本帖最後由 rumor 於 2015-7-20 11:47 編輯
各位師兄, 想同大家分享吓近排嘅所見所聞, 志在吹水同請教吓各位心得.
姣婆出牆
當初玩玩吓退燒, 一來覺得玩得唔好聲, 二來工作忙(藉口), 三來玩吓玩吓發覺唔知玩緊咩, 所以就賣哂啲野, 換咗NAIM 合併加NAIM CD 機, 喇叭都係普通平價座地, 一於是但求其. 近排工作有變, 新舊交替之時, 無端端買咗架DAP同IN-EAR 耳機搭車聽, 就咁又撩番起條癮.
玩咩好?
常言道:"喇叭先決", 所以一於睇喇叭先. 冇玩咁耐, 咩嘢都唔識, 第一時間就係上音響網, 買HI-FI書, 惡補知識.
越睇得多, 越唔對路. 點解啲價錢, 同已往我玩嘅價位, 多咗個零. 再睇吓外國定價, 同香港定價, 點解差咁遠. 唔通香港買嘅係"LIMITED EDITION"?
廟細燈籠大
喺SHOWROOM 同屋企聽同一套HI-FI 一定有唔同, 香港玩HI-FI最貴係個地方. 比你有兩至三球錢用嚟玩HI-FI, 但如果只有一百平方呎空間玩, 玩出嚟結果大可能"有限公司". 但其實100平方呎如果1萬蚊呎都已經一百萬.
仲有就係個空間頻響特性, 好嘅SHOWROOM 有做Acoustic treatment開大大聲都可以唔叫唔拮耳唔BOOM, 但一買返自己屋企就一定走晒出嚟. 如果屋企人包容,就可自由發揮做環境鬥士. 如果唔係, 就只可以諗點樣"撳"高/中/低, 又或者二手見.
如果大家有個10' X 19' 空間 (可能好多師兄個空間已經係兩倍咁大), 係唔係一定會打長個廳嚟玩? (假設家人冇問題任你玩)
運桔
睇完一大輪HI-FI網同雜誌, 都係要身體力行, 出街運吓桔, 問吓價.
又係做番指定動作: 搭LIFT到頂層再行樓梯, 門口"莊"吓有人聽緊就入去八吓. 但我發覺今時唔再同住日. 而家連睇嘅人都少咗. 旺角嗰兩幢大廈架LIFT易搭咗.
行咗幾次, 都發覺冇人試機. 咁唯有膽粗粗一個人單挑.
試音
我近排試過好幾個組合:
MARK + Audio Physic
Devialet + Audio Physic
T+A + Wilson Audio
Constellation + Magico
Tidal + Tidal
Burmester/Dartzel + Avalon
老麥 + Sonus Faber
VTL + Rockport
我自問耳仔唔靈, 以上組合好多聽出嚟都有頭冇腳, 又或者有身冇手. 只有一小部份係聽落令我有衝動想買.
試聽
之前有講過我試咗好幾個組合. 我呢個木耳人考慮準則如下
- 聆聽環境 200 平方呎之內 (可能仲細啲, 要英女皇Confirm)
- 唔想太多件, 因太多件(計埋AV AMP 同 BLURAY 機)可能遮住晒窗台. 英女皇實唔批地比我
- 座地喇叭, 純粹個人喜好
- 雜食用, 咩都聽. 唔想要太埋身, 又唔想要太多signature sound 器材, 驚聽兩嘢就會悶
- 因為打算搬嘅地方兩面側牆距離只有10呎唔夠, 如果喇叭要求距離側牆較遠會有問題
- 擺得喺廳, 點都要觀賞用.
- 唔會有一球錢嚟玩, 半球都冇呀. 如果師兄你已經係"一球人"玩家, 我以下嘅廢UP遊記可以不理. 嘻嘻
就以上條件, 我開始去各大SHOWROOM 運桔啦
一號佳麗 - 老麥與SONUS
有日走咗去八吓, 大家都知邊個係代理. 一向以客為先嘅態度, 對我呢個嘍囉都冇咩白眼. 第一時間門口莊到部 MA8000 + 奧林比亞組合, 趁有人試緊, 就鼠入去聽吓先. 我曾經分別用過MA2275 同MA7000, 當時唔太鍾意佢嘅表現.
