓好過啦。」

你點睇？
悲哀既係，我真係認同。

當擺位喺一套影音系統既重要性，同器材既配搭係平分秋色既時候，我無辦法唔唏噓到衝綠燈。
除非你屋企個廳有二百呎，又唔使分拆上市做埋飯廳。如果唔係，真係要問句「擺位？咩黎架，食唔食得架？」

唔好講長高闊黃金空間比例咁挑骨頭，THX 擺法咁嚴緊，又或者杜比大圓圈擺法咁基本，剩係左右兩隻前置，又有幾多個可以放到相距五至六尺，離後牆一尺，同皇帝位成等邊三角形？有幾多個皇帝位，張梳化可以同後牆留兩尺放好少少對後置同後中置？又有幾多廳，可以比隻十二吋超低音，行完一個完整既波型週期？

唔係無，少囉。
又或者，好少囉。

退而求其次，你個廳唔係五角大樓，部電視同張梳化唔係同性相拒咁腿張開，而係四四方方，就算細到可以掉 remote 用腳趾開電視，你已經要謝主隆恩。

因為依家呢個，並唔係一個擺唔擺位既問題，而係一個擺唔擺到既問題。而擺到同擺唔到之間，除左無討論既空間存在之外，亦都無實實在在既空間存在。

你話幾灰。當你好鍾意一件器材，但係你明知道，越貴既器材放喺你間豆腐屋入面就越浪費，果種掙扎，果個矛盾既張力，真係呢。

有時我真係唔知自己係一個影音份子，定只係一直玩緊份子影音。

但係咁，唔通唔玩咩。
所以，請容許我再次喺到向香港所有既環境鬥士，包括朋友 R 呢間五十呎既影音睡房，獻上最崇高既敬意。

撰文: 聾眼陳
來源: 感同身受 !!!!!!!

gutgut

真係各有各玩法，我有個朋友響間幾十呎房仔度玩7.1 仲放左兩隻 10+12吋十仔.......... 炸到天花剝落咁滯，真係拳拳打心口 XDDDDDD

andy3210

呢樣野禁大個人，接受下現實啦。

vpkl

Dreaming...... to have a seperate Hi Fi Room in Hong Kong

racewong

因為依家呢個，並唔係一個擺唔擺位既問題，而係一個擺唔擺到既問題。而擺到同擺唔到之間，除左無討論既空間存在之外，亦都無實實在在既空間存在。

----------------------------------
依句最攪笑!

remychiu

我剩係知道……細過同屋企人住，有個'鑊敏'已經好開心，到十零歲阿爸阿媽比我用套微型播帶，已經好滿足，到後期同老闆一齊而未有化骨龍可以奮機，真係上天恩賜，跟住公主出世……呢十年係我聽機黑暗艱苦年(幾乎要帶助聽器兼且公主成日將我舞嚟舞去……)，但今年終等到老闆及公主學有所成，一個結他，兩個鋼琴，可以夾band，終於可以一齊聽歌，一齊聽吓音樂。以上我想講嘅係-每人有唔同際遇，只要你喜歡個樣嘢，就算點玩都覺得樂趣無窮，而且有得比你玩到，已經比好多人都好好……恩賜！