當再聽呢個組合時, 比起我當年嘅印像好, 但仍然有個種"現代老麥感覺". 至於奧林比亞, 觀賞用唔錯, 音色係SONUS嘅DNA, 唔太啱我. 我覺得呢個組合係一杯朱古力咖啡, 兩樣走埋一齊, 我覺得有啲怪. 純個人感覺
仲有一個問題, SHOWROOM擺機位置面對落地大玻璃, 仲要企起身聽, 冇得坐, 全程只聽到個中音同高音不停反射, 有啲惡攪, 我半踎咁聽咗十分鐘, 之後要去洗手間解決.
2號佳麗 - D_V_L_A + 德國"音響物理"
當我上網搵資料時, 見到有部"電磁爐"好鬼靚仔, 又聲稱"高科技劃時代一體化高性能可持續發展無限申延非工業用....."嘅合併機. 嘖嘖稱奇之下就有一日放工飛地鐵去佢香港代理試吓有冇得運桔.
上到去大約6:45分, 拉門但發現原來門係鎖上. 心諗呢個區可能同中環一樣六點後就關門. 但都嚟到門口, 一於試吓撳吓門鐘有冇人應. 一撳完3秒後就有個熟悉面孔出嚟開門, 我當時唔知佢咩名, 後來至知佢係大名鼎鼎嘅Kent 哥.
我同佢講我想試個架"D咩...", 佢二話不說就請我入去坐低, 跟手介紹佢DEMO緊嘅"D咩...." 200 + Audio Physic Tempo 25+
Audio Physic Tempo 我以前係兩位師兄屋企聽過, 老實講佢同我想搵嘅喇叭要求有距離, 但就試吓呢架"D咩..." 推有咩表現. 同場加演Aurrender (串錯字唔好怪我, 我讀書小) N100 CAS 播FILE.
一開聲我有啲"經期"(驚奇), TEMPO 點解可以潛咁低, 隱咗型. 唔通TEMPO 25+改良咗咁多, 定係個"電磁爐"勁呢? 聽人聲時個"音像"細緻, 聽管弦樂定位清晰, 定音鼓一打低頻有啲加咗SUB仔FEEL. 當然, 再聽多幾首睇吓咩料先啦...............
一路聽,一路KENT 哥解釋 "Devialet" (D_V_L_AT) 係咩原理, 同佢嘅AHD (A類+D類)放大結構. 仲有當然佢嘅"SM"系統 (係"SAM"至真), 點樣可以配合唔同喇叭低音單元量度出嚟嘅物理同音響特性去建立PROFILE, 令到150Hz 以下低頻表現得以改善. 算啦, 我呢啲讀書小嘅都係唔會明架啦, 耳仔作實吧.
聽多幾手, 發覺哽喺差咁啲野. 聽真啲, 覺得有啲瘦骨仙嘅感覺. 可能係AMP, 可能係喇叭, 又可能兩樣都有啲. 後來望到有對VIRGO 擺係另一個位置, 我問可以試嗎, KENT 哥就話不如搵日SET好再加兩台200 (即係400) 試清楚. 咁就一於擇日再試啦
2號佳麗 - D_V_L_A + 德國"音響物理" --- 第二回
試完 Devialet 200 + Tempo 25 之後一星期, 我再打電話去約試 Devialet 400 + Virgo. 前一日打去, 第二日就安排到.
今次喺另一間房試, 大兩倍. 唔再用CAS, 用VA嘅頂級SACD機, 所以有啲唔公平, 冇所謂啦.
一開聲, 唔同晒, 密度肉感有反啦, 但反而冇咗個SUB仔FEEL, 冇潛得咁深. 取而代之, 就係實淨嘅沖擊型低頻. 上下三路都總括感覺平衡.
但係, 我總係感覺一啲野唔見咗, 講唔出, 但又因為係咁, 我入唔到去音樂入面.
觀賞用, 呢套一流, 小巧精緻, 擺出嚟連機架都慳幾層, VIRGO 黑白配夠晒時代感.
反屋企諗吓先......
3號佳麗 - VTL + ROCKPORT
話說幾年前係音響展聽過德哥播ROCKPORT, 聽完之後就好似我個頭像個樣一樣. 大家都知啦, 音響展嘅目的大部份都係"觀賞用", 環境所限, 器材好多未煲好, 近年又多咗好多"厚多士"喺你面前行來行去, 大聲講嘢, 講電話. 要聽到好聲真係"百年一遇"呀. 所以嗰次記憶令我心目中對ROCKPORT有好大好感.
所以有日放假就上去搵吓德哥運吓桔. 上到去有一位資深嘅店員PETER哥招待我, 我在此多謝佢熱情款待.
我呢個嘍囉, 試嘅一定係入門型號啦, 叫Atria. 查實我冇做到功課, 所以唔知係咩, 試咗先算. 但一上去Atria 冇接駁到, 只可以試佢高一級嘅Avior.
Atria 三路三單元, 鈹高音, 碳纖三文治中及低音, 外型同德哥一樣, 型! 用咩推, 你上過去德哥鋪頭就知啦, VTL 囉. 事先聲明, 我對膽機有小小驚, 驚係因為要出豉油點雞, 買膽同攞我膽一樣.
講真, 一開聲我有啲失望. 我覺得佢好叫, 三頻唔平均. VTL moonblock 每邊200W 推, 力夠但聲唔好. 注意, 佢係用DENON CD機. 我英女皇在場, 佢話佢有啲頂唔順啲高音. 我覺得原因有三個: 1.CD機問題, 2.地方太大低頻量唔足夠令中高聽落太多, 3.線材
點好呢, 我係心入面同自己講, ROCKPORT喺好好聲嘅, 唔關佢事, 其他唔夾啫................ 之後PETER就話不如下次試真啲, 駁好Atria 同用VTL stereo amp 試清楚啦. 就咁就約咗一星期後再試過
3號佳麗 - VTL + ROCKPORT - 第二回
今次一上到去, 有啲列隊歡迎我嘅感覺. 我除咗有一次去日本溫泉酒店有同樣感覺之外, 其餘真係未試過.
一對Atria 擺咗喺面前, PETER話德哥同佢地攪咗3個鐘, 真係認真唔話得. VTL 仍然係MONOBLOCK, 因STEREO 連 DEMO 都賣咗. 我兩公婆就帶咗8隻CD去聽. 一開聲, 吓, 點解呀, 點解條梅香馬友擺咗面前. 試人聲似講佛謁, 試MISSION IMPOSSIBLE 似茶餐廳水吧整緊奶油多加冬檸茶, 聽林憶蓮好似佢同恭碩良嘈咬之後一樣, 冇晒表情. 諗住閃人之際, 德哥出嚟問我聽成點, 我話"AR......."嘅時候, 佢就走去MAC BOOK 面前, 播FILE 比我聽. 一出聲, "哦", 原來係CD機作怪. 你唔聽過, 係唔會信可以差咁遠. 由SONY微型組合, 變成音場頂爆每個角落, 三頻到位, 食咗"偉哥"一樣嘅HI-END組合.
睇到呢度, 你可能估我之後走咗去搵"安信"幫我買佢番屋企. 可惜, 我天生運桔DNA叫我唔好, 一來之前聽到冇心機攪到信心動搖, 二來係佢有一個強勁對手在後, 三來係"安信"話唔會幫我呢啲嘍囉.
最後都係反屋企諗吓先.......
4號佳麗: 偉信 Sabrina + T+A
如果你前面有位靚女, 背面睇頂呱呱, 之後回眸一笑,發覺佢有一張"葉瘤"嘅魔鬼面孔, 你會照食可也, 定係有禮貌地"妖"一聲就掉頭走呢? 我可以話你知, 我一定係後者.
有日我行過添置"的士站", 本來想去聽"蘇菲亞羅蘭", 推門行入去感覺個場氣氛同以住一樣, 你知我講咩啦. 行到一堆機前, 見到有對好"靚"嘅新喇叭. 佢唔講, 我以為有兩副鬼佬棺材擺係度, 如果用嚟播"吸血新世紀", 我估會幾一流.
坐低試吓聲, 佢用緊 T+A 合併機 (stereo 300w) 推, cd 係audio research cd9. 老實講, 如果可以用個袋"lup"住佢, 放佢去一間200呎或以下地方開聲比我試, 我諗我會比錢買呢套野. 柔順, 唔會太埋身, 如果擺好個位, 應該會隱晒型. 佢唔係極端份子, 高要比天高, 低要比海深. 但你要挑剔佢唔夠, 又好難. 比起"蘇菲亞羅蘭", 一般100呎多嘅地方可以玩得到好聲. 偉信嘅喇叭, 不嬲都有番咁上下, 但"葉瘤"咁嘅樣, 我頂唔順囉.
仲有, 我聽完個出街價錢, 再比吓佢個size同物料, 唔係呀嗎. Sorry, 我真係接受唔到囉, 我仲要去車個袋"LUP"住佢, 筆數點計呀!
5號佳麗 - Burmester / dartZeel + Avalon
呢次係我最失敗嘅運桔過程, 試完之後我自己唔知試咗咩. 再一次引證我木耳同係一個嘍囉.
有日去咗尖咀"正方型"商場行, 想試吓合併機. 走咗入去"掃馬荒", 我之前好少去參觀, 只係去過旺角大型商場地庫舊鋪. 入到去間試音室, 有位同好試緊"二嫂" + Burmester 前+ Audio 輝 MOONBLOCK + Avalon. 身為一個有禮貌嘅嘍囉, 當場只係企係後排安靜咁欣賞. 直到嗰位師兄試完之後, 我至舉手要求想試吓前兩部合併機. 店員回答曰:"差好遠", 我還拖曰:"我知道哦, 那可否一試呢?"
就係咁, 佢就接駁咗"二嫂"+ Burmester 032 + Avalon 開聲我試, 試咗15秒, 我終於知道佢講嘅嘢冇錯, 真係差好遠, 因為反咗相. 佢反應好快, 知道個2+/3- 掉轉咗, 所以一個箭步去攪二嫂. 攪完再聽, 我都仲係覺得佢講得好啱("差好遠"). 所以就要求轉用 dartZeel 聽吓. dartZeel 一駁一開聲, 佢嗰陣"糖水"味, 洋溢於試音室每個角落. 除此之外, 都仲係好似佢咁講----"差好遠".
咩野"差好遠"? 咪就係我木耳緊緊可以聽到嘅高中低同音場囉. 我覺得中間人聲起碼有5呎差11吋咁高, 每件樂器可能各自係"密室"玩緊, 分隔度太高, 高到中間好空. 低頻就好似潮退一樣(唔嚟呀).
都係我衰, 又唔預約, 人地講"差好遠"又唔信, 死都要試. 我以為Burmester 出名大力好分析力, 咁推Avalon 未至於只係出到聲呱. dartZeel 陣"糖水"味, 喺我自己唔啱啫.
6號佳麗: 神奇的星河感覺 - Constellation + Magico
之前提過, ROCKPORT 不嬲喺我心目中印像都好好, 另一個印像好嘅喇叭牌子, 係Magico
我只係喺二手鋪及一位帥兄屋企聽過兩次Magico, 感覺良好. 但一路都唔敢去SHOWROOM 試, 因為當年Q1 個價錢嚇親我. 但本著"運桔唔使本"嘅精神, 就試完5號佳麗之後走咗去隔離, 扮晒大富貴咁去試吓聽.
初頭走到入去都冇人理我, 大堂擺放嘅係NAIM/FA/ProAc, 唔多啱我. 所以我就向前搵一個我應該幾年前同佢運過桔嘅店員, 扮晒型咁話"除咗呢啲牌子, 仲有冇其他兩聲道嘅器材呀?". 店員之後就搵咗另一個專責兩聲道嘅Vincent哥嚟招待我.
Vincent 哥就帶咗我入一間試音室, 大概400平方咁上下, 入面有幾對Magico, 左手邊就係一堆DCS 同 一隻叫constellation 嘅前級. 駁咗線嘅係Magico Q3, 中間就有兩台constellation 後級, 後級係未開著.
分別試咗兩對Magico, CD當然係dCS 4件頭, 前後級用Constellation Inspiration Preamp 1.0 + Stereo 1.0
第一對試係Magico Q3. 一開聲, 唔掂, 同隔離鋪一樣. 聽多兩首歌, 好啲, 但都係一般, 再聽多兩首, 套前後似乎瞓醒啦, 佢應該之前休眠狀態, 用作觀賞. 當聽到第7隻歌, 我至可以聽真佢個聲底. 好多人話Magico 好中性, 我見解係, 佢唔係中性, 佢有佢自己表達低頻質感方法, 佢音場好似營造出一個氣場(唔係高低嘈開大聲時時聲嗰隻), 填滿你聆聽空間. 但係, 佢太霸度, 佢行得太埋, 壓得我太緊. 我日頭返工都已經比我老細迫我, 夜晚聽歌我想座係個Concert Hall 後啲, 個鑼細啲, 個鼓唔好係我心口二呎前打埋嚟. 我聽完歌想瞓番覺好嘅.
6號佳麗: 神奇的星河感覺 - Constellation + Magico - 第二回
試完Q3, 問咗個價, 我覺得"這個機會不是我的". 之後問吓對前後級, 唔....都或者可能可以. 原本諗住轉身走, 眼見有一對細隻啲嘅Magico, 咁咪問吓有咩唔同, 同幾多銀啦. 聽完之後, 我話下次試吓呢對先, VINCENT就問我趕唔趕時間, 唔趕就"打個冷"15分鐘有得聽. 咁好服務, 一於等一陣啦.
我之後行咗個冷, 喺樂聲買咗風筒, 攪咗半個鐘至返過去再試. 入到去, 所有野都準備好, 同一套dCS, 同一套Constellation Pre + Stereo, 換上嘅係Magico S3. 一開聲就唔同FEEL, 隊樂隊細咗, 氣場細咗, 我冇工具量度所以我唔識講細幾多, 但件頭細緻咗, 空間都填得滿. 低頻量較小, 最唔同嘅, 就係低頻唔係直打出嚟, 而係滲出嚟. 我覺得佢唔中性, 起碼高音唔係. S3 同 Q3, 性格好唔同.
我聽咗幾首歌之後, 感覺到自己有啲唔妥, 好似有的事會發生. 我個注意力, 走咗去對前後級. 佢個music flow 好好, 背景又好靜, 唔係追求力嘅表現, 但你唔會話佢冇力, 個樣夠簡單, 個價錢又好啱.........."喟, 老公, 走未呀?", 好彩老婆喺隔離, 唔係.......
7號佳麗 - TIDAL + TIDAL
如果識得我耐嘅人, 都知我玩過KHARMA. 我當時真係好鍾意KHARMA嘅聲, 尤其係肚臍單元, 快同通係佢特點. 近排知道有個新進牌子, 叫TIDAL, 聽講又係用肚臍同鑽石高, 既然KHARMA縮皮唔再用喺D入門級別度, 我又冇本事買佢高級型號, 咁就八卦去睇吓啦.
我分別去咗中環同旺角鋪試聽, 一次試聽CONTRIVA, 一次試聽AGORIA. 老實講, 兩次都令我失望.
CONTRIVA 係用 Jeff Rowland + TIDAL MONO 推, 我喺無意中行過走入去試. 佢當時播緊一首JAZZ, LIVE BAND 伴住一位磁性聲線嘅女歌手. 我企喺度聽咗1分鐘, 我覺得平平無奇. 音場係大, 聲音係乾淨, 但引用大家所講嘅"微動態", 我覺得冇. 我當時都唔知佢要幾錢, 我一問, 定價係一隻手掌打開多啲, 我打咗個"突". 我以為可能我企喺度聽唔清楚, 咁我坐低集中精神聽, 我聽,我聽,我聽, 我都係覺得隊BAND HEA 住嚟玩BAND, 個黑人女歌手應該係趕咗三場唱到驚. 算啦, 我都係去第二度聽.
第二次係試對高過我嘅AGORIA, TIDAL前後MONO. 今次, 好聲, 但我唔會買, 咁鬼貴, 仲要高過我, 如果佢可以有多幾個功能, 譬如可以打橫當餐枱, 唔用可以摺埋佢, 及可以中間放CD, 我估當埋底褲都可以諗吓. 但係,比到呢個價錢, 我覺得佢音質可以, 但音效就.......
總結
其實我都係想分享吓我所見所聞, 要品評器材一啲都唔易. 令到器材聲衰嘅原因有好多, 反之, 要令到套HI-FI好聲除了器材本身質素之外, 其他原素都好重要.
現今器材越來越貴, 雖然大部份HI-FI友(包括小弟)經常期望"平"機會出好聲, 但事實係金錢掛帥. 要好力又唔粗聲又要多功能又要出到貴氣, 就要自己搵計算機計一計自已攞幾錢出嚟玩. 自己要同自己做期望管理.
香港HI-FI 業界我大膽講有退步嘅現像, 真係"用心去做"同"敬業樂業"嘅越來越少. 去試機真係好難聽得出你想買嘅器材好唔好聲. 一個新手要去搵前輩家訪實在太難. 玩得兩玩就好易放棄.
我唔期望媒體寫手可以好似我呢啲嘍囉大無畏咁對器材直話直說, 但都不能過份買弄語言藝術, 令到讀者有被老點之危.
而家開箱POST越來越多, 評論就越來越少, 希望各前輩多啲出嚟分享, 等我呢啲新手學吓嘢, 比少啲學費, 行少啲冤枉路.
我最後會買咩喇叭同擴音器? 其實都唔重要啦, 我啱聽嘅你未必啱聽.
|
IP卡
狗仔卡
發表於 2015-7-15 11:58:23
提升卡
置頂卡
沉默卡
喧囂卡
變色卡
顯身卡